Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 72

Jesu O Vi Ilele 70 Nyae Ta Usiuwoma

Jesu O Vi Ilele 70 Nyae Ta Usiuwoma

LUK 10:1-24

  • JESU Ọ SALỌ ILELE 70 JE VI AI KPOHỌ USIUWOMA OTA

O jọ ubrobọ urere ukpe 32 C.E., yọ anwọ ikpe esa ena nọ Jesu ọ rọ họ-ame na. U ri kri hi nọ avọ ilele riẹ a ro kpobọ Jerusalẹm nyai ru Ehaa Iwou-Udhu na. Yọ o wọhọ nọ oria nọ a rrọ obọnana u thabọ no Jerusalẹm hu. (Luk 10:38; Jọn 11:1) Evaọ uzẹme, ẹkwotọ Judia gbe ubrotọ Pẹria nọ o rrọ abọdekọ Ethẹ Jọdan Jesu ọ jẹ mae rria evaọ emerae ezeza urere riẹ evaọ otọakpọ. O gwọlọ nọ a rẹ jọ eria nana ta usiuwoma re.

Evaọ oke nọ u kpemu, nọ a ru ehaa Ọnyavrẹ ọrọ ukpe 30 C.E. no, Jesu ọ rehọ emerae jọ ta usiuwoma evaọ Judia gbe Sameria soso. Kẹsena evaọ etoke ehaa Ọnyavrẹ ọrọ ukpe 31 C.E., ahwo Ju nọ a rrọ Jerusalẹm a tẹ jẹ gwọlọ iẹe kpe. Evaọ ẹgbukpe gbe emerae ezeza nọ i lele i rie, ẹkwotọ Galili Jesu ọ jẹ mae jọ ta usiuwoma. Evaọ oke yena, ahwo buobu a zihe ruọ ilele riẹ. Jesu ọ jọ Galili wuhrẹ ikọ riẹ, kẹsena o te vi ai nyae ta usiuwoma jẹ ta kẹ ae nọ: “Wha whowho inọ: ‘Uvie odhiwu o kẹle no.’” (Matiu 10:5-7) Obọnana, o bi ti vi ahwo buobu nyae ta usiuwoma evaọ Judia.

Re a mu usi-uwhowho nana họ, Jesu ọ salọ ilele 70, o te vi ai imimava nyae ta usiuwoma. Fikiere itu 35 o vi nyae ta usiuwoma Uvie na evaọ ẹkwotọ nana nọ “ivuẹvu [riẹ] e rrọ ruaro, rekọ iruiruo na e rrọ kakao” na. (Luk 10:2) Jesu o vi rai karo kpohọ eria nọ ọyomariẹ ọ te nya. Ọ ta kẹ ae nọ a re siwi enọ e be mọ je whowho ovuẹ nọ o bi whowho anwẹdẹ na.

Orọnikọ iwou-egagọ na Jesu o vi ilele na kpohọ nyae ta usiuwoma ha. Jesu ọ vuẹ rai nọ a kpohọ iwou ahwo. Ọ ta kẹ ae nọ: “Oria kpobi nọ wha jọ ruọ evaọ uwou, wha kake ta nọ: ‘Jọ udhedhẹ u te uwou nana.’ Ohwo nọ ọ gwọlọ udhedhẹ ọ tẹ rrọ etẹe, udhedhẹ rai u ti tei.” Ovuẹ vẹ a re whowho? Jesu ọ ta nọ: “Ta kẹ ae nọ: ‘Uvie Ọghẹnẹ o kẹle owhai oma no.’”—Luk 10:5-9.

Ehrẹ nọ Jesu ọ kẹ ilele 70 na e wọhọ enọ ọ kẹ ikọ 12 riẹ okenọ o vi ai kpohọ usiuwoma ota oware wọhọ ẹgbukpe nọ ọ vrẹ. Ọ vẹvẹ e rae unu nọ orọnikọ ohwo kpobi o ti dede ai rehọ họ. Rekọ usiuwoma ota rai na u ti fiobọhọ kẹ enọ i wo evezi dede Jesu olori na rehọ jẹ gaviezọ kẹe nọ ọ tẹ nyaze.

U kri hi, itu 35 nọ Jesu o vi nyae ta usiuwoma na a te zihe bru rie ze. A tẹ be ta kẹe avọ oghọghọ nọ: “Olori, makọ idhivẹri dede i yoẹme kẹ omai nọ ma se odẹ ra.” Emamọ iyẹrẹ nana e were Jesu gaga, ọ tẹ ta nọ: “Mẹ be ruẹ Setan nọ o kie no wọhọ elo egbrara nọ u no ehru ze. Rri! Mẹ kẹ owhai ogaga no nọ wha re ro thihi eraomuomu gbe ewhọhro-imuomu nyaotọ.”—Luk 10:17-19.

Jesu ọ ta nọ ilele riẹ a ti thihi eraomuomu gbe  ewhọhro-imuomu nyaotọ, onọ u dhesẹ nọ a ti fi ezadhe kpobi kparobọ. U te no ere no, a wo imuẹro nọ evaọ obaro, Setan o ti kie no obọ odhiwu ze. Jesu o te je fiobọhọ kẹ ilele 70 riẹ na vuhu oware nọ o mai wuzou mu. Ọ ta nọ: “Wha du ghọghọ fikinọ idhivẹri i yoẹme kẹ owhai hi, rekọ wha ghọghọ fikinọ a kere edẹ rai fihọ otọ no evaọ obọ odhiwu.”—Luk 10:20.

Eva e were Jesu gaga te epanọ ọ rọ jọ ẹgbede jiri Ọsẹ riẹ nọ ọ be rọ rehọ idibo riẹ ru iruo igbunu itiena. Jesu ọ tẹ ta kẹ ilele riẹ nọ: “Eva e were ahwo nọ ibiaro rai e be ruẹ eware nọ wha be ruẹ na. Keme mẹ be ta kẹ owhai nọ, eruẹaro gbe ivie buobu a jẹ gwọlọ ruẹ eware nọ wha be ruẹ na rekọ a ruẹ e rai hi, jẹ gwọlọ yo eme nọ wha bi yo na rekọ a yo rai hi.”—Luk 10:23, 24.