Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 2

Fikieme A bi ro Se Omai Isẹri Jihova?

Fikieme A bi ro Se Omai Isẹri Jihova?

Noa

Abraham avọ Sera

Mosis

Jesu Kristi

Ahwo buobu a re roro nọ odẹ na Isẹri Jihova yọ odẹ egagọ ekpokpọ. Rekọ, bu vi ikpe idu ivẹ gbe egba ihrẹ (2,700) nọ i kpemu, Ọghẹnẹ uzẹme na o se idibo riẹ nọ “isẹri” riẹ. (Aizaya 43:10-12) Odẹ nọ a riẹ omai vẹre họ Emọ-Uwuhrẹ Ebaibol, bẹsenọ ukpe 1931 u ro te. Fikieme ma rọ rehọ odẹ na Isẹri Jihova?

Odẹ mai nana u dhesẹ oghẹrẹ Ọghẹnẹ nọ ma be gọ. Odẹ-oma Ọghẹnẹ, Jihova, o romavia bu te idu buobu evaọ iko-ebe anwae nọ a kaki kere eme Ebaibol na fihọ. Rekọ evaọ efafa Ebaibol buobu, a si odẹ nana no eria nọ o jọ romavia, a tẹ rehọ edẹ-ovao wọhọ Olori hayo Ọghẹnẹ ro nwene iei. Whaọ, odẹ-oma riẹ, Jihova, oye Ọghẹnẹ uzẹme na o se kẹ Mosis evaọ okenọ o dhesẹ oma kẹe; ọ ta kẹe nọ: “Onana họ odẹ mẹ bẹdẹ bẹdẹ.” (Ọnyano 3:15) Enẹ o ro dhesẹ nọ o wo ohẹriẹ no eghẹnẹ erue kpobi. Eva e be were omai inọ a be rehọ odẹ ofuafo riẹ se omai.

Odẹ mai nana u bi dhesẹ iruo nọ ma bi ru. Anwọ oke Ebẹle ze, idibo Ọghẹnẹ a bi se isẹri kẹ amọfa kpahe ẹrọwọ nọ a fihọ Jihova. Evaọ oke anwae, Noa, Abraham, Sera, Mosis, Devidi, gbe amọfa a kuomagbe utu “isisẹri” Ọghẹnẹ uzẹme na. (Ahwo Hibru 11:4–12:1) Wọhọ epanọ ohwo o re se isẹ kẹ ọrivẹ riẹ nọ a be gba eku h’uzou evaọ uwou-ẹdhoguo na, ere ma gba riẹ mu re ma se isẹri uzẹme kpahe Ọghẹnẹ mai kẹ amọfa.

Odẹ nana nọ ma bi yo na u dhesẹ nọ ma be rọ aro kele Jesu. Ebaibol na o se Jesu “oseisẹri uzẹme.” (Eviavia 3:14) Jesu ọ ta nọ o ‘dhesẹ odẹ Ọghẹnẹ’ via je ‘se isẹi kẹ uzẹme na’ kpahe Ọghẹnẹ. (Jọn 17:26; 18:37) Fikiere, o gba Ileleikristi uzẹme họ re a yo odẹ Jihova, je whowho iei kẹ amọfa. Onana họ oware nọ Isẹri Jihova a be daoma ru na.

  • Fikieme idibo Jihova nọ a kake riẹ wọhọ Emọ-Uwuhrẹ Ebaibol a rọ rehọ odẹ na Isẹri Jihova?

  • Anwọ oke vẹ Jihova o ro wo isẹri fihọ otọakpọ na?

  • Ono họ Osẹri Jihova nọ ọ mae rro?