Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 65

Ẹsta O Siwi Ahwo Riẹ

Ẹsta O Siwi Ahwo Riẹ

Ẹsta yọ ọmọtẹ Ju nọ ọ jẹ rria okpẹwho Shushan evaọ Pasia. Evaọ anwọ ikpe buobu nọ e vrẹ, ahwo uviuwou riẹ a jọ usu ahwo nọ Nebukadneza o mu no Jerusalẹm kpohọ igbo evaọ obọ Babilọn. Mọdekae nọ aimava a rrọ emọ inievo ivẹ, ọye ọ yọrọ e riẹ. Yọ Mọdekae o je ruiruo evaọ uwou Ahasuerọs ovie Pasia.

Whaọ Ahasuerọs ọ gwọlọ aye ọkpokpọ. Fikiere idibo riẹ a tẹ rehọ emetẹ nọ e mai wo erru ro sei re ọ salọ, yọ Ẹsta ọ jọ udevie rai. Evaọ usu emetẹ na kpobi, ovie na ọ tẹ salọ Ẹsta re ọ jọ aye riẹ. Mọdekae ọ tẹ vẹvẹ Ẹsta unu nọ ọ ta kẹ ohwo ọvo ho inọ ọye ohwo Ju.

Ọzae jọ nọ a re se Heman o wo omorro gaga, yọ ọye họ ọnọ o wuzou emọ-ivie na kpobi. Ọ gwọlọ nọ ohwo kpobi o re guzou kpotọ kẹe. Fikinọ Mọdekae ọ rọwo guzou kpotọ kẹe he, eva e tẹ dhae gaga te epanọ ọ rọ gwọlọ nọ o re kpe Mọdekae no. Nọ Heman ọ riẹ nọ Mọdekae ohwo Ju, ọ tẹ gba ẹgwae epanọ a re ro kpe ahwo Ju kpobi no. Heman ọ tẹ vuẹ ovie na nọ: ‘Ahwo Ju na a yoma gaga; kpe ai kpobi no.’ Ahasuerọs ovie na ọ tẹ ta kẹe nọ: ‘Ru ai oware kpobi nọ whọ gwọlọ.’ Kẹsena ovie na ọ tẹ kẹe ogaga nọ o re ro fi uzi họ. Heman o te fi uzi họ inọ a kpe ahwo Ju kpobi no evaọ edẹ 13 amara nọ a re se Ada. Jihova ọ jẹ ruẹ oware nọ o jẹ via na.

Ẹsta ọ riẹ nọ a fi uzi utioye họ họ. Fikiere Mọdekae ọ tẹ rehọ obe uzi na jọ sei, jẹ ta kẹe nọ: ‘Nyae ta ẹme kẹ ovie na.’ Ẹsta ọ tẹ ta nọ: ‘A gbe zizie ohwo taure ọ tẹ nyabru ovie na ha, a re kpei no. Anwọ edẹ 30 soso ena, ovie na o ri zizie omẹ hẹ! Rekọ mẹ te nya ghele. Ọ tẹ riẹ ọkpọ riẹ rri omẹ, mẹ te zọ, rekọ ọ gbẹ riẹe rri omẹ hẹ, yọ me whu no.’

Ẹsta ọ tẹ nya kpobọ ọgwa ovie na. Nọ ovie na ọ ruẹ e riẹ, ọ tẹ riẹ ọkpọ riẹ na rri Ẹsta. Ẹsta ọ tẹ nyabru ovie na, kẹsena ovie na ọ tẹ nọe nọ: ‘Eme whọ gwọlọ nọ  me ru kẹ owhẹ, Ẹsta?’ Ọ tẹ ta kẹ ovie na nọ: ‘Mẹ gwọlọ zizie owhẹ avọ Heman ziọ uwou mẹ te re emu.’ Nọ a jẹ re emu na, Ẹsta ọ tẹ wariẹ zizie ai orọ avivẹ. Evaọ ẹdẹ nọ a jẹ rọ re emu avivẹ na, ovie na ọ tẹ wariẹ nọ Ẹsta nọ: ‘Eme whọ gwọlọ nọ me ru kẹ owhẹ?’ Ẹsta ọ tẹ ta nọ: ‘Ohwo jọ ọ gwọlọ kpe omẹ avọ ahwo mẹ no. Ivie siwi omai.’ Ovie na ọ tẹ nọe nọ: ‘Ono ọ gwọlọ kpe owhẹ?’ Ẹsta ọ tẹ ta nọ: ‘Heman oyoma ọnana.’ Eva e dha Ahasuerọs ga te epanọ ọ rọ ta nọ a kpe Heman no.

Rekọ ohwo ọvo ọ rẹ sai nwene uzi Heman na ha, makọ ovie na dede. Fikiere ovie na ọ tẹ rehọ Mọdekae mu ọnọ o wuzou emọ-ivie na kpobi, jẹ kẹe ogaga nọ o re ro fi uzi ofa họ. Mọdekae o te fi uzi họ nọ o rẹ kẹ ahwo Ju uvẹ re a sai lele ewegrẹ rai họre, nọ ewegrẹ rai a tẹ wọ ohọre ze. Evaọ edẹ 13 amara Ada, ahwo Ju a te lele ewegrẹ rai họre je fi ai kparobọ. No umuo oke oyena vrẹ, ahwo Ju a jẹ hai ru ehaa obokparọ na kukpe kukpe.

“A rẹ te rehọ owhai kpohọ aro eba gbe ivie fiki mẹ. Wha vẹ te rọ uvẹ yena se isẹri kpahe omẹ kẹ ae gbe erẹwho na.”​—Matiu 10:18