Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 44

Jesu Ọ Whọku Ẹkporo Evaọ Abade

Jesu Ọ Whọku Ẹkporo Evaọ Abade

MATIU 8:18, 23-27 MAK 4:35-41 LUK 8:22-25

  • JESU Ọ WHỌKU ẸKPORO EVAỌ ABADE GALILI

Oma o rrọ Jesu no evaọ ẹdẹ nana. Nọ owọwọ u te, ọ tẹ ta kẹ ilele riẹ nọ a no Kapaniọm re a “fa kpohọ abọdekọ abade na.”—Mak 4:35.

Oria nọ a re se Gẹrasa họ ẹkwotọ nọ ọ rrọ abọdekọ Abade Galili na. A re je se ẹkwotọ nana Dẹkapọlis. Ahwo nọ a jẹ rria ewho nọ e rrọ eva Dẹkapọlis na a je ru uruemu-ẹwho ahwo Griki, dede nọ ahwo Ju buobu a jẹ rria ewho nana re.

Ahwo buobu a riẹ nọ Jesu o bi no ẹwho Kapaniọm, fikiere ekọ efa i te mu ei họ ebi lele. (Mak 4:36) Uzẹme riẹ họ, obonọ a bi bi nya na o nwani thabọ tere he. Abade Galili na ọ wọhọ ethẹ ologbo, u theri te enwenọ emaele 13 jẹ kẹre te enwenọ emaele ihrẹ. Rekọ o kodo gaga.

Dede nọ Jesu ohwo ọgbagba, oma o rrọ riẹ no fiki usiuwoma ota riẹ ẹdẹ yena. Fikiere, nọ a bi bi na, ọ tẹ tọlọ othuzou, o te kpohọ obemu okọ na, o te kiẹzẹ be wezẹ.

Ibuobu evaọ usu ikọ 12 riẹ na a riẹ okọ ebi ziezi, rekọ ubiokọ nana o te lọhọ kẹ ae he. Igbehru e wariẹ oyena họ, yọ ame nọ ọ rrọ ehru Abade Galili na ọ rẹ jọ ruọruọruọ ẹsibuobu. Ẹsejọ, ofou odhedhẹ o re fou no ehru igbehru na tha, kẹsena nọ ofou nana o te te ehru ame ọruọruọ na, o vẹ whae ze nọ ẹkporo ọgaga ọ rẹ rọ jọ abade na fi. Oye o via ẹdẹ nana. U kri hi, ame ẹkporo na o te muọ okọ na họ ẹtehe ro. Okọ na u te “te epanọ o rọ kẹle ezue.” (Luk 8:23) Ghele na, Jesu ọ gbẹ rrọ owezẹ.

Enọ i bi bi okọ na a te muhọ ẹrova re a kpọ okọ na, a rọ onaa kpobi nọ a wo anwẹdẹ nọ a re ro bi okọ ẹkporo bi okọ na. Rekọ orọ ẹdẹ nana o wọhọ erọ anwẹdẹ hẹ. Avọ obi uwhu, a tẹ rọwo Jesu ze, bi bo nọ: “Olori, siwi omai, keme ewhu ma rrọ na!” (Matiu 8:25) Ozọ u bi mu ilele na nọ a be te da ame whu.

Nọ Jesu ọ kpama, ọ tẹ ta kẹ ikọ na nọ: “Fikieme ozọ u bi ro mu owhai ga tere, whai enọ i wo ẹrọwọ ọkakao?” (Matiu 8:26) Kẹsena Jesu ọ tẹ whọku ofu gbe abade na nọ: “Seba! Fọ!” (Mak 4:39) Ofou na o te serihọ, oria kpobi o tẹ fọ rirẹ. (Mak avọ Luk a gbiku oware nana nọ o via na, inọ Jesu ọ kake ta kẹ ofou na nọ ọ fọ taure ọ tẹ te ta nọ ilele riẹ a wo ẹrọwọ ọkakao.)

Dai roro epanọ o jọ ilele Jesu oma. Abade nana nọ o je fi ẹkporo ọgaga vẹre na ọ fọ no rirẹ. Idudu e tẹ ro ae oma. A tẹ be ta kẹ ohwohwo nọ: “Oghẹrẹ ohwo vẹ ọna? Makọ ofou gbe abade dede a bi yoẹme kẹe.” (Mak 4:41–5:1) Ẹsejọhọ ekọ nọ i je lele ai na i zihe.

O rrọ oware omosasọ gaga inọ Ọmọ Ọghẹnẹ o wo ogaga nọ ọ sae rọ kpọ ofou, ẹkporo, gbe eware itieye na efa. Nọ o te mu akpọ na kpobi họ esuo no, ahwo kpobi a ti wo omofọwẹ, keme oware okpẹtu ovuovo o gbẹ te via ha.