Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 17

Ẹvẹ Esẹro Okogho gbe Erọ Ubrotọ a bi ro Fi Obọ Họ kẹ Omai?

Ẹvẹ Esẹro Okogho gbe Erọ Ubrotọ a bi ro Fi Obọ Họ kẹ Omai?

Malawi

O bi dhesẹ onaa nọ a sae rọ ta usiuwoma ziezi kẹ inievo na

Avọ inievo na a rrọ usiuwoma

Ọ be gbẹgwae kugbe ekpako ukoko

Ikerakere Griki na e fodẹ odẹ Banabas avọ Pọl ukọ na unuẹse buobu. Ezae ivẹ nana e jọ esẹro ọnyawariẹ, nọ i je weze bru ikoko ikpe-udhusoi ọsosuọ na. Fikieme? Re inievo ukoko na a dikihẹ ga ziezi evaọ egagọ Ọghẹnẹ họ oware nọ o mae jarae oja. Pọl ọ ta nọ ọ gwọlọ nọ o re “zihe nya i riwi imoni na” re ọ riẹ epanọ a rrọ. U no rie eva ze re ọ nya emaele buobu, re ọ ruẹse bọ inievo na ga. (Iruẹru Ikọ Na 15:36) Esẹro okogho gbe erọ ubrotọ mai nẹnẹ a be rọ unevaze ru epọvo na re.

A rẹ nyaze te tuduhọ omai awọ. Ọsẹro okogho o re weze kpohọ enwenọ ikoko 20, yọ ọ rẹ rria ẹkpoka ọvo kugbe ukoko ovuovo isiava ẹgbukpe. Ọsẹro ubrotọ o re weze kpohọ ikogho jọ gbe ikoko sa-sa, yọ ọye ọ rẹ jọ ohwo-agbara evaọ okokohọ jọ evaọ okogho na ẹsievo ẹgbukpe. Ma rẹ sai wo irere buobu no eware nọ inievo nana a rọ ẹro ruẹ no ze, gbe eyae rai otẹrọnọ a rọo no. O rrọ isiuru esẹro ọnyawariẹ re a riẹ je yeri kugbe inievo na kpobi oghẹrẹ ovona, te ekpako gbe emaha, yọ a re lele omai kpohọ usiuwoma ota re. Esẹro nana a re kuomagbe ekpako ukoko weze bru inievo ukoko na re a bọ ae ga, yọ a re je ru eme nọ e rẹ tuduhọ omai awọ evaọ iwuhrẹ ukoko gbe ikokohọ.​—Iruẹru Ikọ Na 15:35.

A wo isiuru kpahe inievo na kpobi. O rrọ isiuru esẹro okogho gbe erọ ubrotọ re inievo na kpobi a kru ukoko na ga ziezi. A rẹ gbẹgwae kugbe ekpako gbe idibo ruiruo na re a ruẹse riẹ oria nọ a jo wo ẹnyaharo gbe oria nọ a jo kie kpemu, yọ a rẹ kẹ ae ohrẹ nọ u re fi obọ họ kẹ ae wọ ewha-iruo rai ziezi. A re fi obọ họ kẹ ekobaro na re a sai wo ẹnyaharo evaọ iruo usiuwoma ota rai, yọ o rẹ were esẹro nana re a kuomagbe enọ i kurẹriẹ ziọ ukoko na obọ, jẹ riẹ kpahe ẹnyaharo nọ a bi wo evaọ ukoko na. Inievo nana a be rọ unevaze ‘gbodibo kẹ omai.’ (2 Ahwo Kọrint 8:23) O gwọlọ nọ ma raro kele ẹrọwọ gbe ẹzi omarọkẹ iruo Ọghẹnẹ nọ a wo.—Ahwo Hibru 13:7.

  • Ẹjiroro vẹ esẹro ọnyawariẹ a bi ro weze kpohọ ikoko Isẹri Jihova?

  • Irere jọ vẹ who re wo no iweze rai ze?