Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Iyo Rọkẹ Enọ 10 nọ Izoge A rẹ Nọ

 ONỌ AVỌ 3

Ẹvẹ Mẹ Sai ro Lele Ọsẹgboni Mẹ Ta Ẹme?

Ẹvẹ Mẹ Sai ro Lele Ọsẹgboni Mẹ Ta Ẹme?

OWARE NỌ U RO WUZOU

Epanọ whọ riẹ yerikugbe ọsẹgboni ra te, ere uzuazọ ra u re woma te re.

EME WHỌ HAI TI RU?

Rri oware nọ o be via na: Geoffrey yọ uzoge nọ ọ rrọ ikpe 17. Evaọ owọwọ Edesa-Oka ẹdẹjọ nọ o ruiruo nọ a kẹ riẹ kpobi no evaọ uwou na, ọ tẹ gwọlọ nọ o re serihọ! Ọ tẹ keria agbara nọ ọ rẹ mae were iẹe evaọ otuwou na je fi TV họ re o rri.

O raha oke he, Ọsẹ riẹ ọ tẹ nwane nyaze je dikihẹ unuẹthẹ avọ eva nọ e be dhae.

“Geoffrey! Kọ whọ keria etenẹ bi rri TV ukpenọ who re fiobọhọ kẹ oniọvo ra ru ihomwọko nọ a kẹ riẹ? Oware ovo nọ a rẹ vuẹ owhẹ nọ who re ru o riẹ hẹ!”

Geoffrey ọ tẹ go jẹ ta nọ, “O jẹ gba no.”

Ọsẹ riẹ o te nie ovao ze obaro jẹ ta nọ, “Ẹvẹ whọ ta na jọ ọzae na?”

Geoffrey ọ tẹ fiẹ unu je fu ovao. Kẹsena ọ tẹ za kẹ Ọsẹ riẹ nọ, “Mẹ ta ẹme ọvo ho.”

Eva e tẹ dha Ọsẹ riẹ gaga. Ọ tẹ ta kẹe nọ, “Ọzae na, whọ gbẹ rọ unu utioye ta ẹme kẹ omẹ ofa ha!”

Otẹrọnọ whẹ họ Geoffrey, ẹvẹ whọ hae rọ whaha oware nọ o via na?

DHIZU JE RORO OMOJỌ!

Ẹme nọ who re lele ọsẹgboni ra ta, o wọhọ ẹsenọ whọ be dhẹ omoto. Whọ tẹ dhẹ te oria nọ edhere na o jo di, whọ vẹ gwọlọ edhere ọfa.

 WỌHỌ ORIRUO:

Ọmọtẹ jọ nọ a re se Leah ọ ta nọ, “O rẹ jọ bẹbẹ kẹ omẹ re me lele ọsẹ mẹ ta ẹme. Evaọ ẹsejọ nọ mẹ tẹ be ta ẹme kẹe, o ve ru inọ, ‘O, eva e dha owhẹ hẹ, ẹvẹ whọ jẹ ta na jọ?’”

U WO EWARE ESA JỌ NỌ LEAH Ọ RẸ SAI RU.

  1. Doku ọsẹ riẹ.

    Leah ọ sai bo inọ, “Binọ okpẹme mẹ be vuẹ owhẹ na, kọ whọ gbẹ gaviezọ dede!”

  2. O gbe lele ọsẹ riẹ ta ẹme ofa ha.

    Nọ umuo ẹdẹ yena vrẹ, Leah ọ gbẹ vuẹ ọsẹ riẹ oware ovo nọ o be kẹe uye he.

  3. Ọ vẹ hẹrẹ bọo okenọ u kiehọ ọsẹ riẹ oma re ọ tẹ te vuẹe.

    Leah ọ sae wariẹ nyabru ọsẹ riẹ re ọ vuẹe, hayo kere oware nọ o be kẹe uye na họ ileta kẹ ọsẹ riẹ.

Evaọ usu eware nọ e rrọ obehru na, ovẹ whọ rẹ vuẹ Leah nọ o ru?

RORO KPAHE ONANA: O sae jọnọ iroro ọsẹ Leah e rrọ eware efa, fikiere ọ riẹ oware nọ o be kẹ Leah uye he. Fikiere Leah o te ru Orọ A na, ọsẹ riẹ ọ te riẹ oware nọ o be lẹliẹ Leah do na ha. Onana o te lẹliẹ ọsẹ riẹ gaviezọ kẹe he, yọ u ti dhesẹ nọ o wo adhẹẹ kẹ ọsẹ riẹ gbe he. (Ahwo Ẹfisọs 6:2) Fikiere, onana u ti fiobọhọ kẹ aimava na vievie he.

Wọhọ epanọ whọ te kuvẹ re edhere nọ o di ọ whaha owhẹ obonọ whọ be nya ha na, ere ọvona whọ rẹ gwọlọ emamọ edhere nọ whọ sai ro lele ọsẹgboni ra yeri ziezi

O tẹ make rọnọ Orọ B na o mae lọhọ eruo dede, areghẹ ọ riẹ hẹ. Fikieme? Keme re Leah ọ sai ku ẹbẹbẹ nọ o wo na họ, o gwọlọ nọ ọ rẹ ta ẹme na kẹ ọsẹ riẹ, yọ otẹrọnọ ọsẹ na o re fiobọhọ kẹe, ọ rẹ kake riẹ oware nọ o be kẹe uye na. Aimava a gbe bi lele ohwohwo ta ẹme he, u re ku ẹbẹbẹ na họ gbe he.

Rekọ Leah ọ tẹ salọ Orọ C na, ọ te kuvẹ vievie he re oware oyena ọvo o whaha iẹe nọ o gbe ro lele ọsẹ riẹ ta ẹme he. Ukpoye, ọ rẹ salọ oke ofa nọ ọ sai ro lele ọsẹ riẹ ta ẹme na. Yọ o te kere ileta se ọsẹ riẹ, udu riẹ u re ki ei vi.

Yọ o te kere ileta, u re fiobọhọ kẹe ta oware kpobi nọ o riẹe eva. Nọ ọsẹ na o te se ileta na, ọ vẹ te riẹ oware nọ Leah ọ jẹ gwọlọ vuẹe na, yọ onana u re fiobọhọ kẹ ọsẹ na riẹ kpahe oware nọ o be kẹ Leah uye ziezi. Fikiere Orọ C na, oye o mai woma kẹ Leah avọ ọsẹ riẹ. Te ọ ta ẹme na kẹ ọsẹ riẹ ovao dhe ovao hayo o kere ileta, oware nọ Ebaibol ọ ta o bi ru lele na inọ, “Hai ru eware nọ e rẹ wha udhedhẹ ze.”​—Ahwo Rom 14:19.

Eme ọfa Leah ọ rẹ sai ru?

Dai roro sọ whọ sai roro ku ojọ. Kẹsena who ve roro kpahe oware nọ u re no oyena ze nọ o te ru ere.

 RORO TE WHỌ TẸ KPAHE ẸME

Kareghẹhọ inọ, ẹsibuobu ẹme nọ whọ ta gbe oghẹrẹ nọ ọsẹgboni ra a re roro iei fihọ, u re wo ohẹriẹ.

WỌHỌ ORIRUO:

Ẹsejọ ọsẹgboni ra a sae nọ owhẹ oware nọ u bi ru owhẹ nọ who je mu ovao họ. Whọ vẹ ta inọ, “Oware ovo ho.”

Rekọ oware nọ oyena o rẹ ta kẹ ọsẹgboni ra họ: “Me fievahọ owhai te epanọ mẹ sae rọ ta eva kẹ owhai hi. Egbẹnyusu mẹ mẹ te ta oware na kẹ orọnikọ owhai hi.”

Dae rehọ iẹe nọ whọ be rẹriẹ ovao dhe ẹbẹbẹ jọ yọ ọsẹgboni ra a gwọlọ fiobọhọ. Whọ tẹ ta nọ: “Wha ruawa ha. Mẹ ọvo me ti ku ẹbẹbẹ na họ.”

  • Ẹvẹ ọsẹgboni ra a re roro?

  • Emamọ ẹme vẹ u fo nọ whọ hae ta?