JỌN 11:38-54

  • ẸKPAROMATHA LAZARỌS

  • OGBẸGWAE SANHẸDRIN A JIRORO NỌ A RE KPE JESU

Nọ Jesu ọ jọ ughe Bẹtani zere Mata no jẹ te ruẹ Meri no uwhremu na, aikpobi a te kpobọ uki Lazarọs. Uki na yọ eghogho utho nọ a rehọ utho ruru unu riẹ. Jesu ọ tẹ ta nọ: “Wha ghelie utho na no.” Fikinọ Mata ọ riẹ oware nọ Jesu ọ gwọlọ ru hu, ọ tẹ ta nọ: “Olori, o ti muhọ egbo no enẹna, keme anwọ edẹ ene na.” Rekọ Jesu ọ tẹ ta kẹe nọ: “Kọ mẹ gbẹ ta kẹ owhẹ nọ whọ tẹ rọwo whọ te ruẹ oruaro Ọghẹnẹ?”—Jọn 11:39, 40.

Fikiere a te ghelie utho na no. Jesu ọ tẹ kpare ovao riẹ kpehru jẹ lẹ nọ: “Ọsẹ, me bi yere owhẹ inọ who yo olẹ mẹ. Uzẹme, mẹ riẹ nọ who re yo olẹ mẹ ẹsikpobi; rekọ mẹ ta onana fiki ogbotu nọ a dikihẹ etenẹ na, re a sae rọwo nọ whẹ o vi omẹ ze.” Olẹ nọ Jesu ọ lẹ evaọ ẹgbede  na u ru ahwo nọ a jọ etẹe kpobi riẹ nọ ogaga Ọghẹnẹ o ti ro ru oware nọ ọ gwọlọ ru na. Kẹsena Jesu o te bo avọ urru oruarua inọ: “Lazarọs, nya via!” Lazarọs ọ tẹ ginẹ nya via avọ abọ gbe awọ riẹ nọ a rọ ehọ variẹ, yọ a rọ ohọ variẹ ovao riẹ re. Jesu ọ tẹ ta nọ: “Wha si ehọ na noi oma re ọ nyavrẹ.”—Jọn 11:41-44.

Nọ ahwo Ju buobu nọ a nyaze te sasa Mata avọ Meri oma a ruẹ oware igbunu nana a te fi ẹrọwọ họ Jesu. Rekọ efa e tẹ nyae vuẹ otu Farisi na oware nọ Jesu o ru. Otu Farisi na avọ ilori izerẹ na a te se ogbẹgwae Sanhẹdrin kokohọ. Omọvo rai jọ họ Kayafas, ọnọ ọ jọ ozerẹ okpehru. Ejọ evaọ usu rai a te bi bruenu nọ: “Eme ma re ru, keme ọzae nana o bi ru eware eka buobu? Ma te vu ei wa re o gbe ru eware nana, ahwo na kpobi a ti fi ẹrọwọ họ iẹe, ahwo Rom a vẹ te nyaze a vẹ rehọ etẹmpol mai gbe orẹwho mai no.” (Jọn 11:47, 48) Dede nọ ahwo nana a yo “eware eka buobu” nọ Jesu o ru no, eva e be were ezae nana ha inọ Ọghẹnẹ ọ be rehọ iẹe ru eware igbunu. Oware nọ o mae rrọ ahwo nana oja họ ọkwa gbe okpodẹ rai.

Lazarọs nọ Jesu ọ kpare no uwhu ze na u ru oma lọhọ otu Sadusi na, keme a rọwo ẹkparomatha vievie he. Kayafas nọ ọ rrọ omọvo otu Sadusi na ọ tẹ ta nọ: “Wha riẹ oware ovo vievie he, yọ wha ri tube roro iei hi inọ o rrọ kẹ erere rai re omọvo o whu rọkẹ ahwo na kpobi viukpenọ a rẹ raha orẹwho na soso.”—Jọn 11:49, 50; Iruẹru Ikọ 5:17; 23:8.

Fikinọ Kayafas ọ jọ ozerẹ okpehru ukpe yena, o soriẹ nọ Ọghẹnẹ o ro ru ei ta ẹme yena, orọnikọ “iroro obọriẹ” ọ rọ ta ẹme na ha. Otọ ẹme Kayafas na họ o gwọlọ nọ a re kpe Jesu re oware ovo o gbẹ via kẹ ọkwa gbe okpodẹ isu egagọ ahwo Ju na ha. Ghele na, eruẹaruẹ Kayafas na u dhesẹ nọ uwhu Jesu o te jọ ẹtanigbo rọkẹ ahwo Ju gbe “emọ Ọghẹnẹ [kpobi] nọ e vaha ruọ eria sa-sa.”—Jọn 11:51, 52.

Ẹme Kayafas na o ru nọ ogbẹgwae Sanhẹdrin na o rọ gbaemu nọ a re kpe Jesu. Kọ o sae jọnọ Nikodimọs, ogbẹnyusu Jesu nọ ọ rrọ omọvo ogbẹgwae Sanhẹdrin na họ ọnọ ọ fere omaa na via kẹ Jesu? Oghẹrẹ nọ Jesu o ro yo kẹhẹ, o no ẹkwotọ Jerusalẹm okioke yena re o gbe whu hu taure oke nọ Ọghẹnẹ o fihọ u te ti te.