Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 9

Ọ Whẹro Evaọ Nazarẹt

Ọ Whẹro Evaọ Nazarẹt

MATIU 13:55, 56 MAK 6:3

  • JOSẸF AVỌ MERI A MU EMỌ HỌ EYẸ

  • JESU O WUHRẸ IRUO

Ẹwho ọsese jọ nọ ahwo a riẹ tere he nọ a re se Nazarẹt Jesu ọ jọ whẹro. Ẹwho nana ọ rrọ ofẹ ẹkpẹlobọ ovatha-ọre Judia evaọ Galili nọ ikpehru e rrọ, yọ o dina whomahọ abọ ukiediwo-ọre abade ologbo jọ nọ a re se Abade Galili.

U muẹro nọ oke nọ Jesu ọ jọ ikpe ivẹ Josẹf avọ Meri a rọ rehọ iẹe no obọ Ijipti ziọ ẹwho nana. O wọhọ nọ Jesu ọvo họ ọmọ nọ ọ jarae obọ oke yena. Rekọ uwhremu na, a te ti yẹ emezae efa—Jemis, Josẹf, Saemọn, gbe Judas. Josẹf avọ Meri a yẹ emetẹ re. O tẹ kawo, Jesu o wo inievo emetẹ gbe emezae ezeza.

Jesu o wo imoni re. Ejọ họ, Ẹlizabẹt avọ ọmọ riẹ Jọn nọ ma fodẹ no vẹre na. Jọn ọ be rria Judia nọ o rrọ ofẹ obọze ovatha-ọre, nọ o rehọ emaele buobu thabọ no Nazarẹt. Omoni Jesu ọfa họ Salomi nọ ọ be rria Galili, yọ o wọhọ nọ aye nana oniọvo Meri, koyehọ oniọvo oni Jesu. Odẹ ọzae Salomi Zẹbẹdi. Emezae ivẹ rai, Jemis avọ Jọn yọ emọ oniọvo oni Jesu. Ma riẹ hẹ sọ Jesu avọ emezae ivẹ nana a jẹ nyusu evaọ oke nọ a jọ emaha, rekọ nọ a kpako no a jọ egbẹnyusu ekpekpe Jesu keme a jọ usu ikọ riẹ.

Josẹf o je ru iruo gaga re ọ sae ko uviuwou riẹ nọ u bi dhe ebuebu. Ọ jọ ekapenta. Josẹf ọ yọrọ Jesu wọhọ ọmọ obọriẹ, fikiere a je sei “ọmọ ekapenta na.” (Matiu 13:55) Josẹf  o wuhrẹ Jesu iruo ekapenta, yọ Jesu ọ riẹ iruo na ziezi. Ahwo a jẹ tubẹ ta kpahe Jesu nọ: “Ekapenta na ọna.”—Mak 6:3.

Josẹf avọ ahwo uviuwou riẹ, a rọ egagọ Jihova karo evaọ uzuazọ. Wọhọ epanọ uzi Ọghẹnẹ o ta, Josẹf avọ Meri a jẹ rọ ẹme Ọghẹnẹ wuhrẹ emọ rai ‘okenọ a keria eva iwou rai, nọ a be nya eva edhere, okenọ a kiẹzẹ, gbe okenọ a rọwo ze.’ (Iziewariẹ 6:6-9) Uwou-egagọ o jọ Nazarẹt. U muẹro nọ Josẹf ọ jẹ hae wha uviuwou riẹ kpohọ uwou-egagọ na ẹsikpobi. Ebaibol na ọ ta uwhremu na nọ Jesu o kpohọ uwou-egagọ na “wọhọ epaọ uruemu riẹ evaọ ẹdẹ Ẹdijala.” (Luk 4:16) Uviuwou na o jẹ hai kpohọ etẹmpol Jihova nọ o jọ obọ Jerusalẹm n’oke t’oke re, yọ onana o jẹ hae kẹ ae evawere.