Kpohọ eme nọ e riẹ eva

Kpohọ oria izoẹme

 UWUHRẸ AVỌ 64

Daniẹl Evaọ Ọgọdọ Ikpohrokpo

Daniẹl Evaọ Ọgọdọ Ikpohrokpo

Ovie ọfa nọ o su Babilọn họ Dariọs ohwo Midia na. Dariọs o muẹrohọ nọ Daniẹl yọ emamọ ohwo. Fikiere ọ tẹ rọ Daniẹl mu ọnọ o wuzou ezae nọ e mai wo areghẹ evaọ otọ na soso. Ezae nana a tẹ jẹ re Daniẹl ihri, jẹ gwọlọ epanọ a re ro kpei. Fikinọ a riẹ nọ Daniẹl ọ rẹ lẹ se Jihova isiasa evaọ okpẹdẹ, a tẹ ta kẹ Dariọs nọ: ‘O ovie, fi uzi họ inọ ohwo ọvo ọ rẹ lẹ se Ọghẹnẹ ọfa ha rekọ whẹ ọvo. Ohwo nọ ọ lẹ se Ọghẹnẹ ọfa, a re gbolo iei fihọ ọgọdọ ikpohrokpo.’ Onana o tẹ ginẹ were Dariọs, fikiere o te fi uzi na họ.

Nọ Daniẹl o yo kpahe uzi nọ a fihọ na, ọ tẹ nya kpobọ uwou riẹ. O te kigwẹ fihọ aro unwido riẹ nọ u rovie fihọ, ọ tẹ lẹ se Jihova. Ezae nọ e be re ẹe ihri na, a tẹ họrọ ruọ eva uwou na jẹ ruẹ Daniẹl nọ ọ be lẹ. A tẹ dhẹ bru Dariọs jẹ ta kẹe nọ: ‘Daniẹl ọ rọwo koko uzi nọ who fihọ na ha. Ọ be lẹ se Ọghẹnẹ riẹ isiasa okpẹdẹ.’ Whaọ Dariọs o you Daniẹl gaga, yọ ọ gwọlọ nọ Daniẹl o whu hu. Ọ tẹ rehọ okikpo soso je roro kpahe epanọ ọ sae rọ thọ Daniẹl. Rekọ ohwo ọvo ọ rẹ sai nwene uzi nọ a fihọ họ makinọ ovie na dede. Fikiere ọ tẹ ta kẹ isoja riẹ inọ a gbolo Daniẹl fihọ ọgọdọ ikpohrokpo na.

 Evaọ aso ọyena, Dariọs ọ jẹ ruawa kpahe Daniẹl gaga fikiere ọ sae wezẹ hẹ. Nọ oke o nwane ke, Dariọs ọ tẹ dhẹ kpobọ ọgọdọ na, o te se Daniẹl: ‘Kọ Ọghẹnẹ ra o siwi owhẹ?’

Dariọs o te yo urru Daniẹl! Daniẹl ọ tẹ ta kẹ Dariọs nọ: ‘Jihova o vi enjẹle riẹ ze ti wuhu enu ikpohrokpo na. A ru omẹ oware ovo ho.’ Eva e tẹ were Dariọs gaga! O te juzi nọ a si Daniẹl no eva ọgọdọ na ze. Whọ rẹ jọ oma Daniẹl ruẹ oka ovuọvo ho. Kẹsena ovie na o te juzi nọ: ‘Wha gbolo ezae nọ e gba ẹgwae omuomu na fihọ evaọ ọgọdọ na.’ Nọ a ginẹ gbolo ezae na fihọ eva ọgọdọ na, a kie te otọ taure ikpohrokpo na e tẹ re ai no ho.

Dariọs o te juzi nana kẹ ahwo na kpobi inọ: ‘Jọ ohwo kpobi ọ dhozọ Ọghẹnẹ Daniẹl. Keme ọye o siwi Daniẹl no abọ ikpohrokpo na.’

Kọ whọ rẹ lẹ se Jihova kẹdẹ kẹdẹ wọhọ Daniẹl?

“Jihova ọ riẹ epanọ o re ro siwi ahwo nọ a roma kẹ Ọghẹnẹ no odawọ.”​—2 Pita 2:9