Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 33

O Ru Eruẹaruẹ Aizaya Gba

O Ru Eruẹaruẹ Aizaya Gba

MATIU 12:15-21 MAK 3:7-12

  • OGBOTU AHWO A TUNYẸ JESU

  • O RU ERUẸARUẸ AIZAYA GBA

Nọ Jesu ọ riẹ nọ otu Farisi avọ ahwo utu Herọd a be gwọlọ epanọ a re ro kpei, avọ ilele riẹ a te si oma rehọ kpobọ Abade Galili. Ahwo buobu a no eria sa-sa bru rie ze, a no obọ Galili ze, ewho Taya gbe Saedọn nọ e kẹle abade, ofẹ ovatha-ọre Ethẹ Jọdan, Jerusalẹm, gbe Idumia nọ o rrọ ofẹ obọze ovatha-ọre. Yọ Jesu o je siwi enọ e jẹ mọ evaọ udevie rai. Fikiere, enọ i wo ẹyao ọgaga kpobi a te bi tunye bru rie ze. A gbẹ jẹ hẹrẹ re Jesu ọ rọ obọ te ai hi, ukpoye kọ ae ọvo a bi hrowo oma re a rọ obọ tei.—Mak 3:9, 10.

Ahwo na a bu te epanọ Jesu ọ rọ vuẹ ilele riẹ nọ a ruẹrẹ okọ osese jọ kpahe kẹe. Ọ gwọlọ bi ruọ ame na omojọ re ogbotu na a se iẹe ba etunyẹ. U te no ere no, onana u ti ru nọ a ti ro yo urru riẹ ziezi nọ o bi wuhrẹ ai na, ọ vẹ jẹ sai bi kpohọ ofẹ ofa unueri na re o fiobọhọ kẹ amọfa re.

Matiu olele na o muẹrohọ nọ oware nọ Jesu o ru na u ru “ẹme nọ a rehọ Aizaya ọruẹaro na ta” gba. (Matiu 12:17) Eruẹaruẹ vẹ Jesu ọ be jọ etenẹ rugba na?

Eruẹaruẹ na họ: “Rri! Odibo mẹ ọnọ mẹ salọ, oyoyou mẹ, ọnọ mẹ jẹrehọ! Mẹ te kẹe ẹzi mẹ, yọ o re ti dhesẹ oware nọ uvioziẹ o rrọ kẹ erẹwho na. Ọ te whọ ẹwhọ họ hayo ru edo ho, yọ ohwo ọvo o ti yo urru riẹ evaọ oko-ore he. O ti wiri ukpoko nọ u wiri rẹrẹ no ho, yọ o ti furie uwhiki nọ u bi kuye iwiri hi bẹsenọ ọ rẹ kpọ eware kpobi nọ e thọ vi no. Evaọ uzẹme, erẹwho na a ti fi ẹruore họ odẹ riẹ.”—Matiu 12:18-21; Aizaya 42:1-4.

Jesu họ odibo nọ Ọghẹnẹ ọ jẹrehọ na. Jesu o dhesẹ oware nọ uvioziẹ o rrọ via, onọ isu egagọ eviẹhọ a be vẹtu. Fikinọ otu Farisi na a be fa otọ Uzi Ọghẹnẹ epanọ u kiehọ ae oma ro kienyẹ ahwo, a re tube fiobọhọ kẹ ohwo nọ ọ be mọ dede he evaọ Ẹdijala. Jesu o je fiobọhọ kẹ enọ a bi kienyẹ, onọ u dhesẹ uvioziẹ Ọghẹnẹ via je dhesẹ nọ ẹzi Ọghẹnẹ ọ rrọ iẹe oma. Oye o soriẹ nọ isu egagọ na a jẹ rọ gba ẹgwae epanọ a re ro kpei. U yoma kẹhẹ.

Eme họ otofa eme nana inọ “ọ te whọ ẹwhọ họ hayo ru edo ho, yọ ohwo ọvo o ti yo urru riẹ evaọ oko-ore he”? Nọ Jesu o te siwi ohwo, ọ rẹ kẹ ohwo na hayo idhivẹri uvẹ re a “dhesẹ ohwo nọ ọ rrọ via ha.” (Mak 3:12) Ọ gwọlọ nọ ahwo a rẹ riẹ kpahe iẹe ẹkwoma ẹkoyẹ nọ a rẹ koyẹ kẹe evaọ oko-ore he hayo ẹkwoma eme atanọ.

 U te no ere no, Jesu o whowho ovuẹ omosasọ riẹ kẹ enọ oma o lọhọ no wọhọ ukpoko nọ u wiri rẹrẹ. A tẹ jẹ rrọ wọhọ uwhiki nọ u bi kuye iwiri nọ o joma fu no. Jesu o wiri ukpoko nọ u wiri rẹrẹ no ho, yọ o furie uwhiki nọ u bi kuye iwiri nọ o joma fu no ho. Ukpoye, ọ rọ ohrọ gbe uyoyou sasa iwhrori oma. Evaọ uzẹme, Jesu họ ọnọ erẹwho na kpobi a fi ẹruore rai họ.