JỌN 10:22-42

  • “MẸ AVỌ ỌSẸ NA ỌVO”

  • JESU Ọ TA NỌ ỌYE HỌ ỌGHẸNẸ HẸ

Jesu ọ ziọ Jerusalẹm kẹ Ehaa Eromudhe (hayo Hanuka). A rẹ rọ ehaa nana kareghẹhọ okenọ a rọ wariẹ rọ etẹmpol na mudhe. Bu vrẹ ikpe udhusoi nọ i kpemu, ovie Siria nọ a re se Antiochus IV Epiphanes ọ bọ agbada-idhe fihọ oria nọ agbada-idhe nọ a je ro dhe idhe kẹ Ọghẹnẹ o jọ evaọ etẹmpol na. Uwhremu na, emezae ozerẹ ohwo Ju jọ, a tẹ wariẹ wo Jerusalẹm t’obọ jẹ wariẹ rehọ etẹmpol na mudhe kẹ Jihova. Anwọ oke yena ze, a te mu ehaa Eromudhe na họ eru evaọ edẹ 25 amara Kislẹv kukpe kukpe, onọ u re kie fihọ urere amara Akpegbọvo rite emuhọ Akpegbivẹ.

Etoke nana o jọ oke ekpahe. Jesu ọ be nya ogebara Solomọn evaọ etẹmpol na. Ahwo Ju a tẹ wariẹe họ evaọ etẹe, jẹ be nọe nọ: “Ẹvẹ whọ rẹ rọ omai hẹrẹ kri te re whọ tẹ ta uzẹme na kẹ omai? Otẹrọnọ whẹ họ Kristi na, ta kẹ omai vevẹ.” (Jọn 10:22-24) Kọ didi uyo Jesu ọ kẹ rai? Ọ ta nọ: “Mẹ ta kẹ owhai no, rekọ wha rọwo ho.” Jesu ọ re ta kẹ ae gbiae ẹdẹvo ho inọ ọye họ Kristi na, wọhọ epanọ ọ vuẹ aye Sameria jọ evaọ akotọ ozae na. (Jọn 4:25, 26) Rekọ ọ rehọ oghẹrẹ jọ vuẹ ai no vẹre, inọ: “Uzẹme uzẹme mẹ be ta kẹ owhai, taure a te ti yẹ Abraham yọ mẹ rrọ no.”—Jọn 8:58.

Jesu ọ gwọlọ nọ ahwo na ọvo a rehọ eware nọ o bi ru wawọ enọ a ruẹaro riẹ inọ Kristi na o ti ru re a rọ ere riẹ nọ ọye họ Kristi na. Oye o wha riẹ ze nọ ọ jẹ hae rọ vuẹ ilele riẹ nọ a ta kẹ ohwo ọvo ho inọ ọye họ Mesaya na. Rekọ evaọ onana, ọ tẹ vuẹ ahwo Ju na vevẹ nọ: “Iruo nọ mẹ be rọ odẹ Ọsẹ mẹ ru, enana i bi se isẹri kpahe omẹ. Rekọ wha be rọwo ho.”—Jọn 10:25, 26.

Fikieme a gbẹ rọ rọwo ho inọ Jesu họ Kristi na? Ọ ta kẹ ae nọ: “Wha be rọwo ho, keme wha rrọ igodẹ mẹ hẹ. Igodẹ mẹ e rẹ gaviezọ kẹ urru mẹ, mẹ riẹ rai, yọ a re lele omẹ. Mẹ rẹ kẹ ae uzuazọ ebẹdẹ bẹdẹ, yọ a te raha ae vievie he, yọ ohwo ọvo o ti vo ae rehọ no obọ mẹ hẹ. Enọ Ọsẹ mẹ ọ kẹ omẹ na e ghare vi eware efa kpobi.” Kẹsena, Jesu ọ tẹ vuẹ ae epanọ usu riẹ avọ Ọsẹ riẹ o kpekpe te, inọ: “Mẹ avọ Ọsẹ na ọvo.” (Jọn 10:26-30) Jesu ọ rrọ obọ otọakpọ obonẹ, yọ Ọsẹ riẹ ọ rrọ obọ odhiwu, fikiere ẹme riẹ na o sai dhesẹ nọ aimava ginọ omọvo na ha. Ukpoye, a rrọ ọvo evaọ ẹjiroro, koyehọ a wo okugbe.

Ẹme Jesu na ọ dha ahwo Ju na eva te epanọ a rọ tọlọ itho nọ a re fi ei kpe. Rekọ onana o lẹliẹ ozọ mu ei hi. Ọ ta nọ: “Mẹ jọ iraro rai ru iruo iwoma buobu nọ Ọsẹ na o vi omẹ ze ti ru. Ovẹ evaọ iruo nana wha be rọ fiki riẹ gwọlọ rọ itho fi omẹ na?” Ahwo Ju na a tẹ kẹe uyo nọ: “Orọnikọ fiki iruo iwoma jọ ma be rọ gwọlọ rehọ itho fi owhẹ hẹ, rekọ fiki eme-aghọ ra; keme who bi ru omara họ ọghẹnẹ.” (Jọn 10:31-33) Jesu ọ ta ẹdẹvo ho inọ ọyomariẹ yọ ọghẹnẹ, rekọ fikieme ahwo a be rọ bọwo Jesu ota inọ ọ ta ere?

Ẹme na họ, Jesu ọ be ta nọ o wo ẹgba nọ ahwo Ju a roro nọ Ọghẹnẹ ọvo o re wo. Wọhọ oriruo, Jesu ọ ta kpahe “igodẹ” na nọ, “Mẹ rẹ kẹ ae uzuazọ ebẹdẹ bẹdẹ,” oware nọ ohwo-akpọ ọvo ọ rẹ sai ru hu. (Jọn 10:28) Ahwo Ju na a se ẹme nọ Jesu ọ ta kẹ ae vẹre na gb’oware ovo ho inọ, Ọsẹ riẹ họ ọnọ ọ kẹ riẹ ogaga.

Jesu o dhesẹ nọ ota ahwo na a bọwo riẹ na nọ ọ ta nọ: “Kọ a gbe kere fihọ Uzi rai [evaọ Olezi 82:6] inọ, ‘Mẹ ta nọ: “Whai yọ eghẹnẹ”’? Otẹrọnọ o se enọ ẹme Ọghẹnẹ o brukpe ‘eghẹnẹ,’ . . . kọ wha be ta kẹ omẹ ọnọ Ọsẹ na o ru fuafo je vi ze akpọ na inọ, ‘Whọ ta eme-aghọ,’ fikinọ mẹ ta nọ, ‘Mẹ yọ Ọmọ Ọghẹnẹ’?”—Jọn 10:34-36.

Ẹhẹ, a jọ Ikereakere na se iguẹdhọ ahwo-akpọ nọ i re kienyẹ amọfa “eghẹnẹ.” O tẹ rrọ ere, kọ u gine fo re ahwo Ju nana a fo Jesu fikinọ o se omariẹ “Ọmọ Ọghẹnẹ”? Jesu ọ ta oware jọ nọ o rẹ kẹ ae imuẹro inọ ọyomariẹ ginọ Ọmọ Ọghẹnẹ inọ: “Otẹrọnọ me bi ru iruo Ọsẹ mẹ hẹ, wha fi ẹrọwọ họ omẹ hẹ. Rekọ otẹrọnọ me bi ru ai, wha gbẹ make rọwo omẹ hẹ, wha rọwo iruo na, re wha ruẹse riẹ jẹ riẹ ẹsikpobi inọ Ọsẹ na ọ rrọ usu kugbe omẹ yọ mẹ rrọ usu kugbe Ọsẹ na.”—Jọn 10:37, 38.

Nọ Jesu ọ ta ẹme nana no, ahwo Ju na a tẹ jẹ gwọlọ epanọ a re ro kru rie rekọ ọ tẹ wariẹ vabọ. O te no Jerusalẹm kpohọ abọdekọ Ethẹ Jọdan, oria nọ Jọn ọ kake jọ mu ahwo ame họ ẹhọ enwenọ ikpe ene nọ i kpemu. O wọhọ nọ oria nana o thabọ no ofẹ obọze ovatha-ọre Ethẹ Galili hi.

Ogbotu ahwo a tẹ nya bru Jesu jẹ be ta nọ: “Jọn o ru iruo igbunu ọvuọvo ho, rekọ eware kpobi nọ Jọn ọ ta kpahe ọzae nana uzẹme.” (Jọn 10:41) Ahwo Ju buobu a te fi ẹrọwọ họ Jesu.