Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Emamọ Usi nọ U No Obọ Ọghẹnẹ Ze!

 Uwuhrẹ 7

Eme Họ Uvie Ọghẹnẹ?

Eme Họ Uvie Ọghẹnẹ?

1. Eme họ Uvie Ọghẹnẹ?

Fikieme Jesu ọ rọ rrọ Osu nọ o fo?​—MAK 1:40-42.

Uvie Ọghẹnẹ yọ egọmeti nọ a ro mu evaọ obọ odhiwu. O te rehọ ẹta egọmeti nọ i kiọkọ kpobi, yọ Ọghẹnẹ ọ te rehọ Uvie na ru oreva riẹ gba evaọ obọ odhiwu gbe otọakpọ. Emamọ usi o rrọ inọ Uvie Ọghẹnẹ u ti ru eware nana. Kẹle na, Uvie Ọghẹnẹ o te jọ emamọ egọmeti nọ ohwo-akpọ kpobi ọ gwọlọ. O te lẹliẹ okugbe jọ udevie ahwo kpobi.​—Se Daniẹl 2:44; Matiu 6:9, 10; 24:14.

Uvie kpobi u re wo ovie. Jihova ọ rehọ Ọmọ riẹ Jesu mu re ọ jọ Ovie ọrọ Uvie Ọghẹnẹ.​—Se Eviavia 11:15.

2. Fikieme Jesu ọ rọ rrọ Ovie nọ o fo?

Ọmọ Ọghẹnẹ yọ Ovie nọ o fo keme ọ rrọ wowou yọ o re gbolaro kẹ oware uyoma ha. (Jọn 1:14) U te no ere no, o wo ogaga nọ o re ro fi obọ họ kẹ ahwo keme isuẹsu riẹ i ti no obọ odhiwu ziọ otọakpọ. Nọ a kpare Jesu no uwhu ze, o te tovrẹ kpohọ odhiwu je muhọ ẹhẹrẹ evaọ obọze Jihova. (Ahwo Hibru 10:12, 13) Ukuhọ riẹ, Ọghẹnẹ ọ tẹ kẹe udu re o muhọ esuo.​—Se Daniẹl 7:13, 14.

3. Amono a ti lele Jesu su?

Ọghẹnẹ ọ salọ utu ahwo jọ nọ a se “otu erezi” na re a lele Jesu su evaọ obọ odhiwu. (Daniẹl 7:27) Ahwo ọsosuọ nọ a salọ evaọ otu erezi nana họ ikọ Jesu nọ i kru ẹrọwọ rai. Rite oke mai na, Jihova ọ gbẹ be salọ ezae gbe eyae nọ i wo ẹrọwọ nọ e te jọ usu erezi na. A te kpare ahwo nana no uwhu ze evaọ ugboma ẹzi wọhọ epanọ a kpare Jesu.​—Se Jọn 14:1-3; 1 Ahwo Kọrint 15:42-44.

 Bro ahwo a bi kpohọ odhiwu? Jesu o se rai “uthuru okakao.” (Luk 12:32) Unu rai kpobi o te jọ idu udhuhrẹ gbe ene (144,000). A ti lele Jesu su otọakpọ na.​—Se Eviavia 14:1.

4. Eme ọ via nọ Jesu o muhọ esuo no?

Uvie Ọghẹnẹ u muhọ esuo evaọ ukpe 1914. * Nọ a nwane rehọ Jesu mu ovie no, o te le Setan avọ ikọ-imuomu riẹ ziọ otọakpọ. Eva e tẹ dha Setan gaga, o te muọ ebẹbẹ họ ẹwha fihọ akpọ na soso. (Eviavia 12:7-10, 12) Anwọ oke yena ze, ebẹbẹ ohwo-akpọ i bi dhe ebuebu. Ẹmo, ohọo, ẹyao, gbe etọ nọ i bi nuhu yọ abọjọ “oka” nọ u dhesẹ nọ kẹle na, Uvie na u ti muọ akpọ na soso họ esuo.​—Se Luk 21:7, 10, 11, 31.

5. Eme Uvie Ọghẹnẹ u bi ru?

Uvie Ọghẹnẹ o bẹ rọ ẹkwoma usiuwoma ota akpọ-soso fi obọ họ kẹ ima ahwo buobu nọ i no erẹwho kpobi ze wo okugbe ọvo. Ima ahwo buobu nọ a wo omaurokpotọ a zihe ruọ ilele Jesu no. Uvie na o te thọ ahwo nana evaọ oke nọ o te raha uyerakpọ omuomu nana. Fikiere ahwo nọ a gwọlọ wo erere no Uvie Ọghẹnẹ ze a re wuhrẹ epanọ a re ro yoẹme kẹ Jesu.​—Se Eviavia 7:9, 14, 16, 17.

Evaọ etoke ikpe odu ọvo (1,000), Uvie na u ti ru ẹjiroro ọsosuọ nọ Ọghẹnẹ o wo kẹ ahwo-akpọ gba. Akpọ na kpobi o ti zihe ruọ aparadase. Ukuhọ riẹ Jesu o ve ti zihe Uvie na kẹ Ọsẹ riẹ. (1 Ahwo Kọrint 15:24-26) Kọ ohwo jọ ọ rrọ owhẹ iroro nọ whọ gwọlọ vuẹ kpahe Uvie Ọghẹnẹ?​—Se Olezi 37:10, 11, 29.

 

^ edhe-ẹme 6 Rọkẹ evuẹ kpahe epanọ eruẹaruẹ Ebaibol e rọ riobọhọ ukpe 1914, rri ẹwẹ-obe avọ 215-218 orọ obe na, Eme Ebaibol na O Gine Wuhrẹ?