Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 101

Jesu Ọ Nyae Re Emu Evaọ Uwou Saemọn Obọ Bẹtani

Jesu Ọ Nyae Re Emu Evaọ Uwou Saemọn Obọ Bẹtani

MATIU 26:6-13 MAK 14:3-9 JỌN 11:55–12:11

  • JESU O ZIHE KPOBỌ BẸTANI NỌ Ọ KẸLE JERUSALẸM

  • MERI O KU UDẸ NỌ U BI GBO ORE AWERE HỌ UZOU JESU

Nọ Jesu o no Jẹriko, ọ tẹ rọ ovao rri obọ Bẹtani. A te jọ erẹ rai na gadiẹ igbehru evaọ oria nọ u thabọ te emaele 12, yọ edhere na ọ nwani woma tere he. Jẹriko ọ rrọ ukiekpotọ nọ u kpotọ te irula egba eree gbe udhe (820), yọ Bẹtani ọ rrọ ugbehru nọ u kpehru te irula idu ivẹ (2,000). Lazarọs avọ inievo-emetẹ ivẹ riẹ a be rria ẹwho Bẹtani, onọ o rehọ emaele ivẹ thabọ no Jerusalẹm, nọ o rrọ ofẹ ovatha-ọre Ugbehru Olivi.

Ahwo Ju buobu a ziọ Jerusalẹm no rọkẹ ehaa Ọnyavrẹ na. A kake nya re “a ruẹsi ru omarai fo,” otẹrọnọ a rọ obọ te oware nọ u whu hayo oware ofa jọ u ru rai fihọ gbegbe. (Jọn 11:55; Ikelakele 9:6-10) Ejọ evaọ usu enọ e kaki te obei na a kokohọ eva etẹmpol na. A be jọ etẹe ta sọ Jesu ọ te nya ziọ ehaa Ọnyavrẹ na hayo ọ te nyaze he.—Jọn 11:56.

Ahwo a be ta eme sa-sa kpahe Jesu. Isu egagọ na jọ a be gwọlọ epanọ a re ro kru rie re a kpei. A tubẹ ta nọ ohwo kpobi nọ ọ riẹ oria nọ Jesu ọ rrọ ọ nyaze te vuẹ ae “re a ruẹsi kru rie.” (Jọn 11:57) Isu egagọ nana a jẹ gwọlọ epanọ a re ro kpe Jesu okenọ ọ kpare Lazarọs no uwhu ze. (Jọn 11:49-53) Agbẹta nọ ahwo jọ a be rọ vro sọ Jesu ọ te ginẹ ziọ oria nana nọ ahwo buobu a te jọ ruẹ e riẹ na.

Jesu o te Bẹtani evaọ Edisoi-Oka, “edẹ ezeza taure Ehaa Ọnyavrẹ na o te ti” muhọ. (Jọn 12:1) Nọ ọre o te kiediwi no evaọ ẹdẹ yena yọ ẹdẹ ọfa o muhọ no (koyehọ Nisan 8). Oyena u dhesẹ nọ o te obei taure Ẹdijala o te ti te. Ọ hae te sai no Jẹriko ze evaọ Ẹdijala ha, koyehọ owọwọ Edisoi-Oka rite owọwọ Ẹdẹ-Ọmaha, keme uzi ahwo Ju o kuvẹ oyena vievie he. Ẹsejọhọ Jesu o kpobọ uwou amọ Lazarọs wọhọ epanọ ọ be hai ru anwẹdẹ.

Saemọn nọ ọ be rria Bẹtani o zizie Jesu avọ ahwo jọ re a nyaze te re emu evaọ obọ uwou riẹ evaọ owọwọ Ẹdẹ-Ọmaha, yọ Lazarọs ọ jọ usu ahwo na. A se Saemọn ọnọ “ọ jọ ọmoti vẹre,” ẹsejọhọ Jesu họ ọnọ o siwi rie evaọ oke nọ u kpemu. Mata nọ obọ riẹ o rẹ jọ iruo ẹsikpobi na ọ jọ etẹe jẹ gbodibo kẹ ahwo nọ a zizie na. Meri ọ rrọ kugbe Jesu, yọ o ru oware jọ nọ o lẹliẹ ahwo nọ a jọ etẹe jẹ go.

Meri o rovie ololo alabasta, onọ ‘udẹ nọ u re gbo ore awere o rrọ, uvi nard, nọ u te ubro ilita.’ (Jọn 12:3) Udẹ nana o rrọ ghaghae gaga, o ghare te dinariọs egba esa (300), ugho iruo ẹgbukpe soso. Meri o ku udẹ na họ uzou Jesu gbe awọ riẹ, ọ tẹ be rọ eto riẹ ririe awọ Jesu. Ore awere udẹ na o tẹ vọ uwou na kpobi.

Eva e dha ilele na, a tẹ nọ inọ: “Fikieme ọ be rọ raha udẹ na kufiẹ enẹ?” (Mak 14:4) Judas Iskariọt ọ tẹ ta nọ: “Fikieme a gbẹ rọ zẹ udẹ nana dinariọs egba esa ha re a rehọ igho na kẹ  iyogbere?” (Jọn 12:5) Orọnikọ Judas o gine wo ọdawẹ kẹ iyogbere na ha. Oji ọ rrọ, ọ be hai tho igho evaọ ẹkpẹti ugho nọ o bi kru kẹ ilele na.

Jesu ọ tẹ be thothọ Meri, inọ: “Fikieme wha be rọ gwọlọ aye na ẹme? Oware uwoma o ru kẹ omẹ na. Iyogbere na a rrọ kugbe owhai ẹsikpobi, rekọ mẹ te jọ kugbe owhai ẹsikpobi hi. Udẹ nana nọ o kuhọ omẹ uzou na, o ru ei be rọ ruẹrẹ omẹ kpahe kẹ ukio mẹ. Uzẹme mẹ be ta kẹ owhai, oria kpobi nọ a te jọ ta usi uwoma na evaọ akpọ na soso, a te fodẹ oware nọ aye nana o ru na rọ kareghẹhọ iẹe.”—Matiu 26:10-13.

Jesu ọ rria Bẹtani vrẹ okpẹdoke no, yọ ahwo buobu a yo no inọ ọ rrọ ẹwho na. Ahwo Ju buobu a tẹ nya ziọ uwou Saemọn te ruẹ Jesu, yọ a gwọlọ ruẹ Lazarọs re, “ọnọ [Jesu] ọ kpare no uwhu ze na.” (Jọn 12:9) Ilori izerẹ na a tẹ gba ẹgwae epanọ a re ro kpe Jesu gbe Lazarọs no. Isu egagọ na a roro nọ Lazarọs nọ a kpare no uwhu ze na o be lẹliẹ ahwo buobu fi ẹrọwọ họ Jesu. Isu egagọ yena a geva kẹhẹ.