OWARE NỌ U RO WUZOU

Otẹrọnọ uwuhrẹ eghrorotha na ginọ uzẹme, kiyọ uzuazọ u wo ẹjiroro ho. Rekọ otẹrọnọ ẹma a ma eware, kiyọ ma rẹ sae ruẹ iyo kẹ enọ nọ e mai wuzou evaọ uzuazọ gbe obaro na.

EME WHỌ HAI TI RU?

Rri oware nọ o be via na: Alex ọ gbẹ riẹ onọ ọ rẹ rọwo ho. No emaha ze, ọ rọwo nọ Ọghẹnẹ ọ ma eware kpobi. Rekọ nẹnẹ, iticha rai o te bi wuhrẹ ae evaọ obọ isukulu inọ, egba-eriariẹ a ru ekiakiẹ kpahe uwuhrẹ eghrorotha na no inọ, o rrọ gbagba. Alex ọ gwọlọ ru wọhọ ohwo ogheghẹ hẹ. Ọ be ta kẹ omariẹ nọ, ‘Otẹrọnọ egba-eriariẹ a kiẹ via no nọ uwuhrẹ eghrorotha na ginọ uzẹme, ono họ omẹ nọ ọ rẹ vro?’

Otẹrọnọ whẹ họ Alex, kọ whọ te rọwo uwuhrẹ eghrorotha na fikinọ a kere i rie fihọ ebe inọ ginọ uzẹme?

DHIZU JE RORO OMOJỌ!

Dede nọ ahwo jọ a rẹ ta nọ a rọwo uwuhrẹ eghrorotha hayo Ọghẹnẹ ọ ma eware, a rẹ sae kẹ imuẹro nọ e lẹliẹ e rai rọwo onọ a rọwo na ha.

  • Ahwo jọ a rọwo nọ Ọghẹnẹ ọ ma eware keme ere a wuhrẹ i rai evaọ obọ ichọche.

  • Ahwo jọ a rọwo uwuhrẹ eghrorotha na keme ere a wuhrẹ i rai evaọ obọ isukulu.

 ENỌ EZEZA NỌ U FO NỌ WHO RE RORO KPAHE

Ebaibol na ọ ta nọ: “Uwou kpobi u wo ohwo nọ ọ bọ riẹ, rekọ ọnọ ọ ma eware kpobi họ Ọghẹnẹ.” (Ahwo Hibru 3:4) Kọ areghẹ ọ gbẹ rrọ ẹme yena?

Re a ta nọ ohwo ọvo ọ ma eware he, o wọhọ ẹsenọ ohwo ọ be ta nọ uwou nana ọvo o bọ omobọ riẹ

AHWO JỌ A RẸ TA NỌ: Eware kpobi i muhọ nọ oware jọ o sa idudhe evaọ ehrugbakpọ na.

1. Kọ ono hayo eme ọ lẹliẹ oware na sa?

2. Ovẹ areghẹ o mae rrọ​—inọ eware kpobi i mu lahwe hayo inọ ohwo jọ ọ ma rai?

AHWO JỌ A RẸ TA NỌ: Ahwo a ghroro hayo a no erao ze.

3. Otẹrọnọ ahwo a ghroro no erao wọhọ okpe hayo ọsia ze​—fikieme ahwo a ro wo areghẹ gaga vi erao wọhọ okpe hayo ọsia?

4. Fikieme o rọ rrọ bẹbẹ kẹ ahwo re a wo otoriẹ eware esese jọ nọ e rrọ uzuazọ?

AHWO JỌ A RẸ TA NỌ: Uwuhrẹ eghrorotha na yọ oware nọ a kiẹ via gbagba.

5. Kọ ohwo nọ ọ be ta ere na ọ ginẹ ruẹ imuẹro nọ i dhesẹ nọ uwuhrẹ eghrorotha na ginọ uzẹme?

6. Ibuobu a rẹ rọwo uwuhrẹ eghrorotha na fikinọ a ta kẹ ae nọ ahwo nọ a riẹ obe ziezi a rọwo e riẹ, kọ whọ riẹ ere?

“Whọ tẹ be nya igbrẹwọ vrẹ, whọ tẹ ruẹ uwou jọ nọ o rrọ wowoma nọ a rọ ire bọ, kọ who ti roro nọ: ‘Ire na e daoma kẹhẹ! Ae ọvo a kie fihọ ohwohwo, a tẹ bọ omarai zihe ruọ uwou uwoma nana.’ Who ti roro ere vievie he! Kọ fikieme whọ rẹ rọ rọwo nọ eware kpobi nọ e rrọ ehrugbakpọ na i mu lahwe?​—Julia.

“Dae rehọ iẹe nọ ohwo jọ ọ vuẹ owhẹ nọ oware jọ o sa evaọ oria nọ a re jo printi ebe, ekọlọ nọ a re ro printi ebe na e tẹ frẹ vọ uwou na soso, kẹsena ekọlọ na ọvo i te kere eme fihọ ebe. Kọ whọ te rọwo iẹe?”​—Gwen.

 FIKIEME U RO FO NỌ MA RỌWO NỌ ỌGHẸNẸ Ọ RRỌ?

Ebaibol na ọ tuduhọ omai awọ nọ ma rehọ “ẹgba iroro” mai roro oware te ziezi. (Ahwo Rom 12:1) Onana u dhesẹ hẹ inọ whọ rẹ nwane rọwo nọ Ọghẹnẹ ọ rrọ fiki

  • ME RORO NỌ (Me roro nọ ohwo jọ ọ rrọ nọ ọ ma eware)

  • AHWO JỌ A RỌWO (Mẹ be rria oria nọ ahwo a jọ rọwo Ọghẹnẹ)

  • ỌSẸGBONI (Enẹ ọsẹgboni mẹ a wuhrẹ omẹ no otọ ze—mẹ sai nwene iroro ho)

Ukpoye, u fo nọ whọ riẹ oware nọ o lẹliẹ owhẹ rọwo nọ Ọghẹnẹ ọ rrọ.

“Nọ iticha mai ọ tẹ be jọ obọ isukulu wuhrẹ omai kpahe epanọ oma ohwo-akpọ u re ruiruo, onana o rẹ kẹ omẹ imuẹro nọ Ọghẹnẹ ọ ginẹ rrọ. Abọ sa-sa oma na o wo ọvuọ iruo riẹ, makọ eware nọ e rrọ oma na nọ ma rẹ ruẹ hẹ, yọ ẹsejọ ma rẹ riẹ nọ i bi ruiruo ho, rekiyọ i bi ruiruo rai vrẹ. Oghẹrẹ nọ ugboma ohwo-akpọ o rrọ u gbunu kẹhẹ!”​—Teresa.

“Mẹ tẹ ruẹ uwou-ehru, okọ oyibo, hayo omoto, mẹ rẹ nọ omamẹ nọ, ‘Ono o ku oware nana?’ Wọhọ oriruo, o gwọlọ areghẹ re ohwo ọ tẹ sai ku omoto keme eware esese buobu e rrọ eva omoto nọ i re ruiruo kugbe taure ọ tẹ te dhẹ. Otẹrọnọ ohwo o ku omoto, kiyọ ohwo jọ ọ ma ahwo-akpọ.”​—Richard.

“Epanọ me wuhrẹ kpahe otokiẹ-eriariẹ te, ere mẹ vro uwuhrẹ eghrorotha te. . . . O lọhọ kẹ omẹ re mẹ rọwo nọ ẹma a ma eware viukpenọ mẹ rẹ rọwo uwuhrẹ eghrorotha.”​—Anthony.

RORO KPAHE ONANA

Dede nọ u kri akpọ no nọ egba-eriariẹ a bi ro ru ekiakiẹ, aikpobi a re sae rọwo fihọ oware ovo ho, onọ u dhesẹ nọ uwuhrẹ eghrorotha na ginọ uzẹme. Otẹrọnọ egba-eriariẹ a re sae rọwo fihọ oware ovo ho, yọ ae họ ahwo nọ u fo nọ a rẹ kẹ imuẹro uwuhrẹ na, kọ o thọ re whọ vro uwuhrẹ eghrorotha na?