Ivie buobu nọ i je su erua ikpe Izrẹl na a yoma gaga, rekọ ovie jọ nọ a re se Ehab ọ rrọ usu enọ e mai yoma. Ọ rehọ aye nọ ọ geva gaga nọ ọ jẹ gọ ẹdhọ nọ a re se Ebale. Odẹ aye na Jezibẹl. Ehab avọ Jezibẹl a te ru emọ Izrẹl jẹ gọ Ebale, yọ a tube kpe eruẹaro Jihova buobu. Kọ eme Jihova o ru? Jihova o te vi ọruẹaro riẹ nọ a re se Elaeja uwou se Ehab.

Elaeja ọ tẹ ta kẹ Ehab nọ fiki eware iyoma nọ o bi ru na, oso ọ te rrọ evaọ Izrẹl he. Fikinọ oso ọ rrọ evaọ ikpe esa gbe ubro soso ho, eware nọ ahwo a kọ i woma ha, ohọo u te je kpe ahwo na. Jihova ọ tẹ wariẹ vi Elaeja bru Ehab. Ehab ọ tẹ ta kẹ Elaeja nọ: ‘Whẹ ohwo oyoma! Whọ wha uye nana kpobi ze.’ Elaeja ọ tẹ ta kẹ Ehab nọ: ‘Mẹ wha uye na ze he. Whọ wha riẹ ze keme whọ be gọ Ebale. Joma ru ẹdawọ jọ re ma riẹ ohwo nọ ọ wha riẹ ze. Koko orẹwho na soso gbe eruẹaro Ebale ra họ, re a kpobọ ehru Ugbehru Kamẹl.’

Ahwo na a te gine kokohọ obọ ehru ugbehru na. Elaeja ọ tẹ ta nọ: ‘Wha salọ abọ ohwo nọ wha rrọ. Otẹrọnọ Jihova họ Ọghẹnẹ uzẹme na, wha lele iei. Rekọ otẹrọnọ Ebale, wha lele iei. Me se owhai abọ. Jọ eruẹaro Ebale nọ i bu te egba ene gbe udhuvẹ gbe ikpe (450) a ruẹrẹ idhe rai họ re a bo se ọghẹnẹ rai, mẹ te ruẹrẹ idhe mẹ họ re me bo se Jihova. Ọghẹnẹ nọ o vi erae ze te mahe idhe na họ Ọghẹnẹ uzẹme na.’ Ahwo na kpobi a tẹ rọwo.

Eruẹaro Ebale na a tẹ ruẹrẹ idhe rai họ. A te bo se ọghẹnẹ rai no ohiohiẹ rite owọwọ inọ: ‘O Bale, yo kẹ omai!’ Nọ Ebale o yo ho, Elaeja o te je se ai ẹkoko. Ọ ta kẹ ai nọ: ‘Wha bo gaga. Ẹsejọhọ ọ rrọ owezẹ, yọ ọ gwọlọ nọ ohwo jọ ọ rọwo iẹe ze.’ Makọ rite owọwọ dede yọ eruẹaro Ebale a gbe bi bo. Rekọ Ebale o vi erae ze he.

Elaeja ọ tẹ ruẹrẹ idhe riẹ họ agbada-idhe, o te vo ame kuhọ ehru idhe na. Kẹsena ọ tẹ lẹ se Jihova nọ: ‘O Jihova, ivie ru re ahwo nana a riẹ nọ whẹ họ Ọghẹnẹ uzẹme na.’ Ẹsiẹvo na, Jihova o te vi erae no obọ odhiwu ze rọ mahe idhe na kpobi. Ahwo na kpobi a te bo nọ: ‘Jihova  họ Ọghẹnẹ uzẹme na!’ Elaeja ọ tẹ ta nọ: ‘Wha kru eruẹaro Ebale na kpobi, ọvuọvo ọ dhẹ vabọ họ!’ Ẹdẹ yena, a te kpe eruẹaro Ebale egba ene gbe udhuvẹ gbe ikpe (450) na kpobi no.

Nọ Elaeja ọ jọ obọ abade ruẹ ẹgho ọsese jọ, ọ tẹ ta kẹ Ehab nọ: ‘Okposo ọ be tha. Ruọ akẹkẹ ra ovẹrẹ re whọ dhẹ kpo.’ Ehru o te bi, ofou ọgaga o te bi fou, kẹsena okposo o te muhọ ẹrrọ. Ehab ọ jẹ dhẹ akẹkẹ na siawọ gaga, rekọ avọ obufihọ Jihova, Elaeja ọ tẹ rọ owotọ dhẹ siawọ vi akẹkẹ Ehab! Kọ ebẹbẹ Elaeja kpobi i kuhọ no? Ma te ta kpahe onana evaọ uwuhrẹ nọ o rrọ obaro na.

‘Jọ ahwo a riẹ nọ whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.’ ​—Olezi 83:18