LUK 1:5-33

  • GEBRIẸL UKỌ-ODHIWU NA Ọ TA KPAHE EYẸ JỌN ỌHỌAHWO-AME NA

  • GEBRIẸL Ọ VUẸ MERI KPAHE EYẸ JESU

Ma sae ta nọ oma Ebaibol na kpobi yọ ovuẹ nọ u no obọ Ọghẹnẹ ze. Ọsẹ obọ odhiwu mai họ ọnọ ọ rehọ e riẹ kẹ omai re o kẹ omai ọkpọvio. Rekọ joma ta kpahe obọdẹ evuẹ ivẹ jọ nọ i no obọ Ọghẹnẹ ze anwọ ikpe nọ e vrẹ idu ivẹ (2,000). Ukọ-odhiwu nọ a re se Gebriẹl nọ “o re dikihẹ aro Ọghẹnẹ” họ ọnọ ọ wha evuẹ na ze. (Luk 1:19) Oghẹrẹ ahwo vẹ ọ rọ obọdẹ evuẹ yena se?

Gebriẹl ọ wha evuẹ na ze oware wọhọ ẹgbukpe gbọ taure a te ti yẹ Jesu. Kọ diẹse ọ jọ vuẹ uwou ọsosuọ? Ẹwho Judia nọ ikpehru e rrọ, yọ o wọhọ nọ oria nana u thabọ no Jerusalẹm hu. Etẹe ozerẹ Jihova jọ nọ a re se Zekaraya ọ jẹ rria. Ọzae nana avọ aye riẹ Ẹlizabẹt a kpako no yọ a wo ọmọ họ. Whaọ Zekaraya họ ozerẹ nọ u te, nọ o re ru iruo evaọ etẹmpol Ọghẹnẹ nọ o rrọ Jerusalẹm. Nọ Zekaraya ọ jọ eva etẹmpol na, idudhe na Gebriẹl ọ tẹ romavia kẹle agbada-idhe insẹnse na.

Ozọ u te mu Zekaraya gaga wọhọ epanọ o rẹ sae jọ kẹ ohwo kpobi na. Rekọ Gebriẹl ọ tẹ ta kẹe nọ: “Jọ ozọ u mu owhẹ hẹ, Zekaraya, keme a yo olẹ-ayare ra no, aye ra, Ẹlizabẹt o ti yẹ ọmọzae kẹ owhẹ, who ve se odẹ riẹ Jọn.” Gebriẹl o te fibae nọ, Jọn “ọ te jọ ruaro evaọ aro Jihova,” yọ ọ te “ruẹrẹ ahwo họ kẹ Jihova.”—Luk 1:13-17.

Zekaraya ọ rọwo nọ oware utioye o sae via vievie he. Fikieme? Fikinọ avọ aye riẹ a kpako gaga no. Fikiere Gebriẹl ọ tẹ ta kẹe nọ: “Who ti dienu, whọ te sae ta ẹme he bọo ẹdẹ nọ eware nana i re rugba no, keme whọ rọwo eme mẹ hẹ.”—Luk 1:20.

Oke nana kpobi yọ u bi gbe ahwo nọ a rrọ obọ otafe unu oware nọ Zekaraya o je lehie etẹmpol na tere. Nọ ọ nyaze no, ọ gbẹ jẹ sae ta ẹme he, kọ abọ ọvo o je ro dhesẹ oware nọ ọ gwọlọ ta. U muẹro nọ ọ ruẹ oware urirẹ jọ evaọ etẹmpol na.

Nọ etoke iruo Zekaraya evaọ etẹmpol na u kuhọ no, o te zihe kpo. U kri hi, aye riẹ Ẹlizabẹt o te gine dihọ. Nọ Ẹlizabẹt ọ be hẹrẹ oke eyẹ riẹ na, ọ tẹ kuoma dhere ahwo emerae isoi.

Kẹsena Gebriẹl ọ tẹ wariẹ romavia. Rọkẹ ono? Ọmọtẹ jọ nọ ọ re rọo ho nọ a re se Meri nọ ọ be rria ẹwho Nazarẹt evaọ Galili. Kọ eme ukọ-odhiwu na ọ ta kẹe? Ọ ta kẹ Meri nọ: “Who wo aruoriwo evaọ aro Ọghẹnẹ. Rri! Who ti dihọ who ve ti yẹ ọmọzae, yọ who re se odẹ riẹ Jesu. Ọ te jọ ruaro yọ a ti sei Ọmọ Ọnọ Ọ Mai Kpehru na, . . . ọ te jọ Ovie nọ o ti su uwou Jekọp bẹdẹ bẹdẹ, yọ Uvie riẹ u ti wo oba ha.”—Luk 1:30-33.

Avro ọ riẹ hẹ, Gebriẹl o rri rie wọhọ uvẹ-ọghọ re ọ nya iwou ivẹ nana nọ Ọghẹnẹ o vi rie na. Nọ ma ti gbe se kpahe Jọn gbe Jesu na, ma te ruẹ vevẹ oware nọ evuẹ nana nọ i no obọ odhiwu ze na i ro wuzou gaga.