Ọwegrẹ Ọghẹnẹ nọ ọ mae rro họ Setan Ẹdhọ na. Omama ẹzi ọ rrọ ọnọ ọ wọso Jihova. Setan ọ gbẹ be ruabọhọ ohọre mukpahe Ọghẹnẹ jẹ be wha ebẹbẹ ilogbo se ahwo-akpọ. Setan yọ ohwo omuomu. Ọtọrue gbe ojihẹ ọ rrọ.​—Jọn 8:44.

Emama ẹzi efa i kuomagbe Setan evaọ ọwọsuọ riẹ mukpahe Ọghẹnẹ. Ebaibol na o se rai idhivẹri. Wọhọ Setan, idhivẹri na yọ ewegrẹ ọ ahwo-akpọ. O rẹ were ae re a nwa ahwo oma. (Matiu 9:32, 33; 12:22) Jihova ọ te raha Setan avọ idhivẹri riẹ no bẹdẹ bẹdẹ. Umutho oke kpẹkpẹe ọvo u kiọkọ nọ a sae rọ wha ẹbẹbẹ se ahwo-akpọ.​—Eviavia 12:12.

Whọ tẹ gwọlọ jọ ogbẹnyusu Ọghẹnẹ, o gba owhẹ họ nnọ whọ rẹ siọ oware nọ Setan ọ gwọlọ nọ who ru ba eruo. Setan avọ idhivẹri na a mukpahe Jihova. Ewegrẹ Ọghẹnẹ a rrọ, yọ a gwọlọ ru owhẹ fihọ ọwegrẹ Ọghẹnẹ re. Whọ rẹ salọ ohwo nọ whọ gwọlọ ru eva were hrọ—Setan hayo Jihova. Whọ tẹ gwọlọ uzuazọ ebẹdẹ bẹdẹ, whọ rẹ salọ eruo oreva Ọghẹnẹ hrọ. Setan o wo ẹghẹ gbe idhere buobu nọ ọ rẹ rọ viẹ ahwo họ. Ọ be viẹ ahwo buobu họ.​—Eviavia 12:9.