Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 79

Oware nọ Ọraha Ọ te rọ Ze Evaọ Obaro

Oware nọ Ọraha Ọ te rọ Ze Evaọ Obaro

LUK 13:1-21

  • JESU Ọ REHỌ EWARE OKPẸTU IVẸ JỌ NỌ E VIA RO WUHRẸ

  • JESU O SIWI AYE NỌ O ZULẸ EVAỌ ẸDIJALA

Jesu ọ dawo idhere buobu no re o fiobọhọ kẹ ahwo wo emamọ usu kugbe Ọghẹnẹ. Uvẹ utioye ofa o wariẹ rovie nọ Jesu ọ nwani lele ogbotu nọ o kokohọ aro uwou ohwo Farisi na ta ẹme no.

Ejọ evaọ usu rai a fodẹ oware okpẹtu jọ nọ o via. A ta kpahe “ahwo Galili nọ [ọba Rom nọ a re se Pọntiọs] Pailet o kpe okenọ a je dhe idhe.” (Luk 13:1) Eme họ otọ ẹme rai na?

Ẹsejọhọ ahwo Galili nana yọ enọ a kpe okenọ idu ahwo Ju buobu a je ru ozighi fikinọ Pailet ọ rehọ ugho no ẹkpa etẹmpol na rọ ma eware nọ ame o re ro su ziọ Jerusalẹm. O sae jọnọ ahwo nọ a wuzou nọ a be jọ etẹmpol na ru iruo họ enọ i siobọno ugho na kẹ Pailet. Ẹsejọhọ ahwo nọ a je gbiku na a roro nọ fiki izi ilogbo jọ nọ ahwo Galili nana a raha o soriẹ nọ a ro whu na. Rekọ Jesu ọ rọwo fihọ oyena ha.

Ọ nọ rai nọ: “Kọ wha roro nọ ahwo Galili yena a mae rrọ erahaizi vi ahwo Galili efa kpobi fikinọ oware nana o via kẹ ae?” Uyo nọ Jesu ọ kẹ họ, ijo. Kẹsena ọ tẹ rọ oware okpẹtu nana nọ o via na vẹvẹ ahwo Ju unu, inọ: “Wha gbe kurẹriẹ hẹ, ere ọvona whai kpobi wha ti whu re.” (Luk 13:2, 3) Jesu ọ tẹ jẹ fodẹ oware okpẹtu ofa nọ o wọhọ nọ o via kẹle na, yọ ẹsejọhọ u wobọ kugbe eware nọ Pailet ọ ma na.

Ọ nọ rai nọ: “Ahwo ikpegberee nọ uwou ukpehru Siloam u kie ruru, u je kpe ai no, kọ wha roro nọ ae a mai yoma vi amọfa kpobi nọ a be rria Jerusalẹm?” (Luk 13:4) Ẹsejọhọ ogbotu na o je roro nọ fiki eware iyoma jọ nọ ahwo na a ru a ro whu na. Rekọ Jesu ọ rọwo fihọ onana gbe he. Ọ riẹ nọ eware idudhe e rẹ sae via kẹ ahwo kpobi, yọ oye o soriẹ nọ eware okpẹtu nana e rọ via na. (Ọtausiuwoma Na 9:11) Rekọ u fo nọ ahwo na a re wuhrẹ oware jọ no eware nana nọ e via na ze. Jesu ọ ta nọ: “Wha gbe kurẹriẹ hẹ, whai kpobi wha ti whu, wọhọ epanọ a whu na.” (Luk 13:5) Rekọ, fikieme o bi ro fiẹgba họ ẹme na tere?

Fikinọ o ru iruo odibọgba riẹ thabọ no, ọ rọ ọtadhesẹ ru ẹme na vẹ inọ: “Ọzae jọ ọ kọ ure ifigi họ ọgbọ riẹ, ọ tẹ nyaze be gwọlọ ubi evaọ ehru riẹ rekọ ọ ruẹ hẹ. Ọ tẹ ta kẹ ọruẹrẹ-ọgbọ na nọ, ‘Anwọ ikpe esa na mẹ be rọ nyaze te gwọlọ ubi evaọ ure ifigi nana, rekọ mẹ re ruẹ ubi ovo ho. Koi fihọ otọ! Kọ fikieme o jẹ raha otọ na kufiẹ?’ Ọ tẹ ta kẹe nọ, ‘Olori, nyase iẹe ba ukpe ọvo ofa re mẹ tọe wariẹ jẹ whẹ ẹkpẹ ezuzu fihọ iẹe. O tẹ mọ ubi evaọ obaro, yọ u woma; rekọ o gbẹ mọ họ, who ve koi fihọ otọ.’”—Luk 13:6-9.

O vrẹ ikpe esa no nọ Jesu ọ be rọ daoma fiobọhọ kẹ ahwo Ju re a wo ẹrọwọ. Ghele na, umutho ahwo jọ ọvo a be mọ ibi, nọ e rrọ ilele riẹ. Whaọ, ukpe avene ọ rrọ na evaọ iruo odibọgba riẹ, yọ ọ gbẹ be daoma fiobọhọ kẹ ae. Usiuwoma riẹ gbe ahwo Ju nọ o bi wuhrẹ evaọ Judia gbe Pẹria na, o wọhọ ẹsenọ ọ be tọ ure wariẹ jẹ whẹ ẹkpẹ ezuzu fihọ iẹe. Kọ eme o no rie ze? Umutho ahwo Ju jọ ọvo i  kurẹriẹ. Ibuobu rai a rọwo kurẹriẹ hẹ, fikiere a te raha ae kufiẹ.

Nọ edẹ jọ e ruemu no evaọ Ẹdijala, ibuobu ahwo Ju a tẹ wariẹ dhesẹ via epanọ a kare ẹrọwọ te. Jesu o je wuhrẹ ahwo evaọ uwou-egagọ na. Ọ tẹ ruẹ aye jọ nọ ẹzi ogbegbe o ru zulẹ anwọ ikpe 18. Jesu ọ re ohrọ aye nana, ọ tẹ ta kẹe nọ: “Aye, jọ ẹyao ra na o kpo.” (Luk 13:12) Ọ tẹ rọ obọ kpahe aye na, ẹsiẹvo na o te dikihẹ kpọvi je mu Ọghẹnẹ họ ejiro.

Onana u ru eva dha ọnọ o wuzou evaọ uwou-egagọ na, ọ tẹ ta nọ: “Edẹ ezeza u fo nọ a re ro ru iruo; fikiere wha hae nyaze re o siwi owhai evaọ edẹ yena, orọnikọ evaọ ẹdẹ Ẹdijala ha.” (Luk 13:14) Orọnikọ ọzae nana ọ be vro ho inọ Jesu o wo ogaga nọ o re ro siwi, rekọ ọ be whọku ahwo na fikinọ a nyaze re Jesu o siwi ai evaọ Ẹdijala. Jesu ọ tẹ ta ẹme areghẹ nana inọ: “Whai eviẹwẹ, kọ whai omomọvo ọ gbẹ be hae ra eruẹ hayo eketekete riẹ evaọ Ẹdijala o ve su ei vrẹ nyae da ame? Kọ u gbe fo re a si aye nana nọ ọ rrọ ọmọ Abraham, ọnọ Setan ọ be lahiẹ anwọ ikpe ikpegberee na no igbo nana evaọ ẹdẹ Ẹdijala?”—Luk 13:15, 16.

Oma o vo enọ e be wọso Jesu na fiki eware igbunu nana nọ o bi ru na, rekọ eware igbunu na i ru eva were ogbotu na gaga. Kẹsena Jesu ọ tẹ jọ Judia wariẹ etadhesẹ ivẹ jọ kpahe Uvie na nọ ọ rọ ta ẹme no vẹre okenọ ọ jọ okọ evaọ Abade Galili.—Matiu 13:31-33; Luk 13:18-21.