Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 53

Osu nọ Ọ rẹ Sae Kpọ Ofou, Ẹkporo, gbe Eware Itieye na Efa

Osu nọ Ọ rẹ Sae Kpọ Ofou, Ẹkporo, gbe Eware Itieye na Efa

MATIU 14:22-36 MAK 6:45-56 JỌN 6:14-25

  • AHWO A GWỌLỌ RỌ JESU MU OVIE

  • JESU Ọ NYA EVAỌ EHRU AME JE RU OFOU SERIHỌ

Edhere igbunu nọ Jesu ọ rọ ko ogbotu ahwo na o lẹliẹ ahwo na fi eva rai kpobi họ Jesu. A tẹ ta nọ “ọnana họ Ọruẹaro nọ a ta nọ ọ te ziọ akpọ na,” Mesaya na, yọ a tẹ rehọ iẹe mu ovie, ọ te jọ emamọ osu. (Jọn 6:14; Iziewariẹ 18:18) Fikiere ahwo na a tẹ jiroro nọ a re mu Jesu re a rehọ iẹe mu ovie.

Rekọ Jesu ọ riẹ oware nọ o rrọ ahwo na eva. O te vi ogbotu na vrẹ jẹ ta kẹ ilele riẹ nọ a nyae ruọ okọ. Bovẹ a be nya? A bi bi rri ofẹ Bẹtsaida kẹsena a ve bi kpobọ Kapaniọm. Rekọ Jesu omariẹ o te kpobọ ugbehru na nyae lẹ evaọ aso yena.

Nọ oke o dina muhọ erie no, Jesu ọ tẹ rọ elo ọvẹre ruẹ okọ nọ ilele riẹ a rrọ na evaọ ugbo. Ofou ọgaga nọ o bi fou o lẹliẹ ẹkporo ọgaga rrọ abade na, yọ “udugaga ilele na a bi ro bi okọ na, fikinọ ofou na ọ rọ so ae.” (Mak 6:48) Jesu o te no ugbehru na nwrotọ, o te mu ilele na họ ẹnyabru evaọ ehru abade na nọ ẹkporo ọ rrọ na. Oke nana yọ ilele na a “bi thabọ te oware wọhọ emaele esa hayo ene no.” (Jọn 6:19) Ilele na a tẹ ruẹ Jesu nọ o bi ru wọhọ ẹsenọ ọ be te nya vrẹ rai, a te muhọ ebo nọ: “Nọ ẹwoho!”—Mak 6:49.

Jesu ọ tẹ tuduhọ ae awọ nọ: “Jọ udu u te owhai otọ! Mẹ wha be ruẹ na; ozọ u mu owhai hi.” Rekọ Pita ọ tẹ ta nọ: “Olori, o tẹ ginọ rrọ nọ owhẹ, ta kẹ omẹ nọ mẹ nya ehru ame na bru owhẹ ze.” Jesu ọ tẹ ta kẹe nọ: “Nyaze!” Pita o te no okọ na ọ tẹ be nya ehru ame na bru Jesu. Rekọ nọ Pita o rri ofou ọgaga na, ozọ u te mu ei, o te muhọ ekiediwo. O te bo nọ: “Olori, siwi omẹ!” Jesu ọ tẹ nwane riẹ obọ, ọ tẹ j’obọ kru rie jẹ ta nọ: “Whẹ nọ o wo ẹrọwọ ọkakao, fikieme who ro wo avro?”—Matiu 14:27-31.

Jesu avọ Pita a tẹ ruọ okọ na, ofou na o te serihọ. Akpọ o te gbe ilele na unu, rekọ u gine fo nọ akpọ o re gbe ai unu? Otẹrọnọ a gine “wuhrẹ no iruo igbunu orọ ebrẹdi na ze,” onọ Jesu ọ rọ ko idu ahwo buobu evaọ umutho euwa jọ nọ e vrẹ na, o hai gbe ai unu hu inọ Jesu ọ nya evaọ ehru ame je ru ofou na serihọ. Ilele na a tẹ rọ uzou kpotọ kẹe be ta nọ: “Whẹ ginọ Ọmọ Ọghẹnẹ.”—Mak 6:52; Matiu 14:33.

U kri hi, a te te oria owowoma jọ nọ ekakọ e vọ nọ a re se Gẹnesarẹt, nọ o rrọ ofẹ obọze ovatha-ọre Kapaniọm. A tẹ da okọ na ji, a tẹ ruọ okpa. Ahwo nọ a rrọ etẹe a vuhu Jesu, te ai te amọfa nọ e rrọ iwhre nọ e kẹle etẹe a tẹ wọ ahwo rai nọ e be mọ bru rie. Nọ enana a tẹ rọ obọ te efọlefọ ewu Jesu, ẹyao rai o ve kpo riẹriẹriẹ.

Whaọ ogbotu ahwo nọ Jesu ọ rọ edhere igbunu ko na a tẹ te riẹ nọ Jesu ọ va rai abọ no. Fikiere nọ ekọ esese nọ i no obọ Taibirias ze i bi te etẹe, ahwo na a tẹ ruọ ekọ na kpobọ Kapaniọm nyae gwọlọ Jesu. Nọ a ruẹ e riẹ a tẹ nọe nọ: “Owuhrẹ, oke vẹ who ro te obonẹ?” (Jọn 6:25) Jesu ọ tẹ whọku ai. Ma te ruẹ oware nọ o soriẹ nọ Jesu ọ rọ whọku ai evaọ uzoẹme nọ o rrọ aro na.