1. Fikieme u ro fo nọ ma gọ Ọghẹnẹ?

Ọghẹnẹ uzẹme na ọ ma eware kpobi. O wo emuhọ họ yọ o ti wo ekuhọ gbe he. (Olezi 90:2) Ọye họ Ọnọ o wo emamọ usi nọ o rrọ Ebaibol na. (1 Timoti 1:11) Nọ orọnọ Ọghẹnẹ ọ kẹ omai uzuazọ na, ọye ọvo ma rẹ gọ.​—Se Eviavia 4:11.

2. Ẹvẹ Ọghẹnẹ ọ rrọ?

Ohwo-akpọ ọvo ọ re ruẹ Ọghẹnẹ ẹdẹvo ho keme Ọghẹnẹ yọ Ẹzi, koyehọ uzuazọ riẹ u kpehru vi orọ emama nọ e rrọ otọakpọ. (Jọn 1:18; 4:24) Ghele na, ma rẹ sae riẹ oghẹrẹ nọ Ọghẹnẹ ọ rrọ ẹkwoma eware nọ ọ ma. Wọhọ oriruo, egheghẹrẹ ibi-ire gbe idodo nọ ọ ma i dhesẹ nọ o wo uyoyou gbe areghẹ. Oghẹrẹ nọ ehrugbakpọ na ọ rro te u dhesẹ nọ Ọghẹnẹ o wo ogaga.​—Se Ahwo Rom 1:20.

Ma rẹ sai gbe wuhrẹ eware buobu kpahe Ọghẹnẹ nọ ma te bi se Ebaibol na. Wọhọ oriruo, Ebaibol na ọ ta kẹ omai eware nọ e rẹ were Ọghẹnẹ gbe enọ e rẹ dhae eva, oghẹrẹ nọ o re yeri kugbe ahwo, gbe owọ nọ ọ jẹ evaọ iyero sa-sa.​—Se Olezi 103:7-10.

3. Kọ Ọghẹnẹ o wo odẹ?

Jesu ọ ta nọ: “Ọsẹ mai nọ ọ rọ obọ odhiwu, odẹ ra ojọ ọrẹri.” (Matiu 6:9) Dede nọ Ọghẹnẹ o wo edẹ-ova buobu, odẹ ọvuọvo o wo. Evaọ ẹvẹrẹ kpobi, u wo oghẹrẹ nọ a re se odẹ na. Evaọ Isoko a re se odẹ na “Jihova.”​—Se Olezi 83:18, NW.

A si odẹ Ọghẹnẹ no Ebaibol buobu no a te fi Ọnowo hayo Ọghẹnẹ họ oria riẹ. Rekọ okenọ a kere Ebaibol na, odẹ Ọghẹnẹ o romavia unuẹse nọ o joma te idu ihrẹ  (7,000). Jesu o whowho odẹ Ọghẹnẹ via okenọ o je wuhrẹ ahwo kpahe Ọghẹnẹ.​—Se Jọn 17:26.

Rri ividio na Kọ Ọghẹnẹ o wo odẹ?

4. Kọ Jihova ọ be daezọ mai?

Wọhọ ọsẹ oyoyou nana, Ọghẹnẹ o bi ru oware nọ o te wha ewoma se omai bẹdẹ bẹdẹ

Kọ uye-oruẹ nọ o da akpọ fia na u dhesẹ nọ Jihova ọ be daezọ mai hi? Ahwo jọ a rẹ ta nọ Ọghẹnẹ o bi ru omai ruẹ uye rọ dawo omai, rekọ onana yọ uzẹme he.​—Se Jemis 1:13.

ghẹnẹ ọ kẹ ohwo-akpọ uvẹ iroro-ejẹ ro bru ọghọ họ iẹe oma. Kọ o gbẹ rrọ oware evawere kẹ omai inọ ma wo uvẹ nọ ma sae rọ salọ nọ ma rẹ gọ Ọghẹnẹ? (Joshua 24:15) Rekọ ahwo buobu a salọ nọ a re ru amọfa eware iyoma, fikiere uye-oruẹ o tẹ da akpọ fia. O rẹ da Jihova nọ ọ tẹ be ruẹ eware iyoma itieye.​—Se Emuhọ 6:5, 6.

Jihova ọ be ginẹ daezọ mai. Ọ gwọlọ nọ ma reawere uzuazọ. Kẹle na o ti si uye-oruẹ no, ọ vẹ jẹ raha enọ e be wha uye ze. Dede na, Jihova o wo emamọ ẹjiroro nọ ọ rọ kuvẹ kẹ uye-oruẹ evaọ ubroke. Evaọ Uwuhrẹ avọ 8, ma te riẹ kpahe ẹjiroro yena.​—Se 2 Pita 2:9; 3:7, 13.

5. Ẹvẹ ma sai ro si kẹle Ọghẹnẹ?

Jihova ọ gwọlọ nọ ma si kẹle iẹe ẹkwoma olẹ nọ ma rẹ lẹ sei. O wo isiuru kpahe omai omomọvo. (Olezi 65:2; 145:18) Ọ rẹ rọvrẹ omai. O re muẹrohọ nọ ma tẹ be daoma ru eva were iẹe, o tẹ make rọnọ eware e rẹ thọ omai obọ ẹsejọ. Fikiere, dede nọ ma gba ha, ma rẹ sai wo usu okpekpe kugbe Ọghẹnẹ.​—Se Olezi 103:12-14; Jemis 4:8.

Nọ orọnọ Jihova ọ kẹ omai uzuazọ na, ma re you rie vi omọfa kpobi. (Mak 12:30) Nọ who bi wuhrẹ kpahe Ọghẹnẹ je ru eware nọ ọ ta, be rọ ere dhesẹ uyoyou ra kẹ Ọghẹnẹ na, usu ra kugbei o te kpekpe vi epaọ anwẹdẹ.​—Se 1 Timoti 2:4; 1 Jọn 5:3.