Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 64

U Fo nọ A rẹ Rọvrẹ

U Fo nọ A rẹ Rọvrẹ

MATIU 18:21-35

  • KỌ A RẸ RỌVRẸ TE ISIAHRẸ?

  • ỌTADHESẸ ỌRIGBO NỌ Ọ KARE OHRỌ NA

Pita o yo nọ Jesu ọ jẹ kẹ ohrẹ kpahe epanọ inievo ivẹ a re ro ku ẹwhọ nọ ọ rrọ udevie rai họ, inọ aimava na a rẹ keria ta ẹme na. Rekọ Pita ọ gwọlọ riẹ unuẹse nọ ohwo ọ rẹ rọvrẹ ọnọ o ru rie thọ.

Pita ọ nọ inọ: “Olori, brẹse oniọvo mẹ o re ru omẹ thọ nọ mẹ jẹ rọvrẹ riẹ? Kọ u re te isiahrẹ?” Isu egagọ jọ a re wuhrẹ nọ isiasa ohwo ọ rẹ rọvrẹ ọrivẹ riẹ. Fikiere, ẹsejọhọ Pita o je roro nọ otẹrọnọ ọ rọvrẹ ohwo “te isiahrẹ” yọ ọ daoma gaga no.—Matiu 18:21.

Rekọ oware nọ Jesu o bi wuhrẹ u dhesẹ nọ ohwo o re du kele unuẹse nọ a ru rie thọ họ. Fikiere ọ tẹ kpọ Pita vi inọ: “Mẹ be ta kẹ owhẹ nọ orọnikọ isiahrẹ hẹ, rekọ u re te isia udhosa gbe ikpegbihrẹ.” (Matiu 18:22) Koyehọ ohwo ọ rẹ ruabọhọ erọvrẹ. Oyena u dhesẹ nọ Pita ọ rẹ rọvrẹ oniọvo riẹ ẹsikpobi.

Kẹsena Jesu ọ tẹ kẹ ọtadhesẹ jọ ro wuhrẹ Pita gbe amọfa nọ a jọ etẹe oware nọ o rọ gwọlọ nọ a rẹ rọvrẹ. Ọ ta kpahe ọrigbo jọ nọ ọ rọwo dhesẹ ohrọ họ, dede nọ olori riẹ o dhesẹ ohrọ kẹe. Ovie na o se erigbo riẹ kpobi re a hwa igho nọ a reosa riẹ. A tẹ rọ ọrigbo riẹ jọ ze nọ ọ reosa igho buobu nọ i bu te etalẹnte idu ikpe (10,000), koyehọ dinariọs ima udhosa (60,000,000). U wo oghẹrẹ ovuovo nọ ọzae na ọ sae rọ hwa igho nana ha. Fikiere ovie na ọ tẹ ta nọ a zẹ ọrigbo na, aye riẹ, gbe emọ riẹ re a rọ igho na hwa osa na. Ọrigbo na o te kie fihọ aro olori riẹ, be lẹe nọ: “Gbe thihakọ kẹ omẹ, mẹ te hwa igho na kpobi zihe kẹ owhẹ.”—Matiu 18:26.

Ohrọ riẹ o tẹ re ovie na, ọ tẹ rọ edele igho yena kpobi vrẹ ọrigbo na. Nọ ovie na ọ rọvrẹ riẹ no, ọrigbo na ọ tẹ nyavrẹ, kẹsena o te zere ibe ọrigbo riẹ jọ nọ ọ reosa riẹ dinariọs 100. Ọ tẹ jabọ kru rie, o te si ewu mu ei uvou, be ta nọ: “Hwa igho kpobi nọ whọ reosa mẹ kẹ omẹ.” Ibe  ọrigbo riẹ na o te kie fihọ aro riẹ be lẹe nọ: “Gbe thihakọ kẹ omẹ, mẹ te hwa igho na zihe kẹ owhẹ.” (Matiu 18:28, 29) Rekọ ọrigbo nọ olori riẹ ọ rọ igho buobu vrẹ na ọ rọ aro kele olori na ha. Ọ tẹ ta nọ a fi ibe ọrigbo riẹ nọ ọ reosa riẹ umugho kakao na họ uwou-odi, bẹsenọ ọ rẹ hwa igho nọ ọ reosa riẹ na kpobi.

Jesu ọ tẹ ta nọ erigbo efa nọ e ruẹ oware nọ ọrigbo nọ ọ kare ohrọ na o ru na, a tẹ nyae vuẹ olori na. Eva e dha riẹ gaga, o te se ọrigbo na jẹ ta kẹe nọ: “Ọrigbo omuomu, mẹ kpairoro vrẹ igho buobu yena nọ whọ reosa mẹ nọ whọ lẹ omẹ. Kọ whọ gbẹ hae re ohrọ ibe ọrigbo ra wọhọ epanọ mẹ re ohrọ ra na?” Ovie na ọ tẹ rehọ ọrigbo nọ ọ kare ohrọ na kẹ iriekarọ re a fi ei họ uwou-odi bẹsenọ ọ rẹ hwa osa nọ ọ re kpobi no. Jesu o te ku ọtadhesẹ na họ nọ: “Ere Ọsẹ obọ odhiwu mẹ o ti ru owhai re nọ whai omomọvo ọ gbẹ rọvrẹ oniọvo riẹ no udu ze he.”—Matiu 18:32-35.

Oware nọ ma wuhrẹ no iku nana ze kpahe erọvrẹ o rro kẹhẹ. Ọghẹnẹ ọ be rọ izieraha buobu vrẹ omai. Oware kpobi nọ oniọvo ukoko na jọ o ru omai thọ kẹhẹ, u tulo ho a tẹ rehọ iẹe wawo enọ ma bi ru Jihova thọ. Rekọ a re kele unuẹse nọ Jihova ọ be rọvrẹ omai mu hu. Kọ u gbe fo re ma rọvrẹ oniọvo mai ẹsikpobi, o tẹ make rọnọ o ru omai thọ unuẹse buobu? Jesu o wuhrẹ evaọ Ovuẹ obọ Ugbehru na nọ Ọghẹnẹ ọ te rọ “izieraha mai rọvrẹ omai, wọhọ epanọ ma rọvrẹ enọ i ru omai thọ no na.”—Matiu 6:12.