“Onọ Ọghẹnẹ o kugbe no, ajọ ohwo ọvo ọ hẹriẹ iẹe he.”Mak 10:9

Jihova ọ gwọlọ nọ ma “kielele uyoyou.” (Maeka 6:8) Onana o mae roja evaọ orọo keme aimava na a gbẹ talamu ohwohwo ho, a rẹ sai fievahọ ohwohwo ho. Yọ evaifihọ itieye na e roja re uyoyou o sae jọ orọo na.

Erọo buobu e rrọ kpakre kpakre nẹnẹ. Re orọo ra o siọ ere ba ẹjọ, o gwọlọ nọ who re ru eware ivẹ jọ.

 1 JỌ ORỌO RA O J’OWHẸ OJA

OWARE NỌ EBAIBOL NA Ọ TA: “Vuhu eware nọ e mae roja.” (Ahwo Filipai 1:10) Orọo ra o rrọ usu eware nọ e mai wuzou evaọ uzuazọ. U fo nọ who re sei gboja.

Jihova ọ gwọlọ nọ ẹro ra ọ jọ otafe vievie he, ukpoye ọ gwọlọ nọ wha rẹ “rehọ evawere ria kugbe” ohwohwo. (Ọtausiuwoma Na 9:9) Ọ ta vevẹ nọ who re gbabọkẹ ọrivẹ ra ha, ukpoye, wha rẹ daoma ru eware nọ i re ru eva were ohwohwo. (1 Ahwo Kọrint 10:24) Hae rọ uruemu ra dhesẹ nọ ọzae hayo aye ra ọ rrọ ghaghae kẹ owhẹ.

OWARE NỌ WHỌ RẸ SAI RU:

  • Wha hae raha oke kugbe ohwohwo ziezi, wha vẹ jẹ romatotọ gaviezọ kẹ ohwohwo

  • Hai roro kpahe owhai imava na orọnikọ omara ọvo ho

 2 SẸRO UDU RA

OWARE NỌ EBAIBOL NA Ọ TA: “Ohwo kpobi nọ o bi rri aye te epanọ o ro wo isiuru owezẹ kẹe yọ o lele aye na bruẹnwae no evaọ udu riẹ.” (Matiu 5:28) Otẹrọnọ ohwo jọ ọ be hai roro kpahe ọfariẹ-ogbe, kiyọ ọzae hayo aye riẹ ọ da riẹ ẹro ho.

Jihova ọ ta nọ whọ sẹro “udu ra.” (Itẹ 4:23; Jerimaya 17:9) Re whọ sai ru onana, whọ rẹ yọroma kpahe ibiaro ra. (Matiu 5:29, 30) Rọ aro kele Job nọ o duwu aro riẹ iyei nọ o re rri aye ọfa te ẹgwọlọ họ. (Job 31:1) Gbaemu nọ who re rri ifoto ẹbẹba ha. U te no ere no, whọ rẹ whaha isiuru kpobi nọ who re wo kẹ omọfa nọ ọ rrọ ọzae hayo aye ra ha.

OWARE NỌ WHỌ RẸ SAI RU:

  • Rọ uruemu ra dhesẹ kẹ amọfa nọ whẹ avọ ọzae hayo aye ra wha gbe whuẹ

  • Otẹrọnọ whọ be kẹle ohwo jọ ga hrọ nọ u kiehọ ọzae hayo aye ra oma ha, fa usu na ababọ okioraha