Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 87

Wo Areghẹ re Whọ Ruẹrẹ Oma Kpahe kẹ Obaro

Wo Areghẹ re Whọ Ruẹrẹ Oma Kpahe kẹ Obaro

LUK 16:1-13

  • ỌTADHESẸ ORIEYERO NỌ O KIẸRẸE HE NA

  • RỌ EFE RA “MU EGBẸNYUSU”

U fo nọ ọtadhesẹ ọmọ nọ o vru nọ Jesu ọ nwane ta kpahe no evaọ iraro enọ i re mi osa-uzou, otu ikere-obe gbe otu Farisi na, u re fiobọhọ kẹ ae riẹ nọ Ọghẹnẹ ọ rẹ rọvrẹ erahaizi nọ i kurẹriẹ. (Luk 15:1-7, 11) Kẹsena Jesu ọ tẹ rẹriẹ ovao ku ilele riẹ. Ọ rọ ọtadhesẹ ọfa ta ẹme kẹ ae, orọ ọdafe jọ nọ a vuẹ inọ orieyero riẹ ọ be riẹ ru hu.

Jesu ọ ta nọ ahwo a nya bru ọdafe na ze, jẹ ta kẹe nọ orieyero riẹ ọ be raha eware riẹ kufiẹ. Fikiere olori na ọ tẹ ta nọ o ti si orieyero na no iruo. Orieyero na ọ tẹ ta kẹ omobọ riẹ nọ: “Eme me re ru, nọ olori mẹ o bi si omẹ no iruo orieyero no na? Mẹ goma te epanọ me re ro kporo udhu hu, yọ oma ẹyare o rẹ vuọ omẹ.” Re ọ ruẹrẹ oma kpahe kẹ obaro, ọ tẹ ta nọ: “Mẹ riẹ oware nọ me ti ru re nọ a te si omẹ no iruo orieyero na no, ahwo a ve ti dede omẹ rehọ fihọ iwou rai.” Ọ tẹ nwani se enọ e reosa olori riẹ, ọ tẹ nọ ọrọ ọsosuọ nọ: “Ẹvẹ eware nọ whọ reosa olori mẹ i bu te?”—Luk 16:3-5.

Ọ tẹ ta kẹe nọ: “Ekana ewhri olivi udhusoi,” koyehọ ilita idu ivẹ gbe egba ivẹ (2,200). Ẹsejọhọ ohwo nana ọhreki ologbo hayo o wo ọgbọ olivi nọ ọ rrọ ruaro. Orieyero na ọ tẹ ta kẹe nọ: “Mi omẹ obe agrimeti ra whọ keria re who kere udhuvẹ gbe ikpe [koyehọ ilita odu ọvo gbe ẹgba ọvo] fihọ iẹe vẹrẹ vẹrẹ.”—Luk 16:6.

Orieyero na ọ tẹ nọ omọfa nọ ọ reosa olori riẹ nọ: “Kọ whẹ omara, ẹvẹ eware nọ whọ reosa rai i bu te?” Ọ tẹ kpahe kẹe nọ: “Edrọmo eka udhusoi.” Koyehọ eka nọ e rẹ vọ ilita idu udhegbivẹ (22,000). Orieyero na ọ tẹ ta kẹ ọzae na nọ: “Mi omẹ obe agrimeti ra re who kere udhone fihọ iẹe.” Koyehọ edrọmo eka 20 o sino kẹe na.—Luk 16:7.

Orieyero na ọ gbẹ be rẹrote eware olori riẹ, fikiere ma sae ta nọ o gbe wo udu nọ o re ro sino osa nọ ahwo na a re olori riẹ na. O sino osa nọ ahwo na a re na re ọ rọ ere mu ogbẹnyusu kugbe ahwo nọ a rẹ sai fiobọhọ kẹe nọ a te si ei no iruo.

Uwhremu na olori na o te ti yo oware nọ orieyero riẹ na o ru. Dede nọ oware nọ orieyero na o ru na u kiekpe olori na, olori na o jiri rie keme “dede nọ o kiẹrẹe he,” orieyero na “o ru oware areghẹ.” Jesu ọ ta haro nọ: “Emọ uyero-akpọ nana a wo areghẹ vi emọ elo na evaọ oghẹrẹ nọ a bi ro yeri kugbe ahwo oge rai.”—Luk 16:8.

Orọnikọ Jesu ọ be ta nọ oware nọ orieyero na o ru na u woma ha, yọ orọnikọ ọ be ta nọ u fo re a fi iwhayo ho evaọ eware ekiọthuọ. Eme Jesu ọ be rọ iku nana wuhrẹ na? Ọ ta kẹ ilele riẹ nọ: “Wha rehọ efe akpọ nana nọ o kiẹrẹe he na ro mu egbẹnyusu kẹ omarai, re nọ itieye i te re no, a ve ti dede owhai rehọ ruọ oria ẹria ebẹdẹ bẹdẹ.” (Luk 16:9) Ẹhẹ, ma bi wuhrẹ no iku nana ze nọ ma re wo areghẹ jẹ ruẹrẹ oma kpahe kẹ obaro. U fo nọ “emọ elo na” koyehọ idibo  Ọghẹnẹ a rẹ rehọ eyero rai ru iruo avọ areghẹ, re a sae rọ ere wo eghale ebẹdẹ bẹdẹ.

Jihova Ọghẹnẹ avọ Ọmọ riẹ ọvo a rẹ sai rovie uvẹ kẹ ohwo re ọ ruọ Uvie odhiwu hayo Aparadase otọakpọ. U fo nọ ma rẹ daoma re ma mu usu kugbe aimava na, ẹkwoma eyero mai nọ ma rẹ rọ tha iruo Uvie na uke. Ma te ru ere, ma ti wo imuẹro uzuazọ ebẹdẹ bẹdẹ evaọ okenọ igoru, isiliva, gbe ekwakwa efe efa i gbe ti wo iruo ho.

Jesu ọ tẹ jẹ ta nọ ahwo nọ a be rọ ekwakwa efe gbe eyero rai ru iruo evaọ emamọ edhere, a te sae rẹrote eware efa nọ i wuzou vrẹ ere. Ọ ta nọ: “Fikiere, otẹrọnọ wha jọ abọ efe akpọ nana nọ o kiẹrẹe he na dhesẹ nọ a re fievahọ owhai hi, ono ọ te kẹ owhai efe nọ o kiẹrẹe [koyehọ eware nọ i kiekpahe Uvie na]?”—Luk 16:11.

Jesu ọ be rọ onana dhesẹ kẹ ilele riẹ nọ o te gwọlọ eware buobu mi ae, otẹrọnọ a re dede ae rehọ “ruọ oria ẹria ebẹdẹ bẹdẹ.” O lọhọ họ re ohwo ọ jọ uvi odibo Ọghẹnẹ jẹ rọ oke riẹ kpobi le ekwakwa efe. Jesu o ku ẹme riẹ na họ nọ: “Odibo ọvo ọ rẹ sae gbodibo kẹ ilori ivẹ hẹ, o re mukpahe ọjọ o ve you ọdekọ hayo ọ rẹ talamu ọjọ ọ vẹ siọ ọdekọ. Wha sae gbodibo kẹ Ọghẹnẹ gbe Efe he.”—Luk 16:9, 13.