Kpohọ eme nọ e riẹ eva

Kpohọ eme nọ e kẹle obọ emuhọ

Isẹri Jihova

Isoko

Kọ Whọ Gwọlọ Riẹ Uzẹme Na?

Kọ Whọ Gwọlọ Riẹ Uzẹme Na?

UZẸME eme? Uzẹme kpahe enọ jọ nọ i wuzou gaga nọ ahwo a nọ no. Ẹsejọhọ who roro kpahe itie enọ nọ e rrọ obotọ na no:

  • Kọ Ọghẹnẹ ọ be ginẹ daezọ mai?
  • Kọ ẹmo gbe uye-oruẹ i ti kuhọ ẹdẹjọ?
  • Eme ọ rẹ via k’omai nọ ma te whu?
  • Kọ ẹruore jọ ọ rrọ kẹ ahwo nọ a whu no?
  • Ẹvẹ mẹ sae rọ lẹ nọ Ọghẹnẹ o je yo olẹ mẹ?
  • Ẹvẹ mẹ sai ro wo evawere evaọ uzuazọ?

Diẹse whọ jẹ gwọlọ iyo kẹ enọ nana? Who te kpohọ iwou-ebe hayo eria nọ a rẹ jọ zẹ ebe, whọ rẹ sae ruẹ ebe buobu nọ a kere fihọ nọ whọ rẹ jọ eva rai ruẹ iyo kẹ enọ itieye na. Dede na, ẹsibuobu ebe na e rẹ rọwokugbe ohwohwo ho. Ebe efa e riẹ nọ o rẹ sae wọhọ nọ i wo iyo kẹ enọ na ẹsiẹsiẹ rekọ u re kri hi, eware nọ a ta na i gbe wiruo ho, a vẹ wariẹ ae kere hayo rọ ebe efa nwene ai.

Rekọ obe jọ o riẹ nọ u wo iyo kẹ enọ obehru na nọ ma rẹ sai fi eva họ. Obe uzẹme o rrọ. Nọ Jesu ọ jẹ lẹ se Ọghẹnẹ, ọ ta nọ: “Ẹme ra uzẹme.” (Jọn 17:17) Ma riẹ Ẹme ọyena nẹnẹ wọhọ Ebaibol Ẹri Na. Nọ who bi se haro na, whọ te ruẹ abọjọ iyo ivevẹ erọ uzẹme nọ Ebaibol na ọ kẹ kpahe enọ obehru na.

Kọ Ọghẹnẹ Ọ Be Ginẹ Daezọ Mai?

Ọzae nọ ọ rrọ udevie ahwo

OWARE NỌ O WHA ONỌ NANA ZE: Ma be rria akpọ nọ ọ vọ avọ evega gbe okienyẹ. Egagọ jọ i re wuhrẹ ahwo nọ uye-oruẹ nọ o rrọ akpọ na yọ oreva Ọghẹnẹ.

OWARE NỌ EBAIBOL NA O WUHRẸ: Ọghẹnẹ ọ rẹ wha eware iyoma ze he. Obe Job 34:10 o ta nọ: “O rẹ bẹbẹ kẹ Ọghẹnẹ re o ru umuomu, otẹ jẹ bẹ kẹ Erumeru nọ o re ro ru oware othọthọ.” Ọghẹnẹ o wo emamọ ẹjiroro kẹ ahwo-akpọ. Oye o soriẹ nọ Jesu ọ rọ ta kẹ omai nọ ma hae lẹ inọ: “Ọsẹ mai nọ ọ rọ obọ odhiwu.…Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:9, 10) Ọghẹnẹ o wo ọdawẹ kẹ omai gaga te epanọ o ro si obọ no Ọmọvo riẹ nọ ọ ghare riẹ obọ thesiwa na re Ọ sai ru ẹjiroro nọ o wo kẹ omai gba.—Jọn 3:16.

Rri Emuhọ 1:26-28; Jemis 1:13; gbe 1 Pita 5:6, 7.

Kọ ẹmo gbe uye-oruẹ i ti kuhọ ẹdẹjọ?

Elakpa-Ẹmo

OWARE NỌ O WHA ONỌ NANA ZE: Ẹmo o bi kpe ahwo gbidi gbidi. Uye-oruẹ u te omai kpobi na omomọvo no.

OWARE NỌ EBAIBOL NA O WUHRẸ: Ọghẹnẹ ọ ya eyaa inọ ọ rẹ te rọ udhedhẹ ziọ akpọ na soso. Evaọ otọ esuo Uvie riẹ, onọ o rrọ egọmeti obọ odhiwu, ahwo a gbe ti “wuhrẹ kpahọ ẹmo-ofio ofa ha.” Ikpoye, a re ti “duwu egbọdọ rai zihe ruọ etọẹkpẹ gbe izuẹ rai zihe ruọ ubru-ebe.” (Aizaya 2:4) Ọghẹnẹ o ti si okienyẹ gbe uye-oruẹ kpobi no otọakpọ. Ebaibol e ta nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae [nọ o kẹre te okienyẹ gbe uye-oruẹ nọ u bi te omai nẹnẹ na] evrẹ no.”—Eviavia 21:3, 4.

Rri Olezi 37:10, 11; 46:9; gbe Maeka 4:1-4.

Eme Ọ rẹ Via k’Omai nọ Ma te Whu?

Oria nọ a re ki ahwo fihọ

OWARE NỌ O WHA ONỌ NANA ZE: Egagọ buobu i bi wuhrẹ ahwo nọ oware jọ o rrọ oma ohwo-akpọ nọ o rẹ gbẹ jọ uzuazọ nọ ohwo o te whu no. Ahwo jọ a wo orọwọ inọ ahwo nọ a whu no a rẹ sae nwa ahwo nọ a rrọ uzuazọ oma hayo inọ Ọghẹnẹ ọ rẹ kẹ irumuomu uye evaọ erae-ehẹle nọ e rẹ to bẹdẹ bẹdẹ.

OWARE NỌ EBAIBOL NA O WUHRẸ: Uzuazọ ohwo u re kuhọ nọ o te whu. Obe Ọtausiwoma Na 9:5 o ta nọ: “Iwhuowhu e riẹ oware ovo ho.” Nọ ahwo nọ a whu no a rẹ sae riẹ oware ovo, wo edada, hayo ru oware ovo ho na, a rẹ sae nwa ahwo nọ a rrọ uzuazọ oma hayo fi obọ họ kẹ ai hi.—Olezi 146:3, 4.

Rri Emuhọ 3:19 gbe Ọtausiwoma Na 9:6, 10.

Kọ ẹruore jọ ọ rrọ kẹ ahwo nọ a whu no?

Ọmọ nọ o bi weri omoni riẹ nọ o whu

OWARE NỌ O WHA ONỌ NANA ZE: Ma gwọlọ jọ uzuazọ, yọ ma gwọlọ reawere uzuazọ kugbe ahwo nọ ma you. Re ma gwọlọ wariẹ ruẹ iyoyou mai nọ i whu no yọ oware nọ o were ohwo kpobi.

OWARE NỌ EBAIBOL NA O WUHRẸ: A te kpare ahwo buobu nọ a whu no ziọ uzuazọ. Jesu ọ ya eyaa nọ: “Enọ e rọ eva [uki ekareghẹhọ] kpobi…a vẹ te nya via.” (Jọn 5:28, 29) Wọhọ epaọ ẹjiroro ọsosuọ nọ Ọghẹnẹ o wo kẹ ahwo-akpọ, ahwo nọ a te kpare zihe ziọ otọakpọ a ti wo uvẹ nọ a te rọ rria otọakpọ aparadase. (Luk 23:43) Ẹruore nana ọ kẹre te omokpokpọ gbe uzuazọ ebẹdẹ bẹdẹ nọ ahwo okiẹrẹe a te reawere riẹ. Ebaibol e ta nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29.

Rri Job 14:14, 15; Luk 7:11-17; gbe Iruẹru 24:15.

Ẹvẹ mẹ sae rọ lẹ nọ Ọghẹnẹ o je yo olẹ mẹ?

Ọzae nọ ọ be lẹ

OWARE NỌ O WHA ONỌ NANA ZE: Enwenọ ahwo egagọ kpobi a rẹ lẹ. Ghele na, ahwo buobu a re roro inọ Ọghẹnẹ o bi yo elẹ rai(hi.

OWARE NỌ EBAIBOL NA O WUHRẸ: Jesu ọ ta kẹ omai nọ ma whaha eme evona nọ a re dhe ẹwẹwariẹ nọ ma tẹ be lẹ. Ọ ta nọ: “Nọ wha tẹ be lẹ wha dhe eme evona ẹwẹwariẹ hẹ.” (Matiu 6:7, NW ) Ma tẹ gwọlọ nọ Ọghẹnẹ ọ gaviezọ kẹ elẹ mai, o gwọlọ nọ ma rẹ lẹ evaọ edhere nọ ọ jẹrehọ. Re ma ruẹsi ru ere, o gwọlọ nọ ma rẹ riẹ oware nọ oreva Ọghẹnẹ o rrọ, kẹsena ma vẹ lẹ rọwokugbe oyena. Obe 1 Jọn 5:14 o ta nọ: ‘Ma tẹ yare oware jọ wọhọ epaọ oreva Ọghẹnẹ, o re yo kẹ omai.’

Rri Olezi 65:2; Jọn 14:6; 16:23, 24; gbe 1 Jọn 3:22.

Ẹvẹ mẹ sai ro wo evawere evaọ uzuazọ?

Aye nọ̣ ọ be gwọlọ evawere ẹkwoma ese Ebaibol na

OWARE NỌ O WHA ONỌ NANA ZE: Ahwo buobu a roro nọ ugho, okpodẹ, hayo erru họ oware nọ o te lẹliẹ ai wo evawere. Fikiere a ve bi le eware eyena—rekọ ukuhọ riẹ evawere na u bi te ai obọ họ.

OWARE NỌ EBAIBOL NA O WUHRẸ: Jesu o dhesẹ oware nọ o rẹ wha evawere ze nọ ọ ta nọ: “Ahwo nọ a wo ẹzi iwhrori, eva e were ae.” (Matiu 5:3) Ma rẹ sai wo uvi evawere nọ ma tẹ be rẹrote ẹgwọlọ mai nọ ọ mai wuzou kpaobọ—isiuru kẹ ẹriẹ uzẹme kpahe Ọghẹnẹ gbe ẹjiroro nọ o wo kẹ omai. Evaọ Ebaibol na ma re jo duku uzẹme yena. Ẹriẹ uzẹme yena o rẹ sai fi obọ họ kẹ omai vuhu oware nọ o ginẹ mai wuzou gbe onọ u wuzou hu. Ma tẹ be kẹ uzẹme Ebaibol na uvẹ re o kpọ iroro-ejẹ gbe owojẹ mai, u re su kpohọ uzuazọ uyero nọ u wo uvi ẹjiroro.—Luk 11:28.

Rri Itẹ 3:5, 6, 13-18 gbe 1 Timoti 6:9, 10.

Eware nọ ma ta ẹme te no na yọ ọdhẹduwu gheghe ọrọ iyo enọ ezeza jọ nọ Ebaibol na ọ kẹ. Kọ whọ gwọlọ iyo kẹ enọ efa? Avro ọ riẹ hẹ, whọ tẹ rrọ usu “ahwo nọ a wo ẹzi iwhrori,” nọ a wo ovuhumuo kẹ ẹgwọlọ abọ-ẹzi rai, whọ te gwọlọ iyo kẹ enọ efa. Ẹsejọhọ who wo enọ efa wọhọ: ‘Otẹrọnọ Ọghẹnẹ ọ be daezọ mai, fikieme ọ rọ kuvẹ kẹ emuemu gbe uye-oruẹ ogaga anwọ ikpe buobu ze na? Ẹvẹ mẹ sai ro ru uzuazọ uviuwou mẹ woma vi enẹ?’ Ebaibol ọ kẹ iyo ivevẹ nọ e rẹ vọ eva kpahe enọ nana gbe efa buobu.

Dede na, ehoo nọ a re ro se Ebaibol na o bi ru ahwo buobu nẹnẹ. A bi rri rie wọhọ obe ulogbo nọ a rẹ sae kaki wo otoriẹ riẹ ẹsejọ họ. Kọ whọ gwọlọ nọ a fi obọ họ kẹ owhẹ kiyo enọ itieye na no Ebaibol ze? Isẹri Jihova a wo eware ivẹ nọ e rẹ sai fi obọ họ kẹ owhẹ.

Orọ ọsosuọ họ, obe na Eme Ebaibol na O Gine Wuhrẹ? A kere obe nana re u fi obọ họ kẹ ahwo nọ a rẹ kaki wo uvẹ hẹ kiẹ iyo ivevẹ erọ Ebaibol na kpahe enọ jọ nọ i wuzou gaga. Oware avivẹ họ, uwuhrẹ ọvọvẹ nọ a rẹ nyaze te rehọ Ebaibol na wuhrẹ kugbe owhẹ. Omọvo Isẹri Jihova nọ ọ be rria kẹle owhẹ, nọ o te, nọ ọ rẹ sae rehọ Ebaibol wuhrẹ omọfa, ọ rẹ sae nya bru owhẹ ze uwou ra hayo oria ofa nọ u kiehọ owhẹ oma, jẹ rehọ omoke jọ wuhrẹ Ebaibol na kugbe owhẹ koka koka. Ima ahwo buobu wariẹ akpọ na họ a wo erere no ọruẹrẹfihotọ nana ze no. Ibuobu ahwo otiọye na a ta no inọ: “Me duku uzẹme na no!”

A rẹ ruẹ oware nọ o ghare vi ere he. Uzẹme Ebaibol na u re siwi omai no igbo erọ ugbẹrọwọ, iwuhrẹ erue, gbe ozodhẹ-iguegue. O rẹ lẹliẹ omai wo ẹruore, evawere, je yeri uzuazọ nọ u wo uvi ẹjiroro. Jesu ọ ta nọ: “Wha rẹ te riẹ uzẹme na, uzẹme na u re ti ru owhai emuyẹ.”—Jọn 8:32.

1. Ọzae nọ o bi wuhrẹ Ebaibol; 2. Aye nọ o bi wuhrẹ Ebaibol