Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Emamọ Usi nọ U No Obọ Ọghẹnẹ Ze!

 Uwuhrẹ 8

Fikieme Ọghẹnẹ Ọ rọ Kuvẹ kẹ Emuemu gbe Uye-Oruẹ?

Fikieme Ọghẹnẹ Ọ rọ Kuvẹ kẹ Emuemu gbe Uye-Oruẹ?

1. Ẹvẹ emuemu o ro muhọ?

Ọghẹnẹ ọ kuvẹ kẹ esuo ahwo-akpọ kri te epanọ u ro dhesẹ nọ a rẹ sai ku ebẹbẹ ahwo-akpọ họ họ

Emuemu o muhọ evaọ otọakpọ okenọ Setan o ro tu gu ọrue. Setan ọ jọ ukọ-odhiwu ọgbagba vẹre, rekọ o dikihẹ ga evaọ “uzẹme” na ha. (Jọn 8:44) Egagọ nọ a rẹ rọ kẹ Ọghẹnẹ ọvo i je si ei urru. Setan o gu ọrue kẹ Ivi, aye ọsosuọ na, jẹ viẹe họ yoẹme kẹ ọyomariẹ viukpọ Ọghẹnẹ. Adamu o kuomagbe Ivi ghẹmeeyo kẹ Ọghẹnẹ. Oware nana nọ Adamu o ru na o tẹ wha uye-oruẹ gbe uwhu ze.​—Se Emuhọ 3:1-6, 19.

Nọ Setan ọ ta kẹ Ivi inọ jọ o ru oware nọ Ọghẹnẹ o juzi kẹe inọ o ru hu, Setan ọ tẹ rọ ere mu udu-esuo Ọghẹnẹ họ ẹwọso. Ahwo-akpọ buobu a ruọ abọ Setan no be siọ isuẹsu Ọghẹnẹ. Enẹ Setan o ro zihe ruọ “okpohwo [hayo, osu] akpọ ọnana.”​—Se Jọn 14:30; 1 Jọn 5:19.

2. Kọ oware jọ o thọ Ọghẹnẹ obọ evaọ emama riẹ?

Ọghẹnẹ ọ ma eware kpobi gbagba. Ọghẹnẹ ọ ma ahwo-akpọ gbe ikọ-odhiwu kpobi evaọ oghẹrẹ nọ a sai ro yoẹme kẹe gbagba. (Iziewariẹ 32:4, 5) Ọghẹnẹ ọ ma omai jẹ kẹ omai uvẹ nọ ma rẹ rọ salọ oware nọ ma re ru, te uwoma hayo uyoma. Uvẹ yena nọ ọ kẹ omai na u re ru omai dhesẹ sọ ma you Ọghẹnẹ.​—Se Jemis 1:13-15; 1 Jọn 5:3.

3. Fikieme Ọghẹnẹ ọ rọ kuvẹ kẹ uye-oruẹ rite enẹna?

Jihova ọ kuvẹ re a wọso udu-esuo riẹ anwọ oke ọgbọ Idẹn ze. Fikieme? Re o dhesẹ via nọ esuo ọvuọvo ọ rẹ sae kẹ ohwo-akpọ erere he u te no esuo Ọghẹnẹ no. (Ọtausiuwoma Na 7:29; 8:9) Eware nọ a rọ ẹro ruẹ no anwọ ikpe idu ezeza (6,000) erọ  ikuigbe ohwo-akpọ, i ru uzẹme na dhesẹ oma via no. Isu ahwo-akpọ a sai si ẹmo, ethube, okienyẹ, gbe ẹyao n’otọ họ.​—Se Jerimaya 10:23; Ahwo Rom 9:17.

Wo ohẹriẹ no esuo ahwo-akpọ, esuo Ọghẹnẹ ọ be kẹ ahwo nọ a jẹ riẹ rehọ erere. (Aizaya 48:17, 18) Kẹle na, Jihova o ti si egọmeti ahwo-akpọ kpobi n’otọ. Ahwo nọ a gwọlọ nọ Ọghẹnẹ o su ai ọvo a te rria otọakpọ na.—Aizaya 11:9.​—Se Daniẹl 2:44.

4. Uvẹ vẹ ma wo fiki akothiho Ọghẹnẹ?

Setan ọ ta nọ uvumọ ohwo ọ rrọ họ nọ ọ rẹ gọ Ọghẹnẹ fiki uyoyou nọ o gine wo kẹe. Kọ whọ sai dhesẹ nọ ọrue Setan ọ be ta na? Ee. Akothiho Ọghẹnẹ o be kẹ omai kpobi uvẹ nọ ma re ro dhesẹ sọ abọ esuo Ọghẹnẹ hayo ọrọ ahwo-akpọ ma rrọ. Ma rẹ rọ oghẹrẹ nọ ma bi yeri uzuazọ mai dhesẹ abọ nọ ma rrọ.​—Se Job 1:8-12; Itẹ 27:11.

5. Ẹvẹ ma sai ro dhesẹ nọ ma gwọlọ nọ Ọghẹnẹ o su omai?

Oghẹrẹ nọ ma bi yeri uzuazọ u re dhesẹ sọ ma gwọlọ nọ Ọghẹnẹ ọ jọ Osu mai

Ma re dhesẹ nọ ma gwọlọ nọ Ọghẹnẹ ọ jọ Osu mai nọ ma tẹ be gọe evaọ edhere nọ o rọwo kugbe Ẹme riẹ, Ebaibol na. (Jọn 4:23) Ma rẹ sai dhesẹ nọ ma siọ isuẹsu Setan nọ ma te siomano esuo-ohrowo gbe ẹmo-ofio, wọhọ epanọ Jesu o ru.​—Se Jọn 17:14.

Setan ọ be rọ ogaga riẹ lẹliẹ ahwo roro nọ ọfariẹ-ogbe avọ iruemu iyoma efa i woma. Nọ ma te siomano iruemu nana, egbẹnyusu gbe imoni mai jọ a rẹ sae poviẹ hayo wọso omai. (1 Pita 4:3, 4) Fikiere, ma rẹ salọ abọ nọ ma rẹ jọ. Kọ ma ti kuomagbe ahwo nọ a you Ọghẹnẹ? Kọ ma ti koko izi riẹ, enọ i dhesẹ areghẹ gbe uyoyou riẹ via na? Ma te ru ere, yọ ma bi dhesẹ nọ ọrue Setan ọ ta inọ ohwo ọvo o ti yoẹme kẹ Ọghẹnẹ hẹ nọ ọ tẹ rẹriẹ ovao ku ebẹbẹ.​—Se 1 Ahwo Kọrint 6:9, 10; 15:33.

Uyoyou nọ Ọghẹnẹ o wo kẹ ahwo-akpọ o kẹ omai imuẹro inọ emuemu gbe uye-oruẹ u ti kuhọ. Ahwo nọ a wo ẹrọwọ a te reawere uzuazọ evaọ otọakpọ bẹdẹ bẹdẹ.​—Se Jọn 3:16.