JỌN 8:37-59

  • AHWO JU A TA NỌ ABRAHAM HỌ ỌSẸ RAI

  • TAURE A TE TI YẸ ABRAHAM YỌ JESU Ọ RRỌ NO

Jesu ọ gbẹ rrọ Jerusalẹm rọkẹ Ehaa Iwou-Udhu (hayo Iwou-Owhre) na, bi wuhrẹ ahwo obọdẹ eware jọ kpahe Ọghẹnẹ. Ahwo Ju jọ nọ a jọ etẹe a ta kẹe nọ: “Mai yọ emọ Abraham, yọ ma re jọ erigbo kẹ ohwo ọvo ẹdẹvo ho.” Jesu ọ tẹ kpahe kẹ ae nọ: “Mẹ riẹ nọ whai emọ Abraham. Rekọ wha be gwọlọ omẹ kpe, keme wha rọwo iwuhrẹ mẹ hẹ. Mẹ be ta eware nọ mẹ ruẹ okenọ mẹ jọ kugbe Ọsẹ mẹ, rekọ wha bi ru eware nọ wha yo mi ọsẹ rai.”—Jọn 8:33, 37, 38.

Ẹme Jesu na ọ rrọ vevẹ, ọ be ta nọ Ọsẹ riẹ avọ ọrai ọvona ha. Fikinọ ahwo Ju na a wo otoriẹ ẹme Jesu na ha a tẹ wariẹ ta nọ: “Abraham họ ọsẹ mai.” (Jọn 8:39; Aizaya 41:8) Uyẹ Abraham a gine no ze. Fikiere a bi roro nọ a wo ẹrọwọ wọhọ Abraham, ogbẹnyusu Ọghẹnẹ na.

Rekọ uyo nọ Jesu ọ kẹ rai u gbe rai unu, inọ: “Wha hae rrọ emọ Abraham, wha hai ti ru iruo Abraham.” Evaọ uzẹme, emamọ ọmọ ọ rẹ rọ aro kele ọsẹ riẹ. Jesu ọ ta haro nọ: “Rekọ wha be gwọlọ omẹ kpe, mẹ nọ mẹ ta uzẹme nọ me yo mi Ọghẹnẹ kẹ owhai. Abraham o ru ere he.” Kẹsena Jesu ọ tẹ ta ẹme ọfa nọ u ru akpọ gbe ai unu, inọ: “Iruo ọsẹ rai wha bi ru.”—Jọn 8:39-41.

Ahwo Ju na a re riẹ ohwo nọ Jesu ọ be ta kpahe na ghele he. A be ta nọ ae yọ emọ Abraham dẹẹ, inọ: “Ọfariẹ-ogbe a ro yẹ omai hi; Ọsẹ ọvo ma wo, Ọghẹnẹ.” Kọ ginọ uzẹme inọ Ọghẹnẹ họ ọsẹ rai? Jesu ọ ta kẹ ae nọ: “O hae jọnọ Ọghẹnẹ họ Ọsẹ rai, wha hai ti you omẹ, keme obọ Ọghẹnẹ me no ze ziọ etenẹ. Yọ udu obọmẹ mẹ rọ nyaze he, rekọ Ọye o vi omẹ ze.” Kẹsena Jesu ọ tẹ nọ onọ jọ nọ ọye ọvo ọ kuyo riẹ inọ: “Eme wha gbe bi ro wo otoriẹ oware nọ mẹ be ta na ha? Fikinọ wha be gaviezọ kẹ ẹme mẹ hẹ.”—Jọn 8:41-43.

Jesu ọ rọ areghẹ vuẹ ae bẹ oware nọ u ti noi ze fikinọ a se riẹ. Kẹsena ọ tẹ vuẹ ae vevẹ nọ: “Obọ ọsẹ rai Ẹdhọ wha no ze, yọ o rẹ were owhai re wha ru ẹgwọlọ ọsẹ rai.” Oghẹrẹ ohwo vẹ ọsẹ rai na ọ rrọ? Jesu o dhesẹ i rie vevẹ nọ: “Ọyena ọ rrọ ojihẹ anwẹnọ o ro muhọ, yọ o dikihẹ ga evaọ uzẹme na ha.” Jesu o fibae nọ: “Ọnọ ọ rrọ ọrọ Ọghẹnẹ ọ rẹ gaviezọ kẹ eme Ọghẹnẹ. Oyejabọ nọ wha gbẹ be rọ gaviezọ họ na, keme wha rrọ erọ Ọghẹnẹ hẹ.”—Jọn 8:44, 47.

Eme yena e dha ahwo Ju na eva gaga, a tẹ ta nọ: “Kọ ma gbẹ ta gba inọ, ‘Whẹ yọ ohwo Sameria gbe nọ idhivẹri ọ rrọ owhẹ oma’?” “Ohwo Sameria” nọ a se Jesu na u dhesẹ nọ a se rie gb’ohwo ho. Rekọ Jesu ọ daezọ oyena ha, ọ tẹ ta kẹ ae nọ: “Idhivẹri ọ rrọ omẹ oma ha, rekọ mẹ be rọ ọghọ kẹ Ọsẹ mẹ, yọ wha bi rri omẹ vo.” Jesu ọ tẹ ya eyaa jọ ro dhesẹ nọ ẹme nọ ọ rrọ otọ na okpẹme, inọ: “Uzẹme uzẹme mẹ be ta kẹ owhai, ohwo kpobi nọ o koko eme mẹ o ti whu vievie he.” Orọnikọ Jesu ọ be ta nọ ikọ riẹ gbe amọfa nọ a bi lele iei a ti whu hu hu. Ukpoye, a ti whu “uwhu avọ ivẹ na” vievie he, koyehọ uwhu ebẹdẹ bẹdẹ nọ ohwo ọ rẹ jọ wo ẹruore ẹkparomatha ha na.—Jọn 8:48-51; Eviavia 21:8.

Rekọ ahwo Ju na a roro nọ Jesu ọ be ta nọ enọ i koko eme riẹ a ti gine whu hu, fikiere a tẹ ta nọ: “U mu omai ẹro no inọ idhivẹri ọ rrọ owhẹ oma. Abraham o whu, ere eruẹaro na re, rekọ whọ be ta nọ, ‘Ọnọ o koko eme mẹ, o ti whu vievie he.’ Kọ whọ rro vi Abraham ọsẹ mai, ọnọ o whu? . . . Ono whọ be ta nọ whọ rrọ?”—Jọn 8:52, 53.

O rrọ vevẹ nọ Jesu ọ be ta nọ ọye họ Mesaya na. Rekọ, ukpenọ ọ rẹ kuyo onọ nọ a nọ riẹ kpahe oghẹrẹ ohwo nọ ọ rrọ na ovavo, ọ tẹ ta nọ: “Mẹ tẹ kẹ omobọ mẹ oruaro, yọ oruaro mẹ u fioka ha. Ọsẹ mẹ họ ọnọ ọ be kẹ omẹ oruaro, ọnọ wha be ta nọ ọye họ Ọghẹnẹ rai na. Ghele na wha riẹ riẹ hẹ, rekọ mẹ riẹ riẹ. Yọ mẹ tẹ ta nọ mẹ riẹ riẹ hẹ, mẹ vẹ te jọ wọhọ owhai, ọtọrue.”—Jọn 8:54, 55.

 Jesu ọ tẹ wariẹ ta kpahe ọsẹ-ode rai nọ o wo ẹrọwọ na inọ: “Abraham ọsẹ rai ọ ghọghọ gaga fiki ẹdẹ mẹ nọ o je rẹro nọ ọ te ruẹ, yọ ọ ruẹ e riẹ ọ tẹ ghọghọ.” Abraham o je rẹro Mesaya na keme ọ rọwo eyaa Ọghẹnẹ. Ahwo Ju na a rọwo ẹme Jesu na ha, a tẹ ta kẹe nọ: “Whọ re kpako te ikpe udhuvẹ gbikpe he, whọ tẹ be ta nọ whọ ruẹ Abraham?” Jesu ọ tẹ ta kẹ ae nọ: “Uzẹme uzẹme mẹ be ta kẹ owhai, taure a te ti yẹ Abraham yọ mẹ rrọ no.” Ọ be ta kpahe oke nọ ọ rọ jọ ẹnjẹle evaọ obọ odhiwu taure ọ tẹ te ziọ otọakpọ.—Jọn 8:56-58.

Ẹme nọ Jesu ọ ta na inọ ọ rrọ no taure a te ti yẹ Abraham na ọ dha ahwo Ju na eva te epanọ a rọ tọlọ itho inọ a re fi ei. Rekọ Jesu ọ va rai abọ.