Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 57

Jesu O Siwi Ọmọtẹ Jọ gbe Ọzae Jọ nọ O Diezọ

Jesu O Siwi Ọmọtẹ Jọ gbe Ọzae Jọ nọ O Diezọ

MATIU 15:21-31 MAK 7:24-37

  • JESU O SIWI ỌMỌTẸ AYE JỌ NỌ Ọ RRỌ OHWO FONISIA

  • O SIWI ỌZAE JỌ NỌ O DIEZỌ JE WO ẸBẸBẸ ẸMEỌTA

Nọ Jesu ọ whọku otu Farisi na no fiki iruemu ahwo oke anwae nọ a bi ru lele, avọ ilele riẹ a tẹ nyavrẹ. A be nya kpohọ ubrotọ Taya avọ Saedọn obọ Fonisia, nọ o rọ emaele buobu thabọ no obonọ a bi no ze na.

Nọ a te obei, Jesu o te wohọ uwou jọ, rekọ ọ gwọlọ nọ ahwo a riẹ nọ ọ rrọ etẹe he. Ghele na, ahwo a duku ei. Aye jọ nọ esẹ-ode riẹ e rrọ ahwo Griki nọ a jọ ẹwho nana yẹ o duku Jesu, ọ tẹ be lẹe nọ: “Jọ ohrọ mẹ o re owhẹ, Olori, Ọmọ Devidi. Idhivẹri nọ e rrọ ọmọtẹ mẹ oma e be lahiẹ iẹe gaga.”—Matiu 15:22; Mak 7:26.

Kẹsena ilele na a tẹ ta kẹ Jesu nọ: “Ta kẹe re ọ nyavrẹ keme o bi bo lele omai.” Jesu ọ tẹ ta oware nọ ọ gbẹ be rọ kpọ aye na unu hu na, inọ: “Fiki igodẹ orẹwho Izrẹl nọ i vru ọvo a ro vi omẹ ze, orọnọ fiki amọfa ha.” Rekọ aye na ọ kẹ riẹ uvẹ ghele he. Ọ tẹ nya te Jesu oma, ọ tẹ rọ uzou kpotọ kẹe, be lẹe nọ: “Olori, fiobọhọ kẹ omẹ!”—Matiu 15:23-25.

Ẹsejọhọ re Jesu ọ riẹ sọ aye na o gine wo ẹrọwọ, ọ tẹ ta ẹme nọ u dhesẹ oghẹrẹ nọ ahwo Ju a re rri ahwo erẹwho efa, inọ: “U kiehọ họ re a tọlọ ebrẹdi emaha na gbolo kẹ emọ erakọ.” (Matiu 15:26) Muẹrohọ nọ Jesu ọ fodẹ erakọ họ rekọ “emọ erakọ” nọ u fo nọ a re tete, onọ u dhesẹ uyoyou nọ Jesu o wo kẹ ahwo nọ a rrọ ahwo Ju hu. U muẹro nọ ovao Jesu gbe uvou riẹ u dhesẹ onana via.

Ẹme nana ọ dha aye na eva ha, ukpoye, avọ omaurokpotọ o fibae nọ: “Ginọ ere, Olori, rekọ emọ erakọ na e rẹ re ehẹhẹ nọ i bi kie no emẹjẹ ilori rai ze.” Jesu o te vuhumu nọ aye nana o wo emamọ eva, ọ tẹ ta kẹe nọ: “O aye, ẹrọwọ ra ọ rro kẹhẹ; jọ o via kẹ owhẹ epaọ ẹgwọlọ ra.” (Matiu 15:27, 28) Yọ ere o nwane via dede nọ ọmọtẹ na ọ jọ etẹe he. Nọ aye na o te obọ uwou, ọ tẹ ruẹ ọmọtẹ riẹ nọ oma riẹ o ga no nọ o kiẹzẹ ehwa, yọ “idhivẹri na o no rie oma no.”—Mak 7:30.

Nọ Jesu avọ ilele riẹ a no ubrotọ Fonisia no, a tẹ be nya rri ofẹ Ethẹ Jọdan. O wọhọ nọ a fa ethẹ na vrẹ evaọ ofẹ ẹkpẹlobọ ovatha-ọre Abade Galili, a te bi kpohọ ẹkwotọ Dẹkapọlis. Nọ a te obei, a te kpobọ ehru ugbehru, rekọ ogbotu ahwo a gwọlọ e rai te obei. Ahwo na a rehọ ahwo rai nọ e ko, enọ i tuaro, gbe enọ i dienu ro se Jesu. A tẹ wọ ae fihọ aro riẹ, o ve siwi ai. Akpọ o gbe ahwo na unu gaga, a te bi jiri Ọghẹnẹ Izrẹl.

Jesu ọ jọ udevie ogbotu na muẹrohọ ọzae jọ nọ o diezọ je wo ẹbẹbẹ ẹmeọta. Ababọ avro, oma o jẹ vo ẹe evaọ udevie ogbotu na. Ẹsejọhọ Jesu o vuhumu nọ oma o be vo ọzae nana, fikiere ọ tẹ rehọ iẹe no udevie ogbotu na ruọ akotọ. Nọ aimava ọvo a jọ oria, Jesu ọ tẹ rọ obọ dhesẹ oware nọ o bi ti ru kẹe. O dhe iziabọ riẹ họ ezọ ọzae na, o te nwo eya, jẹ rọ obọ te ẹrọo ọzae na. Jesu ọ tẹ kpare ovao rri obọ odhiwu, ọ tẹ ta ẹme nọ otofa riẹ o rrọ “Rovie.” Ezọ riẹ e tẹ nwani rovie, o te mu ẹme họ ẹta ziezi. Jesu ọ gwọlọ nọ ahwo a yo kpahe onana ha, keme ọ gwọlọ nọ ahwo a fi ẹrọwọ họ iẹe rono eware nọ ae ọvo a rọ ẹro ruẹ gbe enọ a yo mi ei ze.—Mak 7:32-36.

Eware sa-sa nọ Jesu o ru nọ ahwo na a ruẹ na i “gbe rai unu thesiwa.” A tẹ be ta nọ: “O ru eware na kpobi gba no. O bi tube ru enọ i diezọ yo ẹme gbe enọ i dienu ta ẹme.”—Mak 7:37.