JỌN 5:17-47

  • ỌGHẸNẸ HỌ ỌSẸ JESU

  • EYAA ẸKPAROMATHA NA

Nọ ahwo Ju jọ a jẹ fo Jesu inọ o siwi ohwo evaọ Ẹdijala, Jesu ọ tẹ ta kẹ ae nọ: “Ọsẹ mẹ o gbe bi ru iruo rite enẹna, yọ me gbe bi ru iruo re.”—Jọn 5:17.

Uzi Ẹdijala nọ Ọghẹnẹ ọ kẹ emọ Izrẹl na o wọso oware nọ Jesu o ru na ha. Usiuwoma nọ ọ jẹ ta gbe ahwo nọ o je siwi na yọ emamọ eware nọ o ru be rọ aro kele Ọghẹnẹ. Fikiere Jesu o je ru eware ezi kẹdẹ kẹdẹ. Rekọ uyo nọ ọ kẹ enọ e be fo ẹe na o tubẹ lẹliẹ eva dha ae vi epaọ ọsosuọ, te epanọ a jẹ rọ gwọlọ nọ a re kpe Jesu no. Fikieme a bi ro ru ere?

U te no uzi Ẹdijala nọ a roro nọ Jesu ọ thọ no, eva e dha rai gaga inọ Jesu ọ be ta nọ ọyomariẹ yọ Ọmọ Ọghẹnẹ. A rehọ e riẹ nọ eme aghọ Jesu ọ ta na inọ Ọghẹnẹ yọ Ọsẹ riẹ, keme a rri rie nọ Jesu ọ be ta nọ ọyomariẹ avọ Ọghẹnẹ ẹrẹrẹe. Ghele na, oyena u ru ozọ mu Jesu hu, ukpoye ọ vuẹ rai obọdẹ usu nọ o wo kugbe Ọghẹnẹ, inọ: “Ọsẹ na o you Ọmọ na, o te bi dhesẹ eware kpobi nọ o bi ru kẹe.”—Jọn 5:20.

Ọsẹ na họ Ọnọ ọ rẹ kẹ uzuazọ, yọ o dhesẹ onana evaọ oke nọ u kpemu nọ ọ kẹ ahwo ẹgba nọ a rọ kpare enọ i whu no. Jesu ọ ta haro nọ: “Wọhọ epanọ Ọsẹ na ọ rẹ kpare enọ i whu no ze ọ vẹ kẹ ae uzuazọ na, ere ọvona Ọmọ na ọ rẹ kẹ ohwo kpobi nọ u je rie uzuazọ re.” (Jọn 5:21) Eme nana i kiehọ kẹhẹ keme e rẹ kẹ ẹruore. Makọ enẹna dede, Ọmọ na o bi fiobọhọ kẹ ahwo nọ i whu no evaọ usu rai kugbe Ọghẹnẹ re a wo emamọ usu kugbei. Oyejabọ nọ Jesu ọ rọ ta nọ: “Ohwo kpobi nọ o yo ẹme mẹ jẹ rọwo Ọnọ o vi omẹ ze o re wo uzuazọ ebẹdẹ bẹdẹ, a ti bruoziẹ kpei hi rekọ o no uwhu kpohọ uzuazọ no.”—Jọn 5:24.

Evaọ oke nana, Jesu ọ re kpare ohwo ọvo no uwhu ze he, rekọ ọ be ta kẹ enọ e be fo ẹe na nọ o ti ru ere evaọ obaro. Ọ ta nọ: “Oke o be tha nọ enọ e rrọ iki ekareghẹhọ kpobi a ti ro yo urru riẹ a vẹ te nya via.”—Jọn 5:28, 29.

Dede nọ Jesu o wo ẹgba nọ o ti ro ru oware igbunu yena, o ru rie vẹ kẹ ahwo na inọ Ọghẹnẹ ọ rro vi ei, ọ ta nọ: “Mẹ rẹ sae rọ udu obọmẹ ru uvumọ oware he. . . . Orọnikọ oreva obọmẹ mẹ be gwọlọ họ rekọ oreva ọnọ o vi omẹ ze.” (Jọn 5:30) Rekọ, Jesu ọ ta kpahe owha-iruo nọ o wo evaọ erugba ẹjiroro Ọghẹnẹ, oware nọ ọ re ta evaọ ẹgbede ẹdẹvo ho. Rekọ, u te no eme nọ Jesu ọ ta ro dhesẹ oghẹrẹ ohwo nọ ọ rrọ no, enọ e be fo ẹe na a riẹ amọfa nọ a se isẹri kpahe iẹe. Jesu ọ kareghẹhọ ae inọ: “Wha vi ahwo bru Jọn [Ọhọahwo-Ame na], yọ o se isẹri kpahe uzẹme na no.”—Jọn 5:33.

O sae jọnọ enọ e be fo Jesu na a yo oware nọ o via ikpe ivẹ nọ i kpemu, nọ Jọn ọ rọ vuẹ isu egagọ ahwo Ju kpahe Ọnọ ọ be tha, nọ a se “ọruẹaro nọ ọ be tha na” gbe “Kristi na.” (Jọn 1:20-25) Jesu ọ tẹ jẹ kareghẹhọ enọ e be fo ẹe na kpahe adhẹẹ nọ a wo kẹ Jọn vẹre, ọnọ ọ rrọ uwou-odi enẹna, inọ: “Evaọ omoke jọ o ruọ owhai nọ wha rẹ ghọghọ gaga evaọ elo riẹ.” (Jọn 5:35) Ghele na, isẹri nọ Jesu o se e tubẹ rro vi erọ Jọn Ọhọahwo-Ame na.

Jesu ọ ta nọ: “Iruo . . . nọ me bi ru na [onọ u kugbe ọzae na nọ o siwi obọnana], i bi se isẹri inọ Ọsẹ na o vi omẹ ze.” Ọ ta haro nọ: “Ọsẹ na ọnọ o vi omẹ ze o se isẹri kpahe omẹ no.” (Jọn 5:36, 37) Wọhọ oriruo, Ọghẹnẹ o se isẹri kpahe Jesu evaọ okenọ ọ rọ họ-ame.—Matiu 3:17.

Evaọ uzẹme, enọ e be fo Jesu na a be fo ẹe gheghe, keme u wo ẹjiroro ọvuọvo nọ a rẹ rọ se iẹe he. Whaọ, Ikereakere na nọ a ta nọ a bi se na i se isẹri kpahe Jesu. Jesu o ku ẹme riẹ họ nọ: “Wha tẹ rọwo Mosis wha rẹ rọwo omẹ, keme o kere kpahe omẹ. Rekọ wha gbẹ rọwo eware nọ o kere he, ẹvẹ wha sae rọ rọwo ẹme nọ mẹ be ta?”—Jọn 5:46, 47.