Kpohọ eme nọ e riẹ eva

Kpohọ oria izoẹme

 ABỌ AVỌ 3

Epanọ A re ro Ku Ebẹbẹ Họ

Epanọ A re ro Ku Ebẹbẹ Họ

“Wha wo uyoyou ogaga kẹ ohwohwo, keme uyoyou u re ruru izieraha buobu.”1 Pita 4:8

Nọ wha tẹ rọo obọ, ebẹbẹ sa-sa e rẹ romavia. O rẹ sae jọ ere fikinọ whai imava na wha wo ohẹriẹ evaọ oghẹrẹ nọ wha re roro gbe oghẹrẹ nọ wha re rri eware. Amọfa a sae jẹ wha ebẹbẹ ze hayo eware idudhe e rẹ sae via.

Nọ ẹbẹbẹ ọ tẹ romavia, whọ sae gwọlọ gbobọnẹ ẹbẹbẹ na, rekọ Ebaibol na ọ hrẹ omai nọ ma daoma ku ebẹbẹ họ. (Matiu 5:23, 24) Ehrẹ Ebaibol nọ who re fihọ iruo i re fiobọhọ kẹ owhẹ ku ebẹbẹ họ.

 1 WHA KERIA TA KPAHE ẸBẸBẸ NA

OWARE NỌ EBAIBOL NA Ọ TA: “Koware koware kpobi ọvuọ ezi riẹ, . . . oke jọ nọ a rẹ rọ ta ẹme.” (Ọtausiuwoma Na 3:1, 7) Whai imava wha keria re wha ta ẹme kpahe ẹbẹbẹ na. Horie eva ra kpobi kẹ ọrivẹ ra kpahe ẹme na. Wha hae “ta uzẹme” kẹ ohwohwo. (Ahwo Ẹfisọs 4:25) O tẹ make rọnọ ofu ọ rrọ owhẹ eva, daoma whaha ẹwhọ. Uyo nọ a rọ unu kpotọ kẹ u re ru nọ ẹme nọ o te oware ovo ho o gbẹ rọ suọ ẹwhọ họ.—Itẹ 15:4; 26:20.

O tẹ make rọnọ wha rọwokugbe evaọ ẹme na ha, daoma rọ udu kpotọ, jọ uyoyou gbe adhẹẹ u ru owhẹ ma ẹme ra te ziezi. (Ahwo Kọlọsi 4:6) Wha jọ ẹbẹbẹ na o si otọ họ, wha siọ ẹme ba ẹta kugbe ohwohwo gbe he.—Ahwo Ẹfisọs 4:26.

OWARE NỌ WHỌ RẸ SAI RU:

  • Wha fi oke họ nọ wha rẹ rọ ta ẹme na

  • Nọ ohwo ọdekọ ọ tẹ be ta ẹme, who bru ẹme dhei unu hu. Okenọ whọ te rọ ta ora u ti te

 2 GAVIEZỌ RE WHO WO OTORIẸ ẸME NA

OWARE NỌ EBAIBOL NA Ọ TA: “Wha wo uvi uyoyou-inievo kẹ ohwohwo. Evaọ ọghọ ọrọkẹ ohwohwo, kobaro.” (Ahwo Rom 12:10) O roja gaga re whọ gaviezọ. Wha daoma “wo ororokẹ kẹ ohwohwo . . . gbe omaurokpotọ” re wha sae riẹ epanọ o rrọ ohwohwo oma. (1 Pita 3:8; Jemis 1:19) Whọ faki ru wọhọ ẹsenọ whọ be gaviezọ họ otẹrọnọ iroro ra e rrọ etẹe he. O tẹ lọhọ, siobọno oware nọ who bi ru re whọ gaviezọ kẹe, hayo whọ sae ta kẹe nọ wha fi ẹme na họ oke ofa. Whọ tẹ rehọ iẹe nọ whẹ avọ ọrivẹ ra yọ okọ-gbe-uvi orọnikọ ewegrẹ hẹ, whọ te “kaki mu ofu hu.”—Ọtausiuwoma Na 7:9.

OWARE NỌ WHỌ RẸ SAI RU:

  • O tẹ make rọnọ ẹme nọ ohwo ọdekọ ọ be ta o be dha owhẹ eva, daoma gaviezọ kẹe ghele

  • Daoma wo otoriẹ ẹme nọ ọ be gwọlọ ta na. Rọ uvou riẹ gbe oghẹrẹ nọ o bi ru rọ riẹ oghẹrẹ nọ oware na o riẹe oma

3 RU EPANỌ WHA GBẸ TA

OWARE NỌ EBAIBOL NA Ọ TA: “Eva uyeoruẹ kpobi a jẹ ruẹ erere, rekọ eme ogbẹta ọvo o rẹ wha uvuhu tha.” (Itẹ 14:23) Orọnikọ wha tẹ rọwo fihọ oware nọ wha ti ru no yọ u re no ho. Wha re ru epanọ wha gbẹ ta na gba. Onana o te gwọlọ omodawọ mi owhai rekọ irere i ti noi ze. (Itẹ 10:4) Wha te wo eva evo, wha ti wo “emamọ osaohwa rọkẹ iruo rai.”—Ọtausiuwoma Na 4:9.

OWARE NỌ WHỌ RẸ SAI RU:

  • Wha jiroro oware nọ whai imava wha ti ru re wha sai ku ebẹbẹ rai họ

  • N’oke t’oke wha ta kpahe epanọ wha daoma te no evaọ ẹme na