Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 77

Aye nọ Ọ Nyaziọ Ozae ti Vo Ame

Aye nọ Ọ Nyaziọ Ozae ti Vo Ame

Nọ Ehaa Ọnyavrẹ na i kuhọ no, Jesu avọ ilele riẹ a tẹ jẹ nya Sameria vrẹ nọ a je zihe kpobọ Galili. Jesu o te je serihọ evaọ akotọ ozae Jekọp. Ozae na o kẹle ẹwho Saeka. Nọ o bi serihọ na, ilele riẹ a te kpobọ ẹwho na nyae dẹ emu.

Aye jọ ọ tẹ nyaze ti vo ame evaọ ozae na. Jesu ọ tẹ ta kẹe nọ: “Kẹ omẹ ame re mẹ da.” Aye na ọ tẹ ta nọ: ‘Fikieme whọ be rọ ta ẹme kẹ omẹ? Mẹ yọ ohwo Sameria. Ahwo Ju a re lele ahwo Sameria ta ẹme he.’ Jesu ọ tẹ ta kẹe nọ: ‘Whọ hae riẹ ohwo nọ mẹ rrọ, whọ hae ta kẹ omẹ nọ mẹ kẹ owhẹ ame nọ ọ rẹ kẹ uzuazọ.’ Aye na ọ tẹ nọ Jesu inọ: ‘Eme whọ be ta na jọ? Who tube wo usiame he.’ Jesu ọ tẹ ta kẹ aye na nọ: ‘Ohwo kpobi nọ ọ da ame nọ mẹ rẹ kẹ, uruame u re gbe kpei vievie he.’ Aye na ọ tẹ ta kẹ Jesu nọ: “Ọga, kẹ omẹ ame nana.”

Jesu ọ tẹ ta kẹe nọ: ‘Nyai se ọzae ra ze.’ Aye na ọ tẹ ta nọ: ‘Me wo ọzae he.’ Jesu ọ tẹ ta kẹe nọ: ‘Uzẹme whọ ta na, keme who wo ezae isoi vrẹ no, yọ ọzae nọ wha gbẹ rrọ uwou obọnana ọzae ra ha.’ Aye na ọ tẹ ta kẹe nọ: ‘Ọga, o wọhọ nọ whẹ yọ ọruẹaro. Ahwo mai a rọwo nọ ma rẹ sae jọ ugbehru nana gọ Ọghẹnẹ, rekọ ahwo Ju a be ta nọ obọ Jerusalẹm ọvo a rẹ jọ gọ Ọghẹnẹ. Mẹ riẹ nọ Mesaya na ọ tẹ nyaze no, o ti wuhrẹ omai epanọ a rẹ gọ Ọghẹnẹ.’ Jesu ọ tẹ vuẹe ẹme nọ ọ re vuẹ ohwo ọvo ẹdẹvo ho inọ: ‘Mẹ họ Mesaya na.’

 Aye na ọ tẹ dhẹ kpobọ ẹwho nyae vuẹ ahwo Sameria inọ: ‘Mẹ ruẹ Mesaya na no. Ọ ta eware kpobi nọ me ru kẹ omẹ. Wha nyaze te ruẹ e riẹ!’ A te lele iei kpobọ ozae na jẹ gaviezọ kẹ iwuhrẹ Jesu.

Ahwo Sameria a tẹ ta kẹ Jesu nọ ọ jọ ẹwho rai kugbe ai. Jesu ọ tẹ jọ etẹe wuhrẹ ai edẹ ivẹ soso, ahwo buobu a te fi ẹrọwọ họ iẹe. Ahwo ẹwho na a tẹ ta kẹ aye na nọ: ‘Nọ ma yo eme ọzae na no na, ma riẹ nọ ọye họ osiwi akpọ na.’

“‘Nyaze!’ jọ ohwo kpobi nọ uruame u bi kpe ọ nyaze; jọ ohwo kpobi nọ ọ gwọlọ, ọ da ame uzuazọ ọvọvẹ.”​—Eviavia 22:17