Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 32

Eme Uzi na O Kuvẹ Riẹ Evaọ Ẹdijala?

Eme Uzi na O Kuvẹ Riẹ Evaọ Ẹdijala?

MATIU 12:9-14 MAK 3:1-6 LUK 6:6-11

  • O SIWI ỌZAE JỌ NỌ OBỌ RIẸ O KO EVAỌ ẸDIJALA

Evaọ Ẹdijala ọfa jọ, Jesu o te kpohọ uwou-egagọ, ẹsejọhọ evaọ obọ Galili. Ọzae jọ nọ obọ riẹ o ko ọ jọ etẹe. (Luk 6:6) Otu ikere-obe avọ otu Farisi na a bi rri Jesu kiọkiọkiọ. Fikieme? A fere oware nọ o rrọ eva rai via nọ a nọ Jesu nọ: “Kọ u fo re a siwi ohwo evaọ Ẹdijala?”—Matiu 12:10.

Isu egagọ ahwo Ju na a ta nọ a re siwi ohwo nọ ọ be mọ evaọ Ẹdijala ha ajokpanọ ohwo na o te uwhu no. Koyehọ a be ta nọ o thọ re a wholo hayo gba onwa nọ u wiri evaọ Ẹdijala keme ohwo na o ri te uwhu hu. O rrọ vevẹ inọ, orọnikọ otu ikere-obe gbe otu Farisi na a be nọ Jesu onọ yena fikinọ a be re ohrọ ọzae nọ ọ be mọ na ha. A be gwọlọ epanọ a rẹ rọ rehọ uzi gba Jesu.

Rekọ Jesu ọ riẹ iroro ethọthọ nọ e rrọ eva rai. Ọ riẹ nọ a bi si uzi na keke hrọ, inọ Uzi Ọghẹnẹ kpahe Ẹdijala na u te obonọ a be rehọ iẹe na ha. (Ọnyano 20:8-10) Orọnikọ onana họ orọ ọsosuọ nọ a be rọ fo iruo iwoma riẹ hẹ. Kẹsena Jesu ọ tẹ ruẹrẹ afe na họ kẹ oware nọ ahwo na a be gwọlọ na nọ ọ ta kẹ ọzae nọ obọ riẹ o ko na nọ: “Kpama re whọ nyaze udevie na.”—Mak 3:3.

Jesu ọ tẹ rẹriẹ ovao ku otu ikere-obe gbe otu Farisi na jẹ ta kẹ ae nọ: “Otẹrọnọ who wo ogodẹ ọvo, ogodẹ na o te kie fihọ ọgọdọ evaọ Ẹdijala, kọ ohwo jọ ọ rrọ usu rai na nọ ọ rẹ wọe lahwe he?” (Matiu 12:11) Ogodẹ yọ oware nọ ugho u re no ze ziezi, fikiere nọ o te kie fihọ ọgọdọ, a rẹ nya se iẹe ba bọwo okiokiọ riẹ hẹ keme ọ sai whu, igho ohwo nọ o wo rie i ve vru. U te no ere no, ikere na e ta nọ: “Ohwo okiẹrẹe ọ rẹ rehọ ẹro te uzuazọ arao riẹ.”—Itẹ 12:10.

Ọ tẹ rọ oyena wawo ẹme nọ ọ rrọ otọ na, inọ: “Kọ ohwo-akpọ o gbe wo aghae vi ogodẹ? Fikiere, u fo re a ru oware ezi evaọ Ẹdijala.” (Matiu 12:12) Oyena u dhesẹ nọ Jesu ọ be thọ uzi Ẹdijala ha nọ o te siwi ọzae nana. Isu egagọ na a ruẹ ẹme ọvo kpahe kẹ Jesu evaọ ẹme riẹ nana nọ ọ gbunu gbọka na ha. A tẹ fọ kpoko.

Avọ eva nọ e be dha Jesu fiki iroro ethọthọ rai, o te rri wariẹ. Kẹsena ọ tẹ ta kẹ ọzae na nọ: “Riẹ obọ ra.” (Matiu 12:13) Nọ ọzae na ọ riẹ obọ riẹ, o tẹ ruẹrẹhọ. A rẹ ruẹ unu gbiku oghọghọ nọ onana o wha se ọzae na ha, rekọ ẹvẹ o jọ enọ e be gwọlọ rọ uzi gba Jesu na oma?

Ukpenọ eva e rẹ were otu Farisi na inọ obọ ọzae na o ruẹrẹhọ no, a tẹ ruọ otafe, a tẹ nwane nyae gba ẹgwae “kugbe ahwo utu Herọd fiki [Jesu], re a ruẹsi kpei.” (Mak 3:6) O wọhọ nọ ejọ evaọ utu Herọd na e rrọ utu egagọ nọ a re se Sadusi. Whaọ otu Farisi avọ Sadusi na a rẹ gba ha, rekọ obọnana a kugbe no fikinọ a gwọlọ kpe Jesu.