Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 14

Eme Họ Iruo Imishọnare?

Eme Họ Iruo Imishọnare?

United States

Isukulu ọ Giliad, evaọ obọ Patterson, New York

Panama

U kri no nọ ewuhrẹ ọ rọ rrọ abọ ologbo egagọ Isẹri Jihova. A ruẹrẹ isukulu obọdẹ họ kẹ ahwo nọ a rrọ iruo odibọgba oke-kpobi na re a sai ‘ru iruo rai gbunu.’—2 Timoti 4:5.

Isukulu Ekobaro Oke-Kpobi. No ohwo ọ tẹ rrọ ọkobaro oke-kpobi te ẹgbukpe no, a re ziziei kpohọ isukulu nọ a rẹ rọ edẹ ezeza ru, yọ ẹsejọhọ Ọgwa Uvie nọ ọ kẹle riẹ ọ te jọ kpohọ isukulu na. Ẹjiroro isukulu na họ re i fiobọhọ kẹ ọkobaro oke-kpobi si kẹle Jihova, wo onaa usiuwoma ota ziezi, jẹ ruabọhọ iruo na.

Isukulu Rọkẹ Etausiuwoma Uvie Na. A rẹ jọ isukulu nana nọ a rẹ rọ emerae ivẹ ru na wuhrẹ ekobaro nọ i wo onaa ziezi nọ u no eva ze nọ a vi ai kpohọ oria kpobi nọ u thabọ no ẹwho rai nọ ẹgwọlọ ọ mae rrọ. O wọhọ ẹsenọ a be ta nọ, “Mẹ na! Vi omẹ,” be rọ aro kele Ọtausiuwoma nọ ọ mae rro na, Jesu Kristi. (Aizaya 6:8; Jọn 7:29) Re ohwo ọ kwa kpohọ ẹkwotọ nọ o thabọ no uwou riẹ, ẹsejọ o rẹ gwọlọ nọ o wuhrẹ epanọ o re ro ru uzuazọ riẹ lọhọ. Uruemu ẹwho, ẹroro hayo edhedhẹ, gbe emu obonọ ọ kwa nya na e sai wo ohẹriẹ no obonọ o noze. O sae tubẹ gwọlọ nọ o wuhrẹ ẹvẹrẹ ọfa dede. Inievo-emezae gbe inievo-emetẹ nọ e rrọ umuo ikpe 23 rite ikpe 65 nọ e rọo no gbe enọ e re te rọo ho a re kpohọ isukulu nana, yọ isukulu na i re fiobọhọ kẹ ai wo onaa nọ a gwọlọ re a sai ru iruo odibọgba na je wo iruo ziezi evaọ ukoko Jihova.

Isukulu ọ Giliad. Evaọ ẹvẹrẹ Hibru, otofa “Giliad” họ “Ubu Isẹri.” Anwọ 1943 nọ a rọ to isukulu na họ na, inievo nọ i nwrotọ no isukulu na i bu vrẹ idu eree (8,000) no. A vi rai kpohọ iruo imishọnare nọ a be jọ se isẹri evaọ “eka avọ eka akpọ na,” yọ emamọ iyẹrẹ buobu i bi noi ze. (Iruẹru Ikọ Na 13:47) Oke ọsosuọ nọ imishọnare a te orẹwho Peru, ukoko ovuovo o jariẹ hẹ. Rekọ ikoko nọ e rrọ orẹwho yena enẹna i bu vrẹ odu ọvo (1,000). Oke ọsosuọ nọ imishọnare mai a te Japan, Isẹri Jihova nọ e jọ orẹwho na a te imakpe he. Rekọ Isẹri Jihova nọ e riẹ obọnana a bu vrẹ idu egba ivẹ (200,000). A re wuhrẹ Ebaibol na t’otọ ziezi evaọ etoke isukulu Giliad nọ a rẹ rọ emerae isoi ru na. A re zizie inievo nọ e rrọ ekobaro obọdẹ, imishọnare nọ i ri kpohọ isukulu na ha, inievo nọ e rrọ uwou ogha, gbe esẹro ọnyawariẹ kpohọ isukulu na, yọ a rẹ romatotọ wuhrẹ ai ziezi re a fiobọhọ ru iruo Uvie na nyaharo ziezi.

  • Eme họ ẹjiroro Isukulu Ekobaro Oke-Kpobi?

  • Amono a re kpohọ Isukulu Rọkẹ Etausiuwoma Uvie Na?