Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 70

Jesu O Siwi Ọzae Jọ nọ A Yẹ Tuaro

Jesu O Siwi Ọzae Jọ nọ A Yẹ Tuaro

JỌN 9:1-18

  • A SIWI ỌYAREWARE JỌ NỌ A YẸ TUARO

Jesu ọ gbẹ rrọ Jerusalẹm evaọ Ẹdijala. Nọ ọyomariẹ avọ ilele riẹ a be nya evaọ ẹwho na, a tẹ ruẹ ọyareware jọ nọ a yẹ tuaro. Ilele riẹ a tẹ nọe nọ: “Owuhrẹ, ono ọ raha uzi, ọzae nana manikọ ọsẹgboni riẹ, nọ o soriẹ ze nọ a ro yẹi tuaro?”—Jọn 9:2.

Orọnikọ ilele na a bi roro nọ ọzae nana ọ jẹ rria no vẹre taure a te ti yẹi hi, rekọ u bi gbe ai unu sọ ohwo ọ rẹ sae raha uzi nọ ọ tẹ rrọ edhede oni riẹ. Jesu ọ kpahe kẹ ae nọ: “Orọnikọ ọzae nana hayo ọsẹgboni riẹ a raha uzi hi, rekọ re a rọ ẹkwoma riẹ dhesẹ iruo Ọghẹnẹ via.” (Jọn 9:3) Fikiere, orọnikọ fiki uzi jọ dẹẹ nọ ọzae na hayo ọsẹgboni riẹ a raha jabọ nọ a ro yẹi tuaro na ha. Ukpoye, uzioraha Adamu o wha riẹ ze nọ ahwo kpobi a gbẹ rọ gba ha, nọ ahwo a be rọ mọ oghẹrẹ eyao sa-sa, wọhọ aruotuo. Rekọ aruotuo ọzae na u ti ru nọ Jesu o ti ro dhesẹ iruo igbunu Ọghẹnẹ via, wọhọ epanọ ọ be hai ru evaọ eyao sa-sa nọ ọ be hai siwi na.

Jesu o dhesẹ nọ a re ru iruo Ọghẹnẹ nana kpata kpata. Ọ ta nọ: “Ma re ru iruo Ọnọ o vi omẹ ze hrọ nọ o gbẹ rrọ oke uvo na; aso ọ be tha nọ ohwo ọvo ọ gbẹ sai ru iruo ho. Nọ mẹ rrọ akpọ na, mẹ họ elo akpọ na.” (Jọn 9:4, 5) Rekọ kẹle na Jesu o ti whu, yọ uki o te wọhọ aso kẹe nọ ọ te sae jọ ru oware ovo ho. Obọnana nọ ọ rrọ akpọ na, ọye họ elo rọkẹ akpọ na.

Kọ Jesu o ti siwi ọzae na? Otẹrọnọ o ti siwi ei, ẹvẹ o ti ro ru ei? Jesu o nwo eya fihọ otọ, o te gbei kugbe ẹkpẹ. Kẹsena ọ tẹ rehọ iẹe wholo ibiaro ọzae na jẹ ta kẹe nọ: “Nyae wozẹ ovao ra evaọ ẹtẹre Siloam.” (Jọn 9:7) Ọzae na o te gine ru ere. Ibiaro riẹ i te rovie. Dai roro oghọghọ nọ o da ọzae na oma fia nọ ọ rọ ruẹ ude evaọ oke ọsosuọ evaọ uzuazọ riẹ.

Akpọ o gbe ahwo okegbe riẹ gbe ahwo nọ a riẹ nọ o tuaro vẹre unu. A tẹ be nọ nọ: “Kọ ogbẹrọnọ ọzae nana ọ jẹ hae keria yare eware na?” Ahwo jọ a tẹ ta nọ: “Ọye.” U mu amọfa ẹro ho, a tẹ ta nọ: “Ọye he, rekọ o tho rie.” Ọzae na ọ tẹ be ta nọ: “Mẹ họ ọye.”—Jọn 9:8, 9.

Kẹsena a tẹ nọe nọ: “Kọ ẹvẹ ibiaro ra i ro rovie?” Ọ tẹ kuyo nọ: “Ọzae nọ a re se Jesu na ọye o gbe eya kugbe ẹkpẹ ro wholo ibiaro mẹ ọ tẹ ta kẹ omẹ nọ, ‘Nyae wozẹ ovao ra evaọ Siloam.’ Mẹ tẹ nyae wozẹ ovao mẹ, me te mu ude họ ẹruẹ.” A tẹ nọe nọ: “Diẹse ọzae na ọ rrọ?” Ọ tẹ ta kẹ ae nọ: “Mẹ riẹ hẹ.”—Jọn 9:10-12.

Ahwo na a tẹ rehọ ọzae na se otu Farisi na, keme otu Farisi na a gwọlọ riẹ oghẹrẹ nọ ibiaro ọzae na i ro rovie. Ọ tẹ ta kẹ ae nọ: “O gbe eya kugbe ẹkpẹ ọ tẹ rehọ iẹe wholo ibiaro mẹ, mẹ tẹ nyae wozẹ ovao mẹ, me te mu ude họ ẹruẹ.” U fo nọ otu Farisi na a re lele ọyareware ọnana nọ a siwi na ghọghọ. Ukpoye a tẹ be ta Jesu  raha inọ: “Ọzae nana yọ ohwo Ọghẹnẹ hẹ, keme o bi koko Ẹdijala ha.” Ahwo jọ a tẹ be ta nọ: “Ẹvẹ ohwo nọ ọ rrọ ọrahauzi ọ sai ro ru oware igbunu utioye?” (Jọn 9:15, 16) Fikiere ohẹriẹ o tẹ jọ udevie rai.

Fikinọ a rọwo oware ovona ha, a tẹ nọ ọzae nọ ibiaro riẹ i rovie no na nọ: “Eme whọ rẹ sae ta kpahe iẹe nọ orọnọ ibiaro ra o rovie na?” Ọzae na o wo avro ọvo kpahe oghẹrẹ ohwo nọ Jesu ọ rrọ họ, ọ tẹ ta nọ: “Ọruẹaro ọ rrọ.”—Jọn 9:17.

Ahwo Ju na a rọwo onana ghele he. Ẹsejọhọ a bi roro nọ Jesu avọ ọzae nana a ta riẹ mu no re a rọ ere viẹ ahwo họ. A tẹ ta nọ re a riẹ uzẹme ẹme na, a re tube se ọsẹgboni ọzae na ze re a nọ ae sọ ọmọzae rai o gine tuaro vẹre.