Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 89

Jesu O Wuhrẹ Ahwo Evaọ Pẹria nọ O je Kpobọ Judia

Jesu O Wuhrẹ Ahwo Evaọ Pẹria nọ O je Kpobọ Judia

LUK 17:1-10 JỌN 11:1-16

  • EPANỌ U YOMA TE RE A RU OMỌFA ZORUẸ

  • HAE RỌVRẸ RE WHO JE WO ẸRỌWỌ

Anwọ oke jọ ze na, Jesu ọ rrọ oria jọ evaọ “abọdekọ Jọdan” nọ a re se Pẹria. (Jọn 10:40) Obọnana ọ be nya ri ofẹ obọze ovatha-ọre Jerusalẹm.

Orọnikọ Jesu ọvo o bi kpohọ erẹ na ha. Ilele riẹ, gbe “ogbotu obuobu” onọ u kugbe ahwo nọ a re mi osa-uzou gbe erahaizi a rrọ kugbei re. (Luk 14:25; 15:1) Otu Farisi gbe ikere-obe nọ e be wọso Jesu na a jọ etẹe re. U fo nọ a re roro kpahe eware sa-sa nọ Jesu o wuhrẹ i rai evaọ ọtadhesẹ ogodẹ nọ o vru na, ọrọ ọmọ nọ o vru na gbe ọrọ ọdafe na avọ Lazarọs.—Luk 15:2; 16:14.

Kẹsena Jesu ọ tẹ rẹriẹ ovao ku ilele riẹ re o wuhrẹ ae oware jọ, yọ ẹsejọhọ o ru onana fiki eme iyoma nọ ahwo ọwọsuọ na a jẹ ta kẹe kẹle na. Jesu o wuhrẹ i rai eware jọ nọ o wuhrẹ no vẹre nọ ọ jọ obọ Galili.

Wọhọ oriruo, Jesu ọ ta nọ: “Eware nọ e rẹ wha ezoruẹ ze e rẹ nyaze hrọ. Rekọ uye u te ọnọ ọ be wha eware yena ze! . . . Wha yọroma. Otẹrọnọ oniọvo ra o ru owhẹ thọ, whọku ei, o te kurẹriẹ, rọvrẹ riẹ. Ọ tẹ maki ru owhẹ thọ isiahrẹ evaọ okpẹdẹ, o je zihe bru owhẹ ze isiahrẹ, be ta nọ, ‘Rọvrẹ omẹ, me ru thọ,’ whọ rẹ rọvrẹ riẹ hrọ.” (Luk 17:1-4) Ẹsejọhọ ẹme nọ Jesu ọ ta kpahe erọvrẹ na o kareghẹhọ Pita onọ nọ ọ nọ Jesu sọ u fo re a rọvrẹ ohwo te isiahrẹ.—Matiu 18:21.

Kọ ilele na a te sai gine ru lele eme Jesu na? Okenọ ilele na a ta kẹ Jesu nọ, “Tua ẹrọwọ mai,” Jesu ọ kẹ rai imuẹro nọ: “Wha te wo ẹrọwọ nọ ọ make kawo wọhọ ubi mọstad, wha te ta kẹ ure ifigi nana nọ, ‘Wolo no etenẹ kpobọ abade na!’ u ti yoẹme kẹ owhai.” (Luk 17:5, 6) Ẹhẹ, makọ ẹrọwọ ọkakao dede o re ru eware ilogbo.

Kẹsena Jesu o te wuhrẹ ikọ riẹ epanọ u wuzou te re a wo omaurokpotọ, re a siọ igabọ ba ẹwọ kpehru, ọ ta nọ: “Ono evaọ usu rai nọ o wo ọrigbo nọ o bi kporo udhu hayo rẹrote uthuru ọ rẹ ta kẹe okenọ o te no obọ ẹwọ ze inọ, ‘Ziọ etenẹ ovavo whọ keria te re emu’? Ukpoye, ogbẹrọnọ ọ te ta kẹe nọ, ‘Ruẹrẹ oware jọ họ kẹ emu owọwọ mẹ, je ku eprọno họ re whọ gbodibo kẹ omẹ bẹsenọ mẹ rẹ re jẹ da no, kẹsiẹe whọ vẹ tẹ re jẹ da’? O ti yere ọrigbo na ha keme iruo nọ ọ kẹ riẹ o ru na, manikọ o ti ru ere? Ere ọvona re, nọ wha te ru eware kpobi nọ a kẹ owhai nọ wha ru no, wha vẹ ta nọ: ‘Mai yọ erigbo nọ i fioka ha. Onọ u te omai eruo ma ru na.’”—Luk 17:7-10.

U fo nọ idibo Ọghẹnẹ kpobi a re vuhumu epanọ u wuzou te re a rọ egagọ Ọghẹnẹ karo. U te no ere no, u fo nọ mai kpobi ma rẹ kareghẹhọ nọ uvẹ-ọghọ ulogbo o rrọ re ma gọ Jihova jẹ jọ omọvo enọ e rrọ uviuwou riẹ.

O wọhọ nọ oke nana o nwane vrẹ no, ohwo nọ Meri avọ Mata a vi bru Jesu ọ tẹ nyaze. Meri avọ Mata yọ inievo Lazarọs, yọ aimasa a be rria ẹwhọ Bẹtani nọ ọ rrọ Judia. Ohwo nọ a vi ze na ọ ta nọ: “Olori, ọnọ who you na ọ be mọ.”—Jọn 11:1-3.

Dede nọ a vuẹ Jesu nọ ogbẹnyusu riẹ Lazarọs ọ be mọ gaga, onana u ru ọkora fihọ Jesu oma ha. Ukpoye, Jesu ọ ta nọ: “Ẹyao nana orọnikọ ọrọ uwhu hu, rekọ re o wha oruaro se Ọghẹnẹ, re a rọ ẹkwoma riẹ kẹ Ọmọ Ọghẹnẹ oruaro.” Jesu ọ daji oria nọ ọ jọ na edẹ ivẹ, kẹsena ọ tẹ ta kẹ ilele riẹ nọ: “Wha joma wariẹ kpobọ Judia.” Rekọ onana o were ilele na ha, a ta kẹ Jesu nọ: “Owuhrẹ, u ri kri hi nọ ahwo Judia a jẹ gwọlọ rọ itho fi owhẹ, kọ whọ be wariẹ kpohọ obei?”—Jọn 11:4, 7, 8.

Jesu ọ tẹ kpahe kẹ ae nọ: “Euwa ikpegbivẹ e rrọ aruvo, o gbẹ rrọ ere? Ohwo ọ tẹ be nya evaọ aruvo, o re kpawọ họ oware ovo ho keme ọ be ruẹ elo akpọ nana. Rekọ ohwo ọ tẹ be nya evaọ aso, o re kpawọ họ eware keme ọ be ruẹ elo ho.”  (Jọn 11:9, 10) Ẹsejọhọ ẹme nọ Jesu ọ be ta na họ oke nọ Ọghẹnẹ ọ kẹ riẹ rọkẹ iruo odibọgba riẹ u ri kuhọ họ. Bẹsenọ u re kuhọ, o gwọlọ nọ Jesu ọ rẹ rehọ umutho oke riẹ nọ u kiọkọ na ru iruo ziezi.

Jesu ọ ta haro nọ: “Lazarọs ogbẹnyusu mai ọ be wezẹ, rekọ mẹ be nya re mẹ rọwo iẹe ze.” Ẹsejọhọ fikinọ ilele na a je roro nọ owezẹ gheghe Jesu ọ be ta kpahe, a tẹ ta kẹe nọ: “Olori, otẹrọnọ ọ be wezẹ, oma riẹ o te ga.” Kẹsena Jesu ọ tẹ ta kẹ ae vevẹ nọ: “Lazarọs o whu no . . . Rekọ wha joma nyae ruẹ e riẹ.”—Jọn 11:11-15.

Fikinọ Tọmọs ọ riẹ nọ ẹsejọhọ a sae jọ obọ Judia kpe Jesu no, yọ ọ gwọlọ nọ ọ rẹ jọ kugbei re ọ thae uke, ọ tẹ ta kẹ ibe ilele riẹ nọ: “Wha joma nya re, re ma ruẹsi lele iei whu.”—Jọn 11:16.