Kpohọ eme nọ e riẹ eva

Kpohọ oria izoẹme

 ABỌ 1

Rẹroso Ọghẹnẹ re Who Wo Evawere Evaọ Orọo Ra

Rẹroso Ọghẹnẹ re Who Wo Evawere Evaọ Orọo Ra

“Ọnọ ọ ma rai no emuhọ ze ọ ma rai ọzae avọ aye.”Matiu 19:4

Jihova * Ọghẹnẹ họ ọnọ ọ to orọo họ. Ebaibol na ọ ta nọ ọye ọ ma aye ọsosuọ na ọ tẹ “rehọ iẹe se ọzae na.” Eva e were Adamu te epanọ ọ rọ ta nọ: “Enẹna, ọnana họ onwa enwa mẹ, gbe uwo uwo-oma mẹ.” (Emuhọ 2:22, 23) Jihova ọ gwọlọ nọ ahwo nọ a rọo no a re wo evawere nẹnẹ re.

Nọ whọ tẹ rọo obọ, whọ rẹ sai roro nọ eware kpobi e te riẹ nya. Rekọ uzẹme na họ, makọ ọzae avọ aye nọ a you ohwohwo gaga a rẹ sai wo ẹbẹbẹ ẹsejọ. (1 Ahwo Kọrint 7:28) Whọ te jọ ibroshọ nana ruẹ ehrẹ Ebaibol nọ e rẹ sai fiobọhọ kẹ owhẹ wo evawere evaọ uviuwou ra otẹrọnọ who fi rai họ iruo.—Olezi 19:8-11.

 1 RU ẸKẸ-ABỌ RA NỌ JIHOVA Ọ KẸ OWHẸ

OWARE NỌ EBAIBOL NA Ọ TA: Ọzae họ ọnọ o wuzou uviuwou.—Ahwo Ẹfisọs 5:23.

Otẹrọnọ whẹ yọ ọzae nọ ọ rọo no, Jihova ọ gwọlọ nọ whọ rẹrote aye ra ziezi. (1 Pita 3:7) Ọ ma aye na re ọ jọ ofiobọhọ kẹ owhẹ, yọ ọ gwọlọ nọ who you rie jẹ kẹe ọghọ. (Emuhọ 2:18) Ọ gwọlọ nọ who re you aye ra te epanọ whọ rẹ rọ rehọ ẹgwọlọ riẹ karo.—Ahwo Ẹfisọs 5:25-29.

Otẹrọnọ whẹ yọ aye uwou-orọo, Jihova ọ gwọlọ nọ whọ rẹ kẹ ọzae ra adhẹẹ odidi je fiobọhọ kẹe re ọ sai ru ẹkẹ-abọ riẹ evaọ uviuwou na. (1 Ahwo Kọrint 11:3; Ahwo Ẹfisọs 5:33) Rọwo kugbe iroro nọ ọ be jẹ re whọ jẹ romakpotọ kẹe. (Ahwo Kọlọsi 3:18) Who te ru ere, whọ te jọ ghaghae kẹ ọzae ra gbe Jihova.—1 Pita 3:1-6.

OWARE NỌ WHỌ RẸ SAI RU:

  • Nọ aye hayo ọzae ra kpahe epanọ whọ sae rọ jọ emamọ ọzae hayo aye vi epaọ anwẹdẹ. Gaviezọ ziezi kẹ ẹme nọ ọ te ta, re whọ jẹ daoma ru lele ẹme nọ ọ ta na

  • Wo ithihakọ. Re wha ru ohwohwo eva were orọnọ oware asohẹrioke he

2 WHA RỌ ẸGWỌLỌ OHWOHWO KARO

OWARE NỌ EBAIBOL NA Ọ TA: U fo nọ whọ rẹ rọ ẹgwọlọ ọrivẹ ra karo ẹsikpobi. (Ahwo Filipai 2:3, 4) Tete ọrivẹ ra, kareghẹhọ nọ Jihova ọ gwọlọ nọ idibo riẹ a rẹ jọ “wolẹ kugbe ahwo kpobi.” (2 Timoti 2:24) “Eme izuehọ ahwo jọ i re duwẹ wọhọ ọgbọdọ, rekọ ẹrọo ohwo owareghẹ ọ rẹ wha usiwo tha.” Fikiere, rorote re whọ tẹ te ta ẹme. (Itẹ 12:18) Jihova ọ te rọ ẹzi riẹ fiobọhọ kẹ owhẹ ta ẹme wowolẹ avọ uyoyou.—Ahwo Galesha 5:22, 23; Ahwo Kọlọsi 4:6.

OWARE NỌ WHỌ RẸ SAI RU:

  • Lẹ se Jihova re o fiobọhọ kẹ owhẹ rọ udu kpotọ jẹ gaviezọ kẹ ọrivẹ ra nọ wha tẹ be jiroro jọ nọ i wuzou gaga

  • Romatotọ roro kpahe ẹme nọ whọ te ta gbe oghẹrẹ nọ who ti fi ẹme na họ

 3 WHA WO IRORO EVO

OWARE NỌ EBAIBOL NA Ọ TA: Nọ ọzae avọ aye a tẹ rọo no, yọ a zihe ruọ “uwo ovo” no. (Matiu 19:5) Ghele na, wha wo ohẹriẹ no ohwohwo yọ wha sai wo ọvuọ iroro riẹ ẹsejọ. Fikiere, o gwọlọ nọ wha re wuhrẹ epanọ wha re ro wo eva evo gbe iroro evo. (Ahwo Filipai 2:2) U fo nọ wha re wo iroro evo nọ wha tẹ be jiroro jọ. Ebaibol na ọ ta nọ: “Ekiroro e rẹ ma oma oware tha.” (Itẹ 20:18) Jọ ehrẹ nọ e rrọ Ebaibol na e kpọ owhai nọ wha tẹ be jiroro.—Itẹ 8:32, 33.

OWARE NỌ WHỌ RẸ SAI RU:

  • Hae ta eva kẹ ọrivẹ ra, orọnikọ thakpinọ wha gbiku ọvo ho

  • Re who te ti lele omọfa jọ ta ẹme mu, daoma vuẹ ọzae hayo aye ra tao

^ edhe-ẹme 4 Ebaibol na ọ ta nọ Jihova họ odẹ Ọghẹnẹ.