1. Kọ egagọ uzẹme ọvuọvo ọ riẹ?

“Wha sẹro oma rai obọ eruẹaro erue.”​—MATIU 7:15.

Egagọ ọvuọvo Jesu o wuhrẹ ilele riẹ kpahe, oyehọ egagọ uzẹme. O wọhọ edhere nọ o bi su kpohọ uzuazọ ebẹdẹ bẹdẹ. Jesu ọ ta nọ: “Enọ e ro [edhere na] e rẹ kakao.” (Matiu 7:14) Egagọ nọ i bi lele uzẹme nọ o rrọ Ebaibol na ọvo Ọghẹnẹ ọ rẹ jẹrehọ. Eware evona ahwo kpobi nọ a rrọ egagọ uzẹme na a rọwo.​—Se Jọn 4:23, 24; 14:6; Ahwo Ẹfẹsọs 4:4, 5.

Rri ividio na Kọ Egagọ Kpobi E rẹ Were Ọghẹnẹ?

2. Eme Jesu ọ ta kpahe Ileleikristi erue?

“A re dhesẹ oma nọ ae a riẹ Ọghẹnẹ, rekọ yọ a be rọ uruemu rai vro ẹe.”​—TAITỌS 1:16.

Jesu ọ vẹvẹ unu inọ ikọ erue i ti gbe egagọ Ileleikristi ku. Evaọ okafe, a wọhọ uvi Ileleikristi. Te ae te enọ e rrọ ichọche rai a re se omarai Ileleikristi. Rekọ whọ rẹ sai vuhu oghẹrẹ ahwo otiọye na. Evaọ oghẹrẹ vẹ? Egagọ uzẹme ọvo whọ sae jọ ruẹ ahwo nọ a be rọ uruemu gbe idhere rai dhesẹ nọ ae yọ uvi Ileleikristi.​—Se Matiu 7:13-23.

3. Ẹvẹ whọ sai ro vuhu ahwo nọ a rrọ egagọ uzẹme?

Joma ta kpahe eware isoi jọ nọ a sai ro vuhu ai:

  • Enọ e rrọ egagọ uzẹme a re wo adhẹẹ kẹ Ẹme Ọghẹnẹ, Ebaibol na. A rẹ daoma ru lele ehri-izi Ebaibol na. Fikiere, egagọ uzẹme u wo ohẹriẹ no egagọ nọ i bi lele iroro ahwo-akpọ. (Matiu 15:7-9) Ahwo nọ a rrọ egagọ uzẹme a re ru lele eware nọ a be ta kẹ amọfa.​—Se Jọn 17:17; 2 Timoti 3:16, 17.

  •   Uvi Ileleikristi a rẹ rọ adhẹẹ kẹ odẹ Ọghẹnẹ, Jihova. Jesu ọ rọ adhẹẹ kẹ odẹ Ọghẹnẹ ẹkwoma odẹ na nọ ọ jẹ hae ta ẹme kpahe kẹ amọfa. O fi obọ họ kẹ ahwo riẹ Ọghẹnẹ je wuhrẹ ai re a lẹ inọ odẹ Ọghẹnẹ o jọ fuafo. (Matiu 6:9) Evaọ oria nọ whọ be rria, egagọ vẹ ọ be rọ odẹ Ọghẹnẹ wuhrẹ amọfa?​—Se Jọn 17:26; Ahwo Rom 10:13, 14.

  • Uvi Ileleikristi a rẹ ta usiuwoma Uvie Ọghẹnẹ. Ọghẹnẹ o vi Jesu ze re ọ ta usiuwoma kpahe Uvie na. Uvie Ọghẹnẹ họ ẹruore ọvuọvo nọ ahwo-akpọ a wo. Jesu ọ ta kpahe Uvie na rite ẹdẹ nọ o ro whu. (Luk 4:43; 8:1; 23:42, 43) Ọ ta kẹ ilele riẹ inọ jọ a ta usiuwoma kpahe Uvie Ọghẹnẹ. Otẹrọnọ ohwo jọ ọ nya bru owhẹ ze te ta kpahe Uvie Ọghẹnẹ, egagọ vẹ who re roro nọ ohwo na ọ rrọ?​—Se Matiu 24:14.

  • Ilele Jesu a rrọ abọ ọvuọvo ọrọ akpọ omuomu nana ha. A re w’obọ evaọ isuẹsu hayo ohọre ẹwho ho. (Jọn 17:16; 18:36) Ofariẹ, a rẹ rọ aro kele iruemu iyoma akpọ na ha.​—Se Jemis 4:4.

  • Uvi Ileleikristi a re wo uyoyou udidi kẹ ohwohwo. A jọ Ẹme Ọghẹnẹ wuhrẹ inọ a re wo adhẹẹ kẹ ahwo erẹwho kpobi. Dede nọ ẹsibuobu egagọ erue a rẹ tha erẹwho nọ i bi fi ẹmo uke, ahwo nọ a rrọ egagọ uzẹme a re w’obọ evaọ ẹmo ho. (Maeka 4:1-4) Ukpoye, uvi Ileleikristi a rẹ rọ oke, igho gbe ekwakwa rai fi obọ họ kẹ amọfa jẹ kẹ ae uduotahawọ.​—Se Jọn 13:34, 35; 1 Jọn 4:20.

4. Kọ whọ sai vuhu egagọ uzẹme na?

Egagọ vẹ ọ be rehọ iwuhrẹ rai kpobi no Ebaibol na ze, be rọ adhẹẹ kẹ odẹ Ọghẹnẹ, je bi whowho nọ Uvie Ọghẹnẹ họ ẹruore ọvuọvo nọ ọ rrọ kẹ ahwo-akpọ? Utu ahwo vẹ a bi dhesẹ uyoyou, je bi siomano ẹmo-ofio? Amono who roro?​—Se 1 Jọn 3:10-12.