Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 55

Ẹme Jesu Ọ Dha Ahwo Buobu Eva

Ẹme Jesu Ọ Dha Ahwo Buobu Eva

JỌN 6:48-71

  • A RẸ RE UWO RIẸ JẸ DA AZẸ RIẸ

  • AHWO BUOBU A ZORUẸ JẸ SIỌ JESU BA ELELE

Jesu ọ be jọ uwou-egagọ nọ ọ rrọ Kapaniọm wuhrẹ ahwo inọ ọye họ uvi ebrẹdi nọ o no obọ odhiwu ze na. U muẹro nọ ẹme nọ ọ jẹ ta kẹ ahwo nọ ọ rọ ebrẹdi gbe imiyei ko nọ i no abọdekọ Abade Galili bru rie ze na, oye ọ gbẹ be ta haro na.

Jesu ọ ruabọhọ ẹme nọ ọ jẹ ta na nọ: “Esẹ-ode rai a re emana evaọ udhude na ghele na a whu.” Rekọ wo ohẹriẹ, o ru rie vẹ nọ: “Mẹ họ ebrẹdi uzuazọ nọ o no obọ odhiwu ze. Ohwo kpobi nọ ọ re ebrẹdi nana ọ te rria bẹdẹ bẹdẹ; yọ ebrẹdi nọ mẹ te kẹ họ uwo mẹ nọ o te kẹ akpọ na uzuazọ.”—Jọn 6:48-51.

Evaọ Asa hayo Ane ọrọ ukpe 30 C.E., Jesu ọ ta kẹ Nikodimọs nọ Ọghẹnẹ o you akpọ na gaga, o te siobọno Ọmọ riẹ re o siwi akpọ na. Obọnana, Jesu o bi dhesẹ epanọ u wuzou te re a re uwo riẹ ẹkwoma ẹrọwọ nọ a re fihọ idhe ẹtanigbo na. Ere ohwo o re ro wo uzuazọ ebẹdẹ bẹdẹ.

Rekọ ahwo na a rọwo fihọ ẹme nọ Jesu ọ ta na ha. A tẹ be nọ inọ: “Ẹvẹ ọzae nana ọ rẹ rọ kẹ omai uwo riẹ re ma re?” (Jọn 6:52) Jesu ọ gwọlọ nọ a wo otoriẹ ẹme riẹ na, inọ orọnikọ a ti gine bru uwo riẹ họ unu re he. Ẹme nọ ọ ta lele onana u dhesẹ otofa ẹme riẹ na.

Ọ ta nọ: “Ajokpanọ wha rẹ re uwo Ọmọ ohwo jẹ da azẹ riẹ, o gbẹ rrọ ere he wha rẹ jọ omarai wo uzuazọ họ. Ohwo kpobi nọ ọ re uwo mẹ jẹ da azẹ mẹ o re wo uzuazọ ebẹdẹ bẹdẹ, . . . keme uwo mẹ yọ uvi emu, azẹ mẹ yọ uvi udi. Ohwo kpobi nọ ọ re uwo mẹ jẹ da azẹ mẹ ọ rrọ usu kugbe omẹ, yọ mẹ rrọ usu kugbei.”—Jọn 6:53-56.

Dai roro epanọ ẹme na ọ dha ahwo Ju nọ a jọ etẹe eva te. Ẹsejọhọ a je roro nọ Jesu ọ be ta kẹ ae nọ u fo re a re ohwo hayo re a thuzi Ọghẹnẹ nọ o ta nọ a rẹ re azẹ hẹ. (Emuhọ 9:4; Iruo-Izerẹ 17:10, 11) Rekọ, orọnikọ Jesu ọ be ta nọ a gine bru uwo riẹ họ unu re hayo da azẹ riẹ hẹ. Ọ be ta nọ ohwo kpobi nọ ọ gwọlọ wo uzuazọ ebẹdẹ bẹdẹ o re fi ẹrọwọ họ idhe nọ ọ be te rehọ ugboma ogbagba gbe azẹ riẹ dhe na. Evaọ uzẹme, ilele riẹ buobu dede a wo otoriẹ oware nọ o bi wuhrẹ na ha. Ejọ e ta nọ: “Ẹme nana ọ tọtọ kẹhẹ; ono ọ rẹ sae gaviezọ kẹe?”—Jọn 6:60.

Nọ Jesu o vuhumu nọ ilele riẹ jọ e be go, ọ tẹ nọ ae nọ: “Kọ ẹme nana ọ lẹliẹ owhai zoruẹ? Kọ ẹvẹ wha ti ru nọ wha tẹ ruẹ Ọmọ ohwo nọ o bi muvrẹ kpohọ obonọ ọ jọ vẹre? . . . Eme nọ mẹ ta kẹ owhai na e rọwokugbe ẹzi ọfuafo na yọ e rẹ kẹ uzuazọ. Rekọ ejọ e rrọ usu rai na nọ e rọwo ho.” Nọ ọ ta ẹme nana no, ilele riẹ buobu e tẹ nya se iẹe ba, a gbe je lele iei hi.—Jọn 6:61-64.

Nọ Jesu ọ rẹriẹ ovao rri ikọ 12 riẹ, ọ tẹ nọ ae nọ: “Kọ wha gwọlọ nyavrẹ re?” Pita ọ tẹ kẹe uyo nọ: “Olori, ono ma rẹ nya bru? Who wo eme nọ e rẹ kẹ uzuazọ ebẹdẹ bẹdẹ. Ma rọwo no jẹ riẹ nọ whẹ họ Ọrẹri Ọghẹnẹ.” (Jọn 6:67-69) Ẹme riẹ na o woma kẹhẹ, u dhesẹ nọ ọyomariẹ avọ ikọ nọ i kiọkọ a gwọlọ nọ a rẹ talamu Jesu, dede nọ a ri wo otoriẹ oware nọ o wuhrẹ na ziezi hi.

Ẹme Pita na ọ were Jesu gaga, rekọ Jesu o muẹrohọ nọ: “Kọ ogbẹrọnọ whai ikpegbivẹ mẹ salọ? Rekọ ọvo rai jọ yọ ọnọ ọ rẹ ta ahwo raha.” (Jọn 6:70) Judas Iskariọt ọye Jesu ọ be ta kpahe na. O wọhọ nọ evaọ oke nana Jesu o muẹrohọ nọ Judas o muọ iroro iyoma họ ewo no.

Ghele na, o were Jesu gaga nọ Pita avọ ikọ nọ i kiọkọ na a nya se iẹe ba ha yọ a siọ iruo nọ e rẹ kẹ uzuazọ na ba eru gbe he.