Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 49

Jesu Ọ Ta Usiuwoma Evaọ Galili je Wuhrẹ Ikọ Riẹ kẹ Iruo Na

Jesu Ọ Ta Usiuwoma Evaọ Galili je Wuhrẹ Ikọ Riẹ kẹ Iruo Na

MATIU 9:35–10:15 MAK 6:6-11 LUK 9:1-5

  • JESU Ọ WARIẸ KPOHỌ GALILI NYAE TA USIUWOMA

  • O VI IKỌ NA NYAE TA USIUWOMA

Anwọ ikpe ivẹ ena nọ Jesu ọ be rọ rehọ ajọwha ta usiuwoma na. Kọ u te epanọ o re ro serihọ no? Kakaka, ukpoye ọ ruabọhọ iruo usiuwoma ota na, be “nya ewho gbe iwhre kpobi duwu [evaọ Galili], bi wuhrẹ evaọ iwou-egagọ rai je bi whowho usi uwoma Uvie na je siwi oghoghẹrẹ eyao gbe emo kpobi.” (Matiu 9:35) Oware nọ ọ ruẹ u ru rie riẹ nọ ọ rẹ ruabọhọ usiuwoma ota na. Kọ ẹvẹ ọ te sae rọ ta usiuwoma na te eria kpobi?

Jesu ọ jọ eria sa-sa nọ o je kpohọ ruẹ ahwo nọ a gwọlọ yo ẹme Ọghẹnẹ gbe enọ e gwọlọ omosasọ. Ahwo na a wọhọ igodẹ nọ i wo othuru hu, nọ e rrọ oyoya jẹ vahabọ. Ohrọ rai o re riẹ, ọ tẹ ta kẹ ilele riẹ nọ: “Uzẹme, ivuẹvu na e rrọ ruaro, rekọ iruiruo na e rrọ kakao. Fikiere, wha lẹ Olori ivuẹvu na re o vi iruiruo ziọ ivuẹvu riẹ.”—Matiu 9:37, 38.

Jesu ọ riẹ oware nọ u ti fiobọhọ kẹ ae. Nọ o se ikọ 12 riẹ koko, ọ tẹ ghale ae imimava kpohọ itu ezeza re a nyae ta usiuwoma. Taure a tẹ te nyavrẹ, ọ kẹ rai ithubro nana inọ: “Wha du nya ruọ edhere erẹwho egedhọ họ, yọ wha ruọ ẹwho ahwo Sameria ọvo ho; ukpoye, wha nyae gwọlọ igodẹ orẹwho Izrẹl nọ i vru. Nọ wha be nya na, wha whowho inọ: ‘Uvie odhiwu o kẹle no.’”—Matiu 10:5-7.

Uvie nọ a te ta usiuwoma kpahe na họ onọ Jesu ọ ta kpahe evaọ olẹ nọ o wuhrẹ ilele riẹ na. ‘Uvie na o kẹle no,’ keme Jesu Kristi Ovie nọ Ọghẹnẹ o ro mu na ọ rrọ kugbe ai. Kọ eme o ti ru ahwo rọwo nọ a ginẹ kẹ ilele na udu nọ  a rẹ rọ ta kpahe Uvie na? Jesu ọ kẹ rai ẹgba nọ a re ro siwi ahwo nọ a be mọ, jẹ tubẹ kpare enọ i whu no ze, yọ a re mi ugho fihọ onana ha. Kọ ẹvẹ ikọ na a te sae rọ ruẹ ugho nọ a rẹ rọ dẹ eware nọ a gwọlọ, wọhọ emuore?

Jesu ọ ta kẹ ilele na nọ a du ruẹrẹ oware ovo họ kẹ erẹ usiuwoma ota nọ a be te nya na ha. A rẹ wha igoru hayo isiliva hayo ẹroo evaọ umueku-ugho rai hi. Yọ a rẹ tubẹ wha ẹkpa emuore, hayo iwu ivẹ, hayo eviẹ ivẹ kẹ erẹ na ha. Fikieme? Jesu ọ kẹ rai imuẹro nọ: “U fo nọ a rẹ kẹ oruiruo emu.” (Matiu 10:10) Ahwo nọ a te nyaku nọ i dede ovuẹ na rehọ, a te kẹ ae eware nọ a gwọlọ. Jesu ọ ta nọ: “Oria kpobi nọ wha jọ ruọ uwou, wha jọ etẹe bẹsenọ wha re no oria yena.”—Mak 6:10.

Jesu ọ tẹ jẹ kẹ ilele na uthubro kpahe epanọ a rẹ rọ ta usiuwoma nọ a te te uwou ohwo, inọ: “Nọ wha tẹ ruọ uwou, wha yere enọ e rrọ uwou na. A te dede owhai rehọ, jọ udhedhẹ rai u te uwou na; rekọ a gbe dede owhai rehọ họ, jọ udhedhẹ rai u lele owhai zihe. Evaọ oria kpobi nọ a jọ dede owhai rehọ họ hayo gaviezọ kẹ owhai hi, nọ wha te bi no uwou yena hayo ẹwho yena, wha nuhu ovu nọ ọ rrọ awọ rai no.”—Matiu 10:12-14.

Ahwo ẹwho hayo iwhre soso a sae tubẹ siọ ovuẹ na. Eme ọ te via kẹ ahwo nọ a rrọ eria itieye na? Jesu ọ ta nọ ọraha o ti te ai, inọ: “Uzẹme mẹ be ta kẹ owhai, o te mae lọhọ kẹ ẹwho Sọdọm avọ Gomora vi ẹwho yena evaọ Ẹdẹ Ẹdhoguo.”—Matiu 10:15.