“Emọ yọ ukuoriọ nọ u no obọ ỌNOWO ze.”​—Olezi 127:3

Ọmọ ọsosuọ o re mu ọzae avọ aye, yọ evaọ oke ovona o rẹ sae jọ bẹbẹ kẹ ae re a yọrọ iẹe. Nọ wha zihe ruọ ọsẹgboni no na, enwenọ oke gbe ẹgba rai kpobi o te ruọ ẹruorote ọmọ na. Ọmọ ọyọrọ ọ rẹ sai ru nọ wha gbẹ rọ wezẹ doma ha, yọ o rẹ sai kpomahọ iroro rai je ru nọ usu rai o gbẹ rọ kpekpe tere he. Re eware e siọ thọhọ thọhọ ba ẹjọ, o gwọlọ nọ wha re gbobọnẹ eware jọ re whai imava wha sae rẹrote ọmọ na. Ẹvẹ ehrẹ Ebaibol e sai ro fiobọhọ kẹ owhai evaọ abọ nana?

 1 WHA RIẸ NỌ ỌMỌ O TI NWENE UZUAZỌ RAI

OWARE NỌ EBAIBOL NA Ọ TA: “Uyoyou u re wo odiri o tẹ jẹ rrọ wowou.” U te no ere no, uyoyou “o rẹ gwọlọ ewoma obọriẹ hẹ, o rẹ kaki muofu hu.” (1 Ahwo Kọrint 13:4, 5) Nọ who zihe ruọ oni no na, o rrọ vevẹ nọ ọmọ na whọ te mae tẹrovi. Rekọ, ọzae ra ọ rẹ sai roro nọ whọ gbẹ be daezọ riẹ hẹ, fikiere who gbabọkẹ ọzae ra ha. Rọ odiri gbe uwowou dhesẹ kẹe nọ ọ gbẹ rrọ ghaghae kẹ owhẹ, jẹ kẹe uvẹ re o w’obọ evaọ ẹruorote ọmọ na.

“Whai ezae, wha hae rehọ otoriẹ lele eyae rai yeri.” (1 Pita 3:7) Riẹ nọ aye ra ọ te rọ enwenọ oke gbe ẹgba riẹ kpobi rẹrote ọmọ na. Owha-iruo nana o rẹ sae lẹliẹ oma rrọe, yọ u re tube ru nọ eva e rẹ rọ dhae ẹsejọ. Ẹsejọ ọ sae tubẹ kpahe ẹme ọgaga kẹ owhẹ dede, rekọ daoma nyẹ omara, keme “ọnọ ọ rẹ kake i mu ofu hu o woma vi ọgba.” (Itẹ 16:32) Vuhu onana mu, re whọ thae uke.—Itẹ 14:29.

OWARE NỌ WHỌ RẸ SAI RU:

  • Esẹ: Fiobọhọ kẹ aye ra rẹrote ọmọ na, makọ evaọ aso. Bru no oke nọ who bi ro ru eware efa re whọ sae ruẹ oke nọ whọ rẹ rọ jọ kugbe aye gbe ọmọ ra

  • Ini: Otẹrọnọ ọzae ra ọ gwọlọ fiobọhọ kẹ owhẹ rẹrote ọmọ na ẹsejọ, whọ se he. Nọ ọ gbẹ riẹ oware jọ ru ziezi hi, whọ fo ẹe he, rekọ dhesẹ epanọ o re ru ei kẹe

 2 WHA BỌ USU RAI GA

OWARE NỌ EBAIBOL NA Ọ TA: “A vẹ jọ uwo ovo.” (Emuhọ 2:24) Dede nọ ọmọ ọ ruọ uviuwou na no, kareghẹhọ nọ whẹ avọ ọzae hayo aye ra wha gbẹ rrọ “uwo ovo.” Wha daoma rai kpobi re wha bọ usu rai ga.

Whẹ aye, jọ oware kpobi nọ ọzae ra o bi ru ro fiobọhọ kẹ owhẹ o da owhẹ ẹro. Nọ whọ tẹ be hai yere iei kẹ obọ nọ o bi fihọ kẹ owhẹ, o te jọ “usiwo” hayo uduotahawọ kẹe. (Itẹ 12:18) Whẹ ọzae, hae vuẹ aye ra nọ who you rie je rri rie ghaghae. Jiri ei kẹ oma nọ ọ be dawo evaọ uwou na.—Itẹ 31:10, 28.

“Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.” (1 Ahwo Kọrint 10:24) Evaọ oware kpobi, daoma ru onọ o mai kiehọ ọzae hayo aye ra oma. U fo re whai imava wha hae raha oke kugbe ohwohwo nọ wha rẹ rọ ta ẹme kugbe, jiri ohwohwo, jẹ gaviezọ kẹ ohwohwo. Wha gbọ ohwohwo owezẹ hẹ. Riẹ oware nọ ọrivẹ ra ọ gwọlọ. Ebaibol na ọ ta nọ: “Wha rehọ iẹe gbọ ohwohwo ogbọ họ ajokpanọ whai imava wha rọwo fihọ iẹe.” (1 Ahwo Kọrint 7:3-5) Fikiere, wha ta eva kẹ ohwohwo evaọ abọ owezẹ ọzae-avọ-aye. Who te wo ithihakọ jẹ be daoma riẹ epanọ o rrọ ohwo ọdekọ oma, usu rai o te ga ziezi.

OWARE NỌ WHỌ RẸ SAI RU:

  • Ru uvẹ nọ whai imava ọvo wha rẹ rọ ta ẹme kugbe

  • Ru eware nọ i re ru ọzae hayo aye ra riẹ nọ who you rie, o tẹ make rrọ eware esese wọhọ eme uyoyou nọ whọ rẹ ta kẹe, hayo omoware nọ whọ rẹ dẹ kẹe

 3 EPANỌ WHO RE RO WUHRẸ ỌMỌ RA

OWARE NỌ EBAIBOL NA Ọ TA: “No oke ọmọfofa ze whọ rọ riẹ ikereakere efuafo na, enọ e rẹ sai ru owhẹ wo areghẹ nọ o rẹ wha esiwo ze.” (2 Timoti 3:15) Ma omaa oghẹrẹ nọ who ti ro wuhrẹ ọmọ ra kpahotọ. Makọ ọmọ nọ ọ gbẹ rrọ obeva ọ rẹ sai wuhrẹ eware. Nọ ọ gbẹ rrọ obeva na, ọ rẹ sai vuhu uvou ra, yọ ọ rẹ riẹ okenọ eva e be were owhẹ hayo nọ eva e be dha owhẹ. Mu obe họ ese kẹe nọ ọ gbẹ rrọ ọmọfofa. Dede nọ o bi wo otoriẹ eware nọ who bi se na ha, u re ru nọ obe-use o rẹ rọ were iẹe nọ ọ be rro ze na.

Who du roro nọ ọmọ ra ọ maha vi ohwo nọ ọ rẹ sai wuhrẹ kpahe Ọghẹnẹ hẹ. Jọ ọmọ ra o yo elẹ nọ whọ be lẹ se Jihova. (Iziewariẹ 11:19) Makọ okenọ wha be zaharo, ta kẹe kpahe eware nọ Ọghẹnẹ ọ ma. (Olezi 78:3, 4) Nọ ọmọ ra ọ be rro ze na, ọ te ruẹ nọ who you Jihova, o ve ti you Jihova re.

OWARE NỌ WHỌ RẸ SAI RU:

  • Lẹ se Jihova re ọ kẹ owhẹ areghẹ nọ who re ro wuhrẹ ọmọ ra

  • Hae wariẹ igogo eme jọ kẹ ọmọ ra re u fiobọhọ kẹe kareghẹhọ eware na