Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 20

Iruo Igbunu avọ Ivẹ nọ Jesu O Ru Evaọ Kena

Iruo Igbunu avọ Ivẹ nọ Jesu O Ru Evaọ Kena

MAK 1:14, 15 LUK 4:14, 15 JỌN 4:43-54

  • JESU Ọ JẸ TA USIUWOMA NỌ “UVIE ỌGHẸNẸ O KẸLE NO”

  • JESU O SIWI ỌMỌZAE JỌ NỌ O THABỌ NO ORIA NỌ Ọ JỌ

Nọ Jesu ọ rria Sameria edẹ ivẹ no, o te kpobọ ẹwho riẹ. Ọ jọ Judia ta usiuwoma oke krẹkri, rekọ orọnọ o bi kpobọ Galili nyai serihọ họ. Ukpoye, o bi kpohọ ẹkwotọ nọ ọ jọ whẹro nyae ruabọhọ iruo odibọgba riẹ, onọ u tube vi onọ o bi ru anwẹdẹ. Ẹsejọhọ ọ riẹ nọ a ti dede iei rehọ họ, keme ọ ta nọ, “ọruẹaro o re wo ọghọ evaọ ẹwho obọriẹ hẹ.” (Jọn 4:44) Ukpenọ ilele riẹ a jọ kugbei, a tẹ vahabọ kpohọ ọvuọ uwou riẹ gbe ọvuọ okọ riẹ.

Kọ ovuẹ vẹ Jesu o je whowho? O je whowho nọ: “Uvie Ọghẹnẹ o kẹle no. Wha kurẹriẹ, je fi ẹrọwọ họ usi uwoma na.” (Mak 1:15) Kọ eme ahwo na a ru? Evaọ uzẹme, ahwo Galili buobu a jẹ Jesu rehọ jẹ kẹe adhẹẹ. Orọnikọ ovuẹ riẹ na ọvo o soriẹ nọ a rọ jẹe rehọ họ. Ahwo Galili jọ a jọ obọ Jerusalẹm kẹ ehaa Ọnyavrẹ na evaọ emerae jọ nọ i kpemu yọ a ruẹ eware igbunu nọ Jesu ọ jọ obei ru.—Jọn 2:23.

Diẹse Jesu ọ jọ mu iruo odibọgba riẹ họ evaọ Galili? U muẹro nọ evaọ Kena, oria nọ ọ jọ zihe ame ruọ udi evaọ ehaa orọo oke ẹdẹ. Nọ Jesu o zihe kpohọ ẹwho yena, a tẹ vuẹe kpahe ọmọzae jọ nọ ọ mọ te uwhu no. Ọmọzae na yọ ọmọ ohwo ologbo jọ evaọ egọmeti Herọd Antipas, ovie nọ o bru uzou Jọn Ọhọahwo-Ame na uwhremu na. Ọsẹ ọmọ na o yo nọ Jesu o bi no Judia kpobọ Kena. Fikiere o te no obọ uwou riẹ evaọ Kapaniọm bi kpobọ Kena re ọ nyae ruẹ Jesu. Nọ ọzae nana nọ ọ rrọ awawa fiki ọmọ riẹ na o te obei, ọ tẹ lẹ Jesu nọ: “Olori, nyaze vẹrẹ re ọmọzae mẹ ọ seba ewhu.”—Jọn 4:49.

Jesu ọ tẹ ta ẹme nọ u gbe ọzae na unu, inọ: “Nya kpo; ẹyao ọmọzae ra o kpo no.” (Jọn 4:50) Ọzae nana nọ o bi ru iruo kẹ Herọd na ọ rọwo ẹme Jesu na, o te muhọ ezihe kpo. Ọ tẹ jọ edhere nyaku idibo riẹ nọ e be nya bru ei ze te vuẹe emamọ usi jọ. A vuẹ riẹ nọ ẹyao ọmọ riẹ o kpo no. Re ọzae na ọ riẹ sọ oke nọ Jesu ọ rọ ta kẹe nọ ẹyao ọmọ riẹ o kpo no na ẹyao na o ro gine kpo, ọ tẹ nọ ae nọ: ‘Uzedhe auwa vẹ ẹyao ọmọ na o ro kpo?’

A tẹ ta kẹe nọ: “Odẹnukpo ifiva na i no rie oma evaọ auwa avọ ihrẹ.”—Jọn 4:52.

Ọzae na ọ tẹ nwane riẹ nọ uzedhe oke ovona Jesu ọ rọ ta kẹe nọ, “Ẹyao ọmọzae ra o kpo no.” Kẹsena ọzae nana nọ o wo idibo na avọ uviuwou riẹ soso a te zihe ruọ ilele Jesu.

Fikiere, eware igbunu ivẹ Jesu ọ jọ Kena ru, o zihe ame ruọ udi, uwhremu na o te je siwi ọmọzae jọ nọ ọ rehọ emaele 16 thabọ no oria nọ ọ rrọ. Orọnikọ iruo igbunu ivẹ nana ọvo o ru hu. Rekọ orọ avọ ivẹ na yọ oware oka keme o ru rie evaọ okenọ ọ nwani zihe kpobọ Galili no. O rrọ vevẹ nọ Jesu yọ ọruẹaro nọ Ọghẹnẹ ọ jẹrehọ. Kọ ‘ọruẹaro nana o ti wo ọghọ evaọ ẹwho obọriẹ’?

Ma te ruẹ epanọ o te jọ nọ Jesu o te te ẹwho riẹ evaọ Nazarẹt no. Eme ọ te via evaọ obei?