Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 8

A Dhẹ Vabọ No Obọ Osu Ọgeva

A Dhẹ Vabọ No Obọ Osu Ọgeva

MATIU 2:13-23

  • ỌSẸGBONI JESU A REHỌ E RIẸ DHẸ KPOBỌ IJIPTI

  • JOSẸF AVỌ UVIUWOU RIẸ A KWA KPOBỌ NAZARẸT

Josẹf ọ rọwo Meri no owezẹ ze evaọ aso re ọ vuẹe uwou jọ nọ o gwọlọ nọ a rẹ jọ j’owọ kpata kpata. Ẹnjẹle Jihova ọ jọ ewezẹ ta kẹe nọ: “Kpama, rehọ ọmọ na avọ oni riẹ re wha dhẹ kpobọ Ijipti, wha vẹ jọ obei bẹsenọ mẹ te ta onọ who re ru kẹ owhẹ, keme uviemenẹ Herọd ọ be te gwọlọ ọmọ na re o kpei no.”—Matiu 2:13.

Asoaso yena, Josẹf avọ Meri a tẹ rehọ ọmọ rai dhẹ. A riẹ ru nọ a rọ dhẹ asoaso yena, keme Herọd ọ tẹ te riẹ nọ ebuẹva-isi na a viẹ riẹ họ no. Ọ ta kẹ ae nọ a zihe bru rie re a vuẹe oria nọ ọmọ na ọ rrọ. Rekọ a ru ere he, ukpoye, a tẹ rọ edhere ọfa kpo. Eva e tẹ dha Herọd thesiwa. Fikinọ ọ gwọlọ rọ oghẹrẹ kpobi kpe Jesu, o te j’uzi nọ a kpe emezae kpobi nọ e rrọ umuo ikpe ivẹ kpotọ evaọ Bẹtlẹhẹm gbe ewho nọ e wariẹ Bẹtlẹhẹm họ. Ẹme nọ Herọd o yo no unu ebuẹva-isi nọ i no obọ Ovatha-Ọre ze na u ru rie riẹ nọ Jesu ọ te sae vrẹ ikpe ivẹ no ho.

A rẹ ruẹ unu gbiku edada nọ emezae nana nọ a kpe kufiẹ na o wha ze he. Ma riẹ unu emezae nọ a kpe he, rekọ oviẹ gbe ubo ini emọ nana u ru eruẹaruẹ Jerimaya ọruẹaro Ọghẹnẹ na gba.—Jerimaya 31:15.

Evaọ oke yena, yọ Josẹf avọ Meri a rọ Jesu dhẹ kpobọ Ijipti no, kọ obei a jẹ rria. Kẹsena evaọ aso ẹdẹjọ, ẹnjẹle Jihova ọ tẹ romavia kẹ Josẹf evaọ ewezẹ jẹ ta kẹe nọ: “Kpama, rehọ ọmọ na avọ oni riẹ re wha kpobọ ẹkwotọ Izrẹl, keme enọ e jẹ gwọlọ uzuazọ ọmọ na kpe a whu no.” (Matiu 2:20) Josẹf ọ tẹ riẹ nọ oke u te no nọ ọ sai ro zihe kpobọ ẹwho riẹ. Onana u ru eruẹaruẹ Ebaibol ọfa jọ gba nọ o ta nọ a ti se Ọmọ Ọghẹnẹ no Ijipti ze.—Hosia 11:1.

Ẹsejọhọ Josẹf ọ jiroro nọ obọ Judia ọ rẹ kwa uviuwou riẹ kpohọ, oria nọ a jẹ rria taure a tẹ  te dhẹ kpobọ Ijipti, yọ o wọhọ nọ ẹwho nana ọ kẹle Bẹtlẹhẹm. Rekọ o te yo nọ Akẹlọs ọmọ ọgeva Herọd họ ovie Judia enẹna. Ọghẹnẹ ọ tẹ wariẹ jọ ewezẹ vẹvẹ Josẹf unu. Fikiere Josẹf avọ uviuwou riẹ a tẹ nya thabọ kpobọ Nazarẹt nọ ọ rrọ ẹkwotọ Galili, yọ ẹwho nana o thabọ no Jerusalẹm oria nọ ahwo Ju a re kpohọ nyae gọ. Ẹwho nana Jesu ọ jọ whẹro, onana u te je ru eruẹaruẹ ọfa gba nọ o ta nọ: “A re ti sei ohwo Nazarẹt.”—Matiu 2:23.