Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 11

Fikieme Ma be Hai ro Kpohọ Ikokohọ?

Fikieme Ma be Hai ro Kpohọ Ikokohọ?

Mexico

Germany

Botswana

Nicaragua

Italy

Fikieme eva e be rọ were ahwo nana kpobi? A rrọ okokohọ mai. Wọhọ epanọ Ọghẹnẹ ọ ta kẹ idibo riẹ evaọ oke anwae inọ aikpobi a hai koko oma họ isiasa evaọ ẹgbukpe re a gọe na, ere ọvona ma bi kuomagbe nẹnẹ evaọ ikokohọ mai. (Iziewariẹ 16:16) K’ukpe k’ukpe, ma wo ikokohọ esa: ikokohọ ikogho ivẹ nọ a rẹ rọ ẹdẹ ọvuọvo ru, gbe okokohọ ubrotọ nọ a re ru edẹ-esa. Irere jọ vẹ ma be hae jọ ikokohọ nana wo?

I bi fi obọ họ kẹ omai bọ okugbe nọ ọ rrọ udevie mai ga. Wọhọ epanọ emọ Izrẹl a jẹ hae rọ evawere jiri Jihova evaọ “udevie ogbotu na,” ere ọvona o be hae were omai re ma rọ okugbe jiri Jihova evaọ ikokohọ mai. (Olezi 26:12; 111:1) Ikokohọ nana i bi ru ei lọhọ kẹ omai re ma kuomagbe Isẹri Jihova efa nọ i no ikoko efa hayo erẹwho efa ze. Evaọ oke uvo, ma rẹ jọ ogege okokohọ na serihọ jẹ re emu kugbe, yọ onana u bi fiba okugbe mai. (Iruẹru Ikọ Na 2:42) Ohwo kpobi ọ rẹ jọ ikokohọ na ruẹ nọ ma gine “you imoni” mai nọ e rrọ akpọ na soso.—1 Pita 2:17.

I bi fi obọ họ kẹ omai bọ usu mai kugbe Ọghẹnẹ ga. Emọ Izrẹl a wo erere ọfa no ikokohọ rai ze keme i ru nọ a sae rọ “riẹ otọ eme” Ikereakere na nọ a je ru vẹ kẹ ae. (Nehemaya 8:8, 12) Ere ọvona ma rri ithubro Ebaibol nọ a be hae kẹ omai evaọ ikokohọ mai ghaghae. Ebaibol na a be hae rehọ uzoẹme okpẹdẹ kpobi no ze evaọ ikokohọ mai. Ẹkwoma evuẹ ọbọga, eme-ọzọhọkugbe, gbe idhesẹvia nọ a be hai ru evaọ ikokohọ mai, ma bi wuhrẹ epanọ ma sai ro ru oreva Ọghẹnẹ. Fikinọ ahwo nọ a thihakọ ebẹbẹ jọ no a be hai gbiku epanọ a sai ro ru onana, o be hae bọ omai ga. A rẹ jọ ikokohọ ilogbo mai dhesẹ edrama nọ i re ru ikuigbe Ebaibol vẹ omai ẹro ziezi, yọ u wo eware buobu nọ ma bi wuhrẹ no ai ze. Rọkẹ ahwo nọ e gwọlọ dhesẹ omauromudhe rai kẹ Ọghẹnẹ via, a rẹ họ ae ame evaọ okokohọ kpobi.

  • Fikieme ikokohọ mai e rọ rrọ etoke evawere?

  • Irere jọ vẹ whọ rẹ jọ okokohọ mai wo?