Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 75

Jesu O Dhesẹ Oware nọ O rẹ Kẹ Ohwo Evawere

Jesu O Dhesẹ Oware nọ O rẹ Kẹ Ohwo Evawere

LUK 11:14-36

  • Ọ REHỌ ẸKWOMA “UZIOBỌ ỌGHẸNẸ” LE IDHIVẸRI NO OHWO OMA”

  • EPANỌ OHWO Ọ SAI RO WO UVI EVAWERE

U ri kri hi nọ Jesu ọ rọ wariẹ wuhrẹ ahwo kpahe olẹ, yọ u wo eware efa nọ o wuhrẹ ahwo vrẹ ẹsiẹvo orọnikọ olẹ ọvo ho. Okenọ Jesu o je ru iruo igbunu evaọ Galili, ahwo a jẹ tae raha inọ ogaga osu idhivẹri o bi ro ru eware na. Whaọ, obọnana nọ ọ rrọ obọ Judia na, a be wariẹ ta eme evona kpahe iẹe.

Nọ Jesu o le ẹzi ogbegbe nọ o ru ọzae jọ dienu noi oma, akpọ o gbe ogbotu na unu. Rekọ ahwo nọ a be wọso ẹe na a se oware nọ o ru na gb’oware ovo ho. A tẹ be tae raha wọhọ epanọ a ru evaọ oke nọ u kpemu inọ: “Ogaga Beelzebọb, osu idhivẹri na, o bi ro le idhivẹri na no.” (Luk 11:15) Amọfa nọ a gwọlọ riẹ oghẹrẹ ohwo nọ Jesu ọ rrọ dẹẹ a tẹ be ta nọ jọ o dhesẹ oka jọ kẹ ae no obọ odhiwu ze.

Nọ Jesu o vuhumu nọ ahwo nana a be gwọlọ dawo iẹe, ọ tẹ kẹ ae ọkpọ uyo nọ ọ kẹ enọ e jẹ wọso ẹe evaọ obọ Galili na. Ọ ta nọ uvie kpobi nọ o be wọso omariẹ u re kie, o fibae nọ: “Otẹrọnọ Setan ọ be họre omobọ riẹ, kọ ẹvẹ uvie riẹ o sai ro dikihẹ?” Kẹsena Jesu ọ tẹ ta kẹ ae vevẹ nọ: “Otẹrọnọ ẹkwoma uziobọ Ọghẹnẹ me bi ro le idhivẹri na no, kiyọ Uvie Ọghẹnẹ o ginẹ vrẹ owhai no.”—Luk 11:18-20.

Ẹsejọhọ “uziobọ Ọghẹnẹ” nọ Jesu ọ fodẹ na o kareghẹhọ ahwo nọ a jẹ gaviezọ kẹe na oware jọ nọ o via evaọ oke emọ Izrẹl. Ahwo nọ a jọ uwou Fẹro nọ a ruẹ oware igbunu nọ Mosis o ru a bo nọ: “Onana uziobọ Ọghẹnẹ.” Yọ “uziobọ Ọghẹnẹ” u kere Izi Ikpe fihọ ewẹ ekpala itho ivẹ na. (Ọnyano 8:19; 31:18) Epọvo na re, “uziobọ Ọghẹnẹ,” koyehọ ẹzi ọfuafo na hayo ogaga iruo Ọghẹnẹ họ onọ u bi fiobọhọ kẹ Jesu le izi igbegbe no ahwo oma je siwi enọ e be mọ na. Fikiere, Uvie Ọghẹnẹ o ginẹ vrẹ otu ọwọsuọ nana no, keme Jesu nọ Ọghẹnẹ ọ salọ re ọ jọ Ovie ọrọ Uvie na họ ọnọ ọ be jọ iraro rai ru eware igbunu nana.

Idhivẹri nọ Jesu o bi le no ahwo oma na u dhesẹ nọ ọ ga vi Setan, wọhọ epanọ ọzae nọ ọ rrọ gaga ziezi o re fi ọzae nọ o wo ekwakwa-ẹmo nọ o bi rou ighẹ ovie kparobọ, keme ọ ga vi ei. Jesu ọ tẹ wariẹ kẹ ọtadhesẹ nọ ọ jọ ta kpahe ẹzi ogbegbe nọ o no ọzae jọ oma na. Otẹrọnọ ọzae na o fi eware iwoma họ oria nọ ẹzi ogbegbe na o no na ha, ẹzi ogbegbe na o re zizie ihrẹ efa nọ i yoma vi ei kugbe oma, e vẹ ruọ ọzae na oma, kẹsena uyero ọzae na u ve yoma vi epaọ ọsosuọ. (Matiu 12:22, 25-29, 43-45) Ere o rrọ kẹ orẹwho Izrẹl.

Ẹme Jesu na o te aye jọ nọ ọ be gaviezọ kẹe udu te epanọ o ro bo nọ: “Eva e were aye nọ ọ wha eva ra gbe ivie nọ a rọ kuọ owhẹ!” Eyae ahwo Ju a rẹ gwọlọ jọ oni ọruaro, maero kọ oni Mesaya na. Fikiere aye nana ọ sai roro nọ eva e rẹ were Meri gaga nọ ọ rọ rrọ oni owuhrẹ otiọye. Rekọ Jesu ọ kpọ iroro aye na vi jẹ fodẹ oware nọ o rẹ kẹ ohwo uvi evawere, inọ: “Ijo, ukpoye, eva e were enọ i bi yo ẹme Ọghẹnẹ je bi koko iei!” (Luk 11:27, 28) Jesu ọ re ta ẹdẹvo ho inọ a rẹ rọ orro oghẹrẹsa jọ kẹ Meri. Ukpoye, ohwo nọ ọ be gọ Ọghẹnẹ no eva ze ọye o re wo uvi evawere orọnikọ fiki ikpeware jọ nọ o ru hayo oghẹrẹ ahwo nọ e rrọ uviuwou riẹ hẹ.

Jesu ọ whọku ahwo nọ a jẹ gwọlọ nọ o dhesẹ oka jọ kẹ ae no obọ odhiwu ze na, wọhọ epanọ ọ whọku ahwo evaọ obọ Galili. Ọ ta nọ a te kẹ ae uvumọ oka ha ajokpaọ “oka Jona.” Jona yọ oka rọkẹ ae keme ọ jọ eva eri edẹ esa, ọ tẹ jẹ ta usiuwoma ududu, onọ o lẹliẹ ahwo Nanivi kurẹriẹ. Jesu ọ ta nọ: “Rekọ, rri! ohwo nọ ọ rro vi Jona ọ rrọ etenẹ.” (Luk 11:29-32) Jesu ọ tẹ jẹ rro vi Solomọn, ọnọ ovie-aye obọ Shiba ọ nyaze ti yo eme areghẹ riẹ na.

Jesu o fibae nọ: “Ohwo ọ tẹ rọ ukpẹ tu o re fi ei họ oria nọ u siomano hayo otọ ekete he, rekọ o re fi ei họ ehru adada-ukpẹ.” (Luk 11:33) Ẹsejọhọ otọ  ẹme riẹ na họ, eware nọ o bi wuhrẹ gbe iruo igbunu nọ o bi ru evaọ iraro ahwo nana o wọhọ ukpẹ nọ u bi lo nọ a fihọ oria nọ u siomano. Fikinọ ahwo na a wo emamọ eva kpahe eware ezi nana ha, a wo otoriẹ ẹjiroro nọ Jesu o bi ro ru iruo na ha.

Obọnana Jesu o le ẹzi ogbegbe no ọzae jọ oma na je ru ọzae nana nọ o dienu vẹre na mu ẹme họ ẹta. Onana u te oware nọ u re ru ohwo jiri Ọghẹnẹ jẹ vuẹ amọfa kpahe iruo igbunu Jihova. Fikiere Jesu ọ tẹ vẹvẹ ahwo nọ a be wọso ẹe na unu nọ: “Wha yọroma re elo nọ ọ rrọ oma rai o gbẹ jọ ebi hi. Fikiere, nọ oma ra soso u te bi lo nọ uvumọ abọ riẹ o gbe muebi hi, o re lo wọhọ epaọ okenọ ukpẹ o be kẹ owhẹ elo.”—Luk 11:35, 36.