Uwhu yọ abọdekọ uzuazọ. Uwhu o wọhọ owezẹ udidi. (Jọn 11:11-14) Iwhuowhu e rẹ sai yo, ruẹ, ta, hayo roro uvumọ oware he. (Ọtausiuwoma Na 9:5, 10) Egagọ erue i wuhrẹ nnọ iwhuowhu i re kpohọ akpọ izi nyai lele esemọ rai rria. Ere Ebaibol na o wuhrẹ hẹ.

Ahwo nọ a whu no a rẹ sai fiobọhọ k’omai hi, yọ a rẹ sae nwa omai oma ha. O rrọ uruemu ahwo re a ru iruẹru ehaa gbe idheidhe nọ a rọwo nọ e te wha evawere se enọ i whu no na. Onana o rẹ dha Ọghẹnẹ eva keme u no ọrue ọ Setan jọ ze. O rẹ sae wha evawere se iwhuowhu na gbe he, keme a kare uzuazọ. Ma rẹ dhozọ hayo gọ iwhuowhu na ha. Ọghẹnẹ ọvo ma rẹ gọ.​—Matiu 4:10.

Iwhuowhu na e te wariẹ rria. Jihova ọ te rọwo iwhuowhu na ziọ uzuazọ evaọ otọakpọ aparadase. Oke oyena o gbẹ rrọ obaro. (Jọn 5:28, 28; Iruẹru Ikọ 24:15) Ọghẹnẹ ọ rẹ sae rọwo ahwo nọ a whu no ze wọhọ epanọ whọ rẹ sae ghinẹ rọwo ohwo no owezẹ ze na.​—Mak 5:22, 23, 41, 42.

Ẹjiroro na inọ ma re whu hu yọ ọrue nọ Setan Ẹdhọ na ọ be vaha. Setan avọ idhivẹri riẹ a bi ru ahwo roro nnọ izi ọ iwhuowhu na e rrọ uzuazọ yọ e rẹ wha ẹyao gbe ebẹbẹ efa ze. Setan ọ be viẹ ahwo họ, ẹsejọ ẹkwoma ewezẹ gbe aruọruẹ. Jihova o mukpahe ahwo nọ a rẹ daoma t’ẹme kẹ iwhuowhu na.​—Iziewariẹ 18:10-12.