Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Iyo Rọkẹ Enọ 10 nọ Izoge A rẹ Nọ

 ONỌ AVỌ 4

Eme Me re Ru nọ Oware O tẹ Thọ Omẹ Obọ?

Eme Me re Ru nọ Oware O tẹ Thọ Omẹ Obọ?

OWARE NỌ U RO WUZOU

Whọ tẹ be hae rọwo iruthọ ra, o rẹ lẹliẹ amọfa fievahọ owhẹ jẹ kẹ owhẹ adhẹẹ.

EME WHỌ HAI TI RU?

Rri oware nọ o be via na: Ẹdẹjọ nọ Tim o je lele egbẹnyusu riẹ zaharo, o te gbolo obọro nọ u kpe ughẹgbe unwido ohwo jọ nọ ọ be rria kẹle ae.

Otẹrọnọ whẹ họ Tim, eme whọ hai ti ru?

DHIZU JE RORO OMOJỌ!

WHỌ SAI RU EWARE ESA JỌ:

  1. Dhẹ.

  2. Ta nọ ohwo jọ ọ wha riẹ ze.

  3. Ta uzẹme na kẹ ohwo na, jẹ rọwo nọ whọ te hwa ugho nọ a te rọ ruẹrẹ iẹe.

Oma o sae wọ owhẹ nọ who ru Orọ A na. Rekọ o mai woma re whọ rọwo iruthọ ra otẹrọnọ who kpe ughẹgbe na hayo whọ raha oware ofa jọ kpobi.

 EWARE ESA JỌ NỌ U RO FO NỌ WHỌ RỌWO IRUTHỌ RA

  1. Oware nọ u fo eruo oye.

    Ebaibol na ọ ta nọ: “Ru eware kpobi avọ oruọzewọ.”​—Ahwo Hibru 13:18.

  2. Ahwo nọ a rẹ rọwo iruthọ rai, ae ahwo a rẹ mae rọvrẹ.

    Ebaibol na ọ ta nọ: “Ọnọ ọ kuọ oruthọ riẹ dhere ọ rẹ nyahọ aro ho, rekọ ọnọ ọ ta iruthọ riẹ via, nọ o je sioma no ai o re wo ohrọ-oriọ.”​—Itẹ 28:13.

  3. O rẹ were Ọghẹnẹ wumuo ho.

    Ebaibol na ọ ta nọ: “Ohwo nọ o re ru umuomu o re tu ỌNOWO na oma, rekọ o fievahọ enọ edhere rai okiẹrẹe.”​—Itẹ 3:32.

Ọmọtẹ jọ nọ a re se Karina nọ ọ rrọ ikpe 20, o kie eho fikinọ ọ jẹ dhẹ omoto gahrọ, ọ tẹ ko iẹe dhere no ọsẹ riẹ. Rekọ o bẹre via ghele. Karina ọ ta inọ, “Nọ ukpe ovo o vrẹ no, ọsẹ mẹ ọ tẹ ruẹ itikẹte na nọ odẹ mẹ o rrọ. Onana u fi omẹ họ ẹbẹbẹ ologbo!”

Eme onana u wuhrẹ omai? Karina ọ ta nọ: “Whọ tẹ be kuọ iruthọ ra dhere, ẹsiẹe eware e rẹ mai yoma ga. Keme obọ u ti te owhẹ odẹnotha ghele!”

EPANỌ WHỌ SAI RO WUHRẸ NO IRUTHỌ RA ZE

Ebaibol na ọ ta nọ: “Mai kpobi ma re ru eware thọ.” (Jemis 3:2, ẹme oruvẹ obotọ) Wọhọ epanọ ma ruẹ na, ma tẹ be hae rọwo iruthọ mai ababọ okioraha, u re dhesẹ nọ ma wo omaurokpotọ gbe nọ ma kpako te ziezi.

Oware ofa nọ who re ru họ, wuhrẹ no iruthọ ra ze. Ọmọtẹ jọ nọ a re se Vera ọ ta nọ: “Nọ oware o tẹ thọ omẹ obọ, me re wuhrẹ oware jọ noi ze, re u fiobọhọ kẹ omẹ ru oware uwoma odẹnotha.” Joma ruẹ oghẹrẹ nọ whọ sai ro ru ei.

Nọ whọ dhẹ ebasikoro ọsẹ ra vrẹ, e tẹ jọ obọ ra raha. Eme who ti ru?

  • Fibo wọhọ ẹsenọ oware ovo o via ha, je roro nọ ọsẹ ra ọ te riẹ hẹ.

  • Vuẹ ọsẹ ra oware nọ o via.

  • Vuẹ ọsẹ ra oware nọ o via, rekọ whọ vẹ ta nọ ohwo jọ ọ wha riẹ ze.

Who feli ẹdawọ fikinọ who se obe he. Eme who ti ru?

  • Ta nọ ẹdawọ nọ ọ gahrọ.

  • Rọwo nọ fikinọ who se obe he, who ro feli.

  • Ta nọ fikinọ eva ra e be dha iticha na o je feli ra.

Otẹrọnọ eware nọ e thọ owhẹ obọ ọvo who re roro kpahe ẹsikpobi, whọ rẹ jọ wọhọ ohwo nọ ọ be dhẹ omoto nọ o bi rri ughẹgbe nọ a re ro rri obemu na ọvo

 Obọnana roro kpahe oware nọ o via na re who fi omara họ (1) ẹta ọsẹ ra gbe (2) ẹta iticha ra. Ẹvẹ ọsẹ ra avọ iticha ra a ti rri owhẹ otẹrọnọ whọ rọwo iruthọ ra? Kọ ẹvẹ a ti rri owhẹ otẹrọnọ whọ rọwo iruthọ ra ha?

Obọnana roro kpahe oware jọ nọ o thọ owhẹ obọ evaọ ukpe nọ ukpo, re whọ za enọ nọ e rrọ obotọ na.

Didi oware o thọ owhẹ obọ? Kọ eme who ru?

  • Mẹ ko riẹ dhere.

  • Mẹ ta nọ ohwo jọ ọ wha riẹ ze.

  • Mẹ rọwo iruthọ mẹ.

Whọ gbẹ rọwo iruthọ ra ha, ẹvẹ o rẹ jọ owhẹ oma?

  • U woma wumuo ho​—Obọ u te omẹ hẹ!

  • Udu u bi brukpe owhẹ​—Mẹ riẹ mẹ hae ta uzẹme.

Eme ọ mai woma nọ whọ hai ru?

Eme who wuhrẹ no iruthọ ra ze?

ẸVẸ WHO RORO?

Fikieme ahwo jọ a gbẹ rọ rọwo ethobọ rai hi?

Ẹvẹ ahwo a re rri owhẹ otẹrọnọ oke kpobi nọ oware o tẹ thọ owhẹ obọ whọ rẹ rọwo ho, rekọ ẹvẹ a re rri owhẹ otẹrọnọ whọ rẹ rọwo ethobọ ra?​—Luk 16:10.