Bolivia

Nigeria, ọnọ ọ jariẹ vẹre gbe okenọ a wariẹ bọe no

Tahiti

Wọhọ epanọ odẹ na Ọgwa Uvie u do na, iwuhrẹ kpobi nọ a be jọ etẹe wuhrẹ i kie kpahe Uvie Ọghẹnẹ, onọ o jọ uzoẹme usiuwoma ota Jesu.—Luk 8:1.

Egwa Uvie yọ eria egagọ uzẹme evaọ ẹwho kpobi. Egwa Uvie yọ eria nọ Isẹri Jihova a re kokohọ jo wuhrẹ kpahe epanọ a sae rọ wha iruo usiuwoma ota na haro. (Matiu 24:14) Oghẹrẹ nọ a rẹ bọ Egwa Uvie jọ i re wo ohẹriẹ no efa, rekọ aikpobi e rrọ kpatiẹ, yọ ikoko nọ e rẹ jọ Egwa Uvie jọ ru iwuhrẹ i re bu vrẹ ọvo. Evaọ umutho ikpe jọ kẹle na, ma bọ Egwa Uvie ekpokpọ nọ i bu te idu buobu no (a tẹ ghale iẹe, a be bọ isoi evaọ okpẹdẹ), re ahwo nọ a bi kurẹriẹ ziọ ukoko na k’ẹdẹ k’ẹdẹ a sae ruẹ oria jọ gọ. Ẹvẹ onana o be sae rọ lọhọ?—Matiu 19:26.

Okẹ unevaze a be rọ bọ Egwa Uvie na. A re vi unevaze kpobi nọ a ruẹ evaọ etehe nana kpohọ uwou ogha, re a ruẹ ugho bọ Egwa Uvie ekpokpọ kẹ ikoko nọ e gwọlọ hayo wariẹ bọ kẹ ukoko nọ Ọgwa Uvie rai ọ be raha no fikinọ o kri no.

Inievo nọ e fialoma via no eria sa-sa ze nọ a be hwosa kẹ hẹ, ae a be bọ Egwa Uvie na. Evaọ erẹwho buobu, a rehọ Ẹko-Iruiruo Ebabọ Ọgwa Uvie mu. Itu sa-sa erọ inievo nana a rẹ kwa no ukoko ruọ ukoko evaọ orẹwho ovona, tube kpohọ eria nọ i sioma no dede re a fiobọhọ kẹ inievo na bọ Egwa Uvie rai. Evaọ erẹwho efa, a rehọ inievo nọ i wo onaa ziezi mu re a rẹrote iruo ebabọ Egwa Uvie ekpokpọ gbe erọ anwae evaọ ubrotọ nọ a ghale kẹ ae. Ekpako nana nọ e riẹ kpahe iruo ebabọ ziezi na a rẹ kpọ inievo ukoko na kpahe oware nọ o gwọlọ nọ a re ru nọ iruo na e be nyaharo na, yọ ae ọvona a rẹ kpọ inievo efa nọ i wo onaa nọ e fialoma via kẹ iruo na. Dede nọ inievo nọ i wo onaa ebabọ a rẹ fialoma ze kẹ ebabọ Ọgwa Uvie evaọ ubrotọ rai, inievo nọ e rrọ ukoko nọ a be bọ Ọgwa Uvie kẹ na họ enọ e rẹ mae fialoma via. Ẹzi Jihova gbe unevaze nọ idibo riẹ a bi ro ru iruo na, oye enana kpobi e be sae rọ lọhọ.—Olezi 127:1; Ahwo Kọlọsi 3:23.

  • Fikieme ma bi ro se oria egagọ mai Ọgwa Uvie?

  • Eme u bi ru ei lọhọ nọ ma be sae rọ bọ Egwa Uvie evaọ akpọ na soso?