Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Jesu Họ Edhere na, Uzẹme na, gbe Uzuazọ Na

 UZOU AVỌ 15

O Ru Iruo Igbunu Ọsosuọ Riẹ

O Ru Iruo Igbunu Ọsosuọ Riẹ

JỌN 2:1-12

  • EHAA ORỌO NỌ A RU EVAỌ KENA

  • JESU O ZIHE AME RUỌ UDI

Anwọ edẹ esa ena nọ Nataniẹl o ro zihe ruọ omọvo ilele ọsosuọ Jesu na. Jesu avọ ilele ọsosuọ riẹ jọ a bi kpobọ Galili, ẹkwotọ nọ aikpobi a no ze. Obọ Kena, ẹwho Nataniẹl a be nya na. Kena ọ jọ ẹwho nọ ọ rrọ ikpehru evaọ ẹkpẹlobọ ovatha-ọre Nazarẹt, oria nọ Jesu ọ jọ whẹro. A zizie i rai kpohọ ehaa orọo jọ evaọ Kena.

Oni Jesu ọ ziọ ehaa orọo na re. Meri yọ ogbẹnyusu uviuwou ahwo nọ a be rọo na, yọ ẹsejọhọ o je ru iruo epanọ a rẹ rọ rẹrote ahwo nọ a ziọ ehaa orọo na. Onana u ru nọ ọ rọ kaki muẹrohọ nọ udi u re no, fikiere ọ tẹ vuẹ Jesu nọ: “Udi u re no.”—Jọn 2:3.

Ẹme nọ Meri ọ be ta kẹ Jesu na họ, jọ o ru oware jọ. Jesu ọ tẹ ta ẹme nọ u dhesẹ nọ ọ gwọlọ ru oware na ha, inọ: “Aye, ẹvẹ oyena u ro te omẹ avọ owhẹ?” (Jọn 2:4) Jesu yọ Ovie nọ Ọghẹnẹ o ro mu, yọ Ọsẹ obọ odhiwu riẹ họ ọnọ ọ rẹ kpọ iruẹru riẹ orọnikọ ahwo uviuwou hayo egbẹnyusu riẹ hẹ. Meri ọ tẹ kẹe uvẹ jẹ ta kẹ ahwo nọ a bi fiobọhọ evaọ iruẹru ehaa orọo na nọ: “Wha ru oware kpobi nọ ọ ta kẹ owhai.”—Jọn 2:5.

Whaọ ithẹ ame ilogbo ezeza e jọ etẹe, yọ ilita 40 e rẹ vọ ọvuọvo. Jesu ọ tẹ ta kẹ enọ e be gbodibo na nọ: “Wha vo ame vọ ithẹ na.” Kẹsena Jesu ọ tẹ ta nọ: “Wha jẹ omojọ re wha rehọ iẹe se ọnowuzou ehaa orọo na.”—Jọn 2:7, 8.

Udi na o were ọnọ ọ be kpọ ehaa orọo na gaga, rekọ ọ riẹ nọ edhere igbunu a ro ru udi na ha. O te se ọva na, ọ tẹ ta kẹe nọ: “Amọfa kpobi a rẹ kaki fi emamọ udi họ otọ, nọ udi u je mu ahwo no, a vẹ rehọ onọ o were tere he ze. Whọ nyasiọ emamọ na ba anwẹsiẹ.”—Jọn 2:10.

Onana họ oware igbunu ọsosuọ nọ Jesu o ru. Nọ ilele nọ o wo obọ na a ruẹ oware igbunu nana, o tẹ bọ ẹrọwọ rai ga. Nọ a ru ehaa orọo na no, Jesu avọ oni riẹ gbe inievo riẹ a te kpohọ okpẹwho Kapaniọm, onọ o kẹle Abade Galili.