Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 3

Oghẹrẹ Vẹ A rọ Wariẹ Kiẹ Uzẹme Ebaibol na Via?

Oghẹrẹ Vẹ A rọ Wariẹ Kiẹ Uzẹme Ebaibol na Via?

Emọ-Uwuhrẹ Ebaibol, evaọ ikpe 1870

Uwou-Eroro ọsosuọ nọ a kere, evaọ ukpe 1879

Oghẹrẹ nọ Uwou-Eroro Na o rrọ nẹnẹ

Ebaibol ọ ta nọ, Jesu o te whu no, ahwo nọ e te rọ iwuhrẹ erue viẹ ahwo họ a te romavia evaọ udevie Ileleikristi ọsosuọ na. (Iruẹru Ikọ Na 20:29, 30) Ere o ginẹ via. A rehọ iwuhrẹ ahwo egedhọ rọ gua eware nọ Jesu o wuhrẹ, yọ onana u ru nọ Ileleikristi erue e rọ romavia. (2 Timoti 4:3, 4) Ẹvẹ o sai ro mu omai ẹro inọ ma wo otoriẹ oware nọ Ebaibol na o gine wuhrẹ nẹnẹ?

Jihova o rovie uzẹme na via evaọ ẹruoke. Evaọ okenọ u kpemu, Jihova ọ rọ ẹkwoma ọruẹaro riẹ ta inọ evaọ ‘oke urere na, eriariẹ i re ti vihọ.’ (Daniẹl 12:4) Evaọ ukpe 1870, utu osese ahwo jọ nọ e gwọlọ riẹ uzẹme na a tẹ ruẹ nọ eware buobu nọ a be jọ ichọche wuhrẹ i no Ebaibol ze he. Fikiere, a te mu ekiakiẹ họ re a sae riẹ oware nọ Ebaibol na o gine wuhrẹ, yọ Jihova o fi obọ họ kẹ ai wo otoriẹ ikereakere na ziezi.

Ahwo evezi a romatotọ wuhrẹ Ebaibol na. Utu ahwo nana nọ a se Emọ-Uwuhrẹ Ebaibol na a jẹ romatotọ kiẹ Ebaibol na riwi, yọ epọvo na ma bi ru nẹnẹ re. A jẹ kiẹ iwuhrẹ Ebaibol na riwi othotha. Otẹrọnọ a nyaku oria jọ nọ o rrọ gaga, a vẹ gwọlọ oria ofa evaọ Ebaibol na nọ u ru oria ọsosuọ na vẹ. Nọ aikpobi a tẹ rọwo fihọ oware ovona, yọ onana o rọwokugbe oria ofa Ikereakere na, a ve kere iei h’otọ. Fikinọ eria ikereakere na i ru eria efa ikereakere na vẹ, onana u fi obọ họ kẹ ae wariẹ kiẹ uzẹme na via kpahe odẹ Ọghẹnẹ, Uvie riẹ, ẹjiroro riẹ kẹ ahwo-akpọ gbe otọakpọ na, uyero nọ ahwo nọ a whu no a rrọ, gbe ẹruore nọ ọ rrọ kẹ enọ i whu no. Ekiakiẹ nọ a ru u fi obọ họ kẹ ae whaha iruẹru nọ e rọwokugbe Ebaibol ho gbe iwuhrẹ erue.—Jọn 8:31, 32.

Evaọ ukpe 1879, Emọ-Uwuhrẹ Ebaibol na a ruẹ nọ oke u te no nọ a re ro rovie uzẹme na via kẹ akpọ kpobi. Fikiere, a te mu emagazini Uwou-Eroro Na Nọ U Bi Whowho Uvie Jihova họ ekere evaọ ukpe yena, yọ oye ma gbe bi kere rite inẹnẹ na. Obọnana, ma be jọ erẹwho nọ i bu te egba ivẹ gbe ikpe ene (240) ta usiuwoma na evaọ evẹrẹ nọ i bu vi udhusoi akuahrẹ gbe udhuvẹ gbikpe (750). Enẹna iwuhrẹ uzẹme nọ e rrọ Ebaibol na e mai ro dhesẹ oma via vi oke nọ u kpemu.

  • Nọ Kristi o whu no, eme o via kẹ iwuhrẹ uzẹme nọ e rrọ Ebaibol na?

  • Eme o fi obọ họ kẹ omai wariẹ kiẹ uzẹme Ebaibol na via?