Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 73

Ohwo Sameria Jọ O Dhesẹ nọ Ọyomariẹ Emamọ Ọrivẹ

Ohwo Sameria Jọ O Dhesẹ nọ Ọyomariẹ Emamọ Ọrivẹ

LUK 10:25-37

  • EPANỌ A RE RO WO UZUAZỌ EBẸDẸ BẸDẸ

  • OHWO SAMERIA NỌ Ọ RRỌ EMAMỌ ỌRIVẸ

Nọ Jesu ọ gbẹ jọ kẹle Jerusalẹm, ahwo Ju sa-sa a jẹ nya bru rie ze. Ejọ e gwọlọ gaviezọ kẹ iwuhrẹ riẹ, rekọ efa e gwọlọ dawo iẹe. Ọjọ evaọ usu rai nọ ọ riẹ Uzi na lafi, ọ nọ Jesu nọ: “Owuhrẹ, eme me re ru re mẹ reuku uzuazọ ebẹdẹ bẹdẹ?”—Luk 10:25.

Jesu o vuhumu nọ orọnikọ ọzae nana ọ be nọ re ọ riẹ hẹ. O wọhọ nọ ọ gwọlọ bẹbẹ Jesu họ ta ẹme jọ nọ ọ rẹ dha ahwo Ju eva. Jesu ọ riẹ nọ oware jọ o rrọ ọzae na eva. Fikiere ọ tẹ rọ areghẹ nọe re o dhesẹ oware nọ o rrọ udu riẹ via.

Jesu ọ nọ riẹ nọ: “Eme a kere fihọ Uzi na? Ẹvẹ who wo otoriẹ Uzi na?” Ọzae na ọ riẹ Uzi na ziezi, fikiere ọ tẹ fodẹ oware nọ Uzi na o ta rọ kuyo na. Ọ ta eme nọ e rrọ obe Iziewariẹ 6:5 gbe Iruo-Izerẹ 19:18, inọ: “‘Whọ rẹ rehọ udu ra kpobi gbe uzuazọ ra kpobi gbe ẹgba ra kpobi gbe iroro ra kpobi ro you Jihova Ọghẹnẹ ra’ je you ‘ọrivẹ ra wọhọ omobọ ra hrọ.’” (Luk 10:26, 27) Kọ uyo onọ na oye?

Jesu ọ ta kẹ ọzae na nọ: “Whọ kuyo gba; gbẹ hai ru onana who ti wo uzuazọ.” Kọ etẹe ẹme na o no kuhọ? Orọnikọ uyo onọ na ọzae na ọ jẹ ginẹ gwọlọ họ rekọ ọ gwọlọ “dhesẹ nọ o kiẹrẹe,” re Jesu ọ vuẹe nọ eriwo riẹ ọ gba gbe nọ oghẹrẹ nọ o bi yerikugbe amọfa o rrọ ziezi. Fikiere ọ tẹ nọ Jesu nọ: “Ono ọ ginẹ rrọ ọrivẹ mẹ?” (Luk 10:28, 29) Onọ yena nọ o wọhọ onọ olọlọhọ na, yọ onọ ulogbo. Fikieme?

Ahwo Ju a re roro nọ ohwo Ju ibe rai nọ o bi koko izi na ọvo họ “ọrivẹ” rai, yọ a rẹ sai roro nọ ẹme nọ ọ rrọ obe Iruo-Izerẹ 19:18 na o rọwokugbe oyena. Evaọ uzẹme, ahwo Ju a jẹ hae rehọ iẹe nọ “u fo ho” re a kuomagbe enọ e rrọ ahwo Ju hu. (Iruẹru Ikọ 10:28) Fikiere ọzae na gbe ẹsejọhọ ilele Jesu jọ a je roro nọ a kiẹrẹe otẹrọnọ a bi lele ahwo Ju efa riẹ yeri. Rekọ a rẹ sai yerikugbe ohwo nọ ọ rrọ ohwo Ju hu epanọ u je rai, keme ohwo yena yọ “ọrivẹ” hẹ.

Ẹvẹ Jesu ọ te rọ kpọ eriwo ọzae nana vi ababọ eva nọ o re ru dha ọzae na gbe ahwo Ju efa? O gbiku jọ kẹ ae nọ: “Ọzae jọ o je no obọ Jerusalẹm ziọ otọ bi kpohọ Jẹriko o te kie ruọ abọ igbulegbu nọ i mi rie eware kpobi kuhọ enwenọ ẹbẹba, a te kpei kuhọ ẹmẹwẹ, a tẹ nyase iẹe ba.” Jesu ọ ta haro nọ: “Whaọ, ozerẹ jọ ọ jẹ nya edhere yena ziọ otọ, rekọ nọ ọ ruẹ e riẹ, ọ tẹ nya abọdekọ edhere na vrẹ. Epọvo na re, nọ ohwo Livai jọ o te oria na nọ ọ ruẹ e riẹ, ọ tẹ nya abọdekọ edhere na vrẹ. Rekọ ohwo Sameria jọ nọ ọ jẹ rehọ edhere na kpohọ erẹ ọ tẹ nya ku ei, nọ ọ ruẹ e riẹ, ohrọ riẹ o tẹ riẹe.”—Luk 10:30-33.

Ọzae nọ Jesu o gbiku nana kẹ na ọ riẹ nọ izerẹ gbe ahwo Livai buobu nọ i re ru iruo evaọ etẹmpol na a be rria obọ Jẹriko. Nọ a te bi no etẹmpol na kpo, a rẹ nya emaele 14. Edhere na o yoma gaga, keme igbulegbu e rẹ jariẹ. Otẹrọnọ ozerẹ hayo ohwo Livai ọ nyaku ohwo Ju ibe rai nọ ọ rrọ uye, kọ o gbe ti fiobọhọ kẹe? Evaọ iku Jesu na, imava nana a ru ere he. Ohwo Sameria ọye o fiobọhọ kẹe, enọ ahwo Ju a re ru oware ovo kugbe he.—Jọn 8:48.

Ẹvẹ ohwo Sameria na o ro fiobọhọ kẹ ohwo Ju nọ a kpe nwa oma na? Jesu o gbiku na haro nọ: “Ọ tẹ nya tei oma o te ku ewhri gbe udi họ emela riẹ jẹ rehọ emehọ variẹ ae. Ọ tẹ wọe fihọ ehru eketekete riẹ ọ tẹ rehọ iẹe ziọ uwou erara, ọ tẹ rẹrotei. Okiokiọ riẹ, ọ tẹ rehọ dinariọs ivẹ rọ kẹ ọnọ ọ be rẹrote uwou erara na, ọ tẹ ta kẹe nọ: ‘Rẹrotei, yọ ugho ofa kpobi nọ whọ te raha, mẹ te hwae kẹ owhẹ nọ me te zihe ze.’”—Luk 10:34, 35.

Nọ Jesu, Owuhrẹ Ologbo na o gbiku na re no, ọ tẹ nọ ọzae na nọ: “Ọvẹ evaọ usu imasa na  who roro nọ o ru omariẹ ọrivẹ kẹ ọzae nọ o kie ruọ abọ igbulegbu na?” Ẹsejọhọ, ọzae na ọ gwọlọ ta nọ “ohwo Sameria” na ha, fikiere ọ tẹ ta nọ: “Ọnọ o dhesẹ ohrọ-oriọ kẹe na.” Jesu ọ tẹ ta vevẹ oware nọ ọ gwọlọ nọ a wuhrẹ no iku na ze, inọ: “Nya, re who ru epọvo na re.”—Luk 10:36, 37.

Onaa nana nọ Jesu o ro wuhrẹ na, u kiehọ kẹhẹ. O hae jọnọ Jesu ọ ta kẹe nọ enọ e rrọ ahwo Ju hu yọ erivẹ riẹ re, kọ ọzae nana gbe ahwo Ju efa nọ a jọ etẹe a hae te rọwo onana? Vievie. Rekọ fikinọ o gbiku nọ ahwo nọ a be gaviezọ kẹe a rẹ sai wo otoriẹ riẹ lọlọhọ, ahwo a tẹ ruẹ uyo onọ nọ ọzae na ọ nọ na inọ, “Ono ọ ginẹ rrọ ọrivẹ mẹ?” emamọ ọrivẹ họ ohwo nọ o you amọfa je bi ru ewoma kẹ ae wọhọ epanọ Ebaibol ọ ta nọ ma ru.