LUK 14:25-35

  • OWARE NỌ OHWO Ọ RẸ KPAIRORO VRẸ RE Ọ SAE JỌ OLELE

Jesu o wuhrẹ ahwo eware sa-sa nọ i wuzou evaọ okenọ ọ jẹ re emu evaọ uwou omọvo isu ahwo Farisi jọ. Nọ Jesu ọ gbẹ rrọ edhere bi kpobọ Jerusalẹm na, ogbotu ahwo a te je lele iei. Fikieme? Kọ a ginẹ gwọlọ jọ uvi ilele Jesu ghelọ oware nọ oyena o te gwọlọ mi ai kẹhẹ?

Nọ a rrọ edhere na, Jesu ọ ta ẹme jọ nọ ọ rẹ sai gbe ahwo jọ unu, inọ: “Otẹrọnọ ohwo jọ ọ nya bru omẹ ze o gbe mukpahe ọsẹ, oni, aye, emọ, inievo-emezae, gbe inievo-emetẹ riẹ hẹ, ẹhẹ, makọ omobọ riẹ dede, ọ sae jọ olele mẹ hẹ.” (Luk 14:26) Kọ eme họ otọ ẹme Jesu na?

Orọnikọ Jesu ọ be ta nọ ohwo kpobi nọ ọ gwọlọ jọ olele riẹ o re gine mukpahe ahwo uviuwou riẹ hẹ. Otọ ẹme riẹ na họ, a re you Jesu vi imoni rai, orọnikọ a rẹ jọ wọhọ ọzae nọ ọ ta kpahe evaọ ọtadhesẹ ehaa emuọriọ ologbo na ha, ọnọ ọ siọ obọdẹ uzizie nọ a zizie i rie fikinọ ọ rọo obọ. (Luk 14:20) Ebaibol na ọ ta nọ Jekọp, ọsẹ anwae ahwo Ju na o “mukpahọ” Lia, o te you Reshẹl, onọ u dhesẹ nọ o you Lia te epanọ o you Reshẹl he.—Emuhọ 29:31.

Muẹrohọ nọ Jesu ọ ta nọ olele riẹ o re mukpahe “makọ omobọ riẹ,” koyehọ uzuazọ riẹ. Onana u dhesẹ nọ uvi olele o re you Jesu vi uzuazọ riẹ, tube siobọno uzuazọ riẹ dede nọ o tẹ gwọlọ ere. O rrọ vevẹ inọ re ohwo ọ jọ olele Jesu yọ owha-iruo ulogbo. O rrọ oware nọ ohwo ọ rẹ họrọ ro hayo rri jeve jeve he, rekọ o gwọlọ nọ ọ rẹ romatotọ roro kpahe iẹe tao.

Olele ọ rẹ sae rẹriẹ ovao dhe ẹgaga gbe ukpokpoma, keme Jesu ọ ta nọ: “Ohwo kpobi nọ ọ wọ ure-oja riẹ je lele omẹ hẹ ọ sae jọ olele mẹ hẹ.” (Luk 14:27) Ẹhẹ, u re no uvi olele Jesu eva ze re o thihakọ ebẹbẹ sa-sa wọhọ epanọ Jesu o ru na. Jesu ọ tubẹ ta nọ ewegrẹ riẹ i ti kpei.

Fikiere u fo nọ ogbotu ahwo nọ a bi lele Jesu kpohọ erẹ na a rẹ romatotọ roro kpahe oware nọ o gwọlọ re ohwo ọ jọ olele Jesu. Jesu ọ rọ ọtadhesẹ ru onana vẹ, inọ: “Wọhọ oriruo, ono evaọ usu rai ọ rẹ gwọlọ bọ uwou nọ ọ rẹ kake keria tao ho re o roro araha na sọ ugho riẹ u ti tei bọe re? O gbẹ rrọ ere he, ọ sae wọ otọhotọ uwou na họ rekọ ọ sae bọe re he.” (Luk 14:28, 29) Fikiere, taure ahwo nọ a gbẹ rrọ onya bi kpohọ Jerusalẹm na a te ti zihe ruọ ilele Jesu, a rẹ gbaemu inọ a ti ru oware kpobi nọ oyena o gwọlọ. Jesu ọ rọ ọtadhesẹ ọfa ru onana vẹ.

Ọ ta nọ: “Kọ ovie vẹ nọ ọ be nyae za ovie ọfa dhe evaọ ẹmo ọ rẹ kake keria tao ho re o lele ekiroro riẹ jiroro sọ ọ te sae rehọ egbaẹmo idu ikpe (10,000) họre ovie ọdekọ nọ ọ wha egbaẹmo idu udhe (20,000) ze te họre iẹe? Otẹrọnọ ọ te sae họre iẹe he, nọ ovie ọdekọ na ọ gbẹ rrọ ugbothabọ na, o ve vi enyukọ nyae lẹe inọ ọ gwọlọ udhedhẹ.” Re Jesu o gbe ru ẹme na vẹ, ọ ta nọ: “Ere ọvona re, jọ wha riẹ vevẹ inọ ohwo kpobi evaọ usu rai nọ ọ kpairoro vrẹ eyero riẹ kpobi hi ọ sae jọ olele mẹ hẹ.”—Luk 14:31-33.

 Evaọ uzẹme, orọnikọ ogbotu nọ o bi lele Jesu na ọvo ọ be ta ẹme na kẹ hẹ. U re no ohwo kpobi nọ o wuhrẹ kpahe Jesu eva ze re o ru lele eme nana nọ ọ ta na. Onana u dhesẹ nọ a re gbobọnẹ eware kpobi nọ a wo nọ o tẹ gwọlọ ere, eware wọhọ eyero rai makọ uzuazọ rai, otẹrọnọ a gwọlọ jọ olele Jesu. Oyena yọ oware nọ ohwo o re roro jẹ lẹ kpahe.

Kẹsena Jesu o te fi ẹme jọ họ otọ, onọ ọ ta no vẹre evaọ Ovuẹ obọ Ugbehru riẹ na inọ ilele riẹ họ “uwhei akpọ na.” (Matiu 5:13) Ẹsejọhọ ẹme nọ ọ be ta na họ, wọhọ epanọ a rẹ rọ uwhei rawo oware re o seba egbo na, ere ilele riẹ a bi fiobọhọ kẹ ahwo whaha uruemu ugbogbo nọ o rẹ sae raha usu rai kugbe Ọghẹnẹ. Whaọ, obọnana nọ iruo odibọgba riẹ i bi te ekuhọ no na, ọ tẹ ta nọ: “Uzẹme riẹ họ, uwhei u woma. Rekọ otẹrọnọ uwhei u te ku awere riẹ fiẹ, kọ eme a sae rọ wariẹ ru ei were?” (Luk 14:34) Ahwo nọ a jẹ gaviezọ kẹe na a riẹ nọ u wo oghẹrẹ uwhei jọ nọ u woma tere he, nọ a rehọ eware efa jọ gua, yọ o rẹ gbẹ nwani wo awere tere he.

Fikiere Jesu ọ be ta nọ makọ enọ e rrọ ilele riẹ kri no a rẹ daoma rai kpobi re a seba ewhrehe evaọ egagọ Ọghẹnẹ. Oyena o tẹ via kẹ ae, a rẹ wọhọ uwhei nọ u ku awere riẹ fiẹ nọ u gbe wo iruo ho. Kẹsena ahwo-akpọ a vẹ te rehọ ae se ẹkoko. Mai yoma na, a vẹ te raha usu rai kugbe Ọghẹnẹ, jẹ tubẹ wha ekela se Ọghẹnẹ dede. Jesu ọ fodẹ epanọ u wuzou te re ma yọroma kpahe oyena nọ ọ ta nọ: “Jọ ọnọ o wo ezọ nọ o re ro yo, o yo.”—Luk 14:35.